Read Wancho Naga Mathi 16 Bible Online

Mathi 16 - Wancho Naga bible

Mathi 16

¹Farisi hia saduki khünakbu züita Jisu hato ngui. Hwome chix amanse le tex laxle tsünle, chix Zang tokhange nguikya changpule aho ang ohünotün mwot mokle aho angkya akax.

²Ikoxlechu Jisu-e lan: “Hünzome zanghan dütüi to hulaxle thüitüi: ‘Kem ang zangmüi angkya changa, zangding khile!’

³Zanghan dün to hu laxlechu hünzome thüitüi: ‘Zangding khile tamchu nakle, zangwat koxlax!’ Zangding to hulaxle hünzome zang chimüimüi angkya a akax ang tsuak ikoxle athax pongkya chaxwan zanghan bama a münwanbu ngünlaxle ngaxchu chiawan tsuak!

⁴Anyix ngainyixkya chemtukuxkya zünte tamchu Zang chitüikyabu hex. Hünzome münwan lomleo? Ajepa Juna münwan boma mama münwan hünzom ang münfaüi.” Ikhoma chixe hwom dantoxlaxle atsaile pao.

⁵Tinu tachi to takya zuma wangshembue an kop angkya alak.

⁶Jisu-e thüi: “Farisi hia sadukibu twonkhax hanpakma khünli lax.”

⁷Wangshembue hwom hwome ahuxle zangwün: “Chixe ija keme an chikop koxle thüipu.”

⁸Hwom zangwün tsingle lax ilaxle Jisu-e thüi: “Hünzome an chikopkya bama chem zangwün atsat ngopu? Hünzom ang mongong chemkuxma hixkoxpu!

⁹Hünzome athax kople matsing tomta nyi? Kue ankhao aga hajat aga khünaknu hanpakma akhixkya münakhax hia? Hünzome ota-otua sang obi ma awangle tswonle kopkya dai?

¹⁰Tamchu hajat anüt khünaknu bama an khao anüt akhix pongmachu chempang le changkya dai? Ota-otua hünzome sang obi awangle tswonle kopkya dai?

¹¹Kue hünzom hama an mo wünkya münchangle hünzome büthüikoxle chitsingpu? Farisi hia Sadukibu twonkhax bama hünzom lualua to khünzaile ngolax!”

¹²Ifüima tix wangshembue, ju ang langkya twonkhax chichangle, farisi hia sadukibu hwon-nwot bama hwom khünzai angkya bama akaxpu le tsingle lax.

¹³Ifüima Jisu Kaisaria Filip tingnu hato hoxkya chaxwan to ngui ilaxle chix wangshembu ma atüi: “Khünaknue Khünak Hosa ang owa le thüipuix?”

¹⁴Hwome lan: “Züizüie baptikya mix Juhan changpule thüile; züizüie Elija changpule thüile; züizüie Jeremia le thüile; züizüie a mama ajepa tuita changpule thüile.”

¹⁵Chixe hwom machu atüi: “Hünzome a chemle tex? Hünzome ku ang owa le thüipu?”

¹⁶Simon Pitar-e lan: “Nang a ozün ma tüikya Zang Hosa Messaiah changle.”

¹⁷Jisu-e akax: “Nang a Juna sasün Simon, nang mohiman naxchang; chemthüikoxle khünak makhange chichangle, nang hama ija kax a zangkangting tokya Apae apua fakya changpu.

¹⁸Ija khoma kue nang ang thüipu: Pitar, nang a long changle ilaxle ija long tok ma kue ku müimüithom zing angkya changle. Zike ngaxchu ija to lüt ang müntho.

¹⁹Nang ang kue zangkangting kapatja faüi; nange chaxwannu ma chem abaxpuix, ija zangkangting tochu wüi abaxüi; chaxwannu ma oja nange danüi hex, zangkangting tochu ija a danüi.”

²⁰Ifüima chix Messaiah changpule owa hamachu chiwün angkya hanpakma Jisu-e wangshembu füi kaxshing kople akax.

²¹Ija makhange Jisu-e wangshembu hama angaile akax: “Ku Jerusalem to paotomtaüi ilaxle apün-awangkya, nguakhobu, wanlom nwotmixbu, ibu chak ma kue huanuma sikngün apongüi; hwome ku langüi ikoxlechu nyix azom lükya to ku chatle azangle zoüi.”

²²Ikoxle Pitar-e chix sele pao ilaxle sa ang süt: “Zange ija naxabax hüi, Jowanpa! Nang ija ningle chang ang müntom angkya changle.”

²³Aküile hulaxle Jisu-e Pitar ang thüi: “Ku ha angkya atsai paoün, haxshix! Nange ku lom abangle; chemthüikoxle nange thütkya a khünak mongtex changle, Zang mongtex münchang.”

²⁴Ifüima Jisu-e wangshembu ang thüi: “Owawae ku füito azuise jangtsu, chixe ma alak üntoxle ma pünsak pai laxle tix ku füito hüilax.

²⁵Chemthüikoxle khünak owae ma tsün azün ang azongüi hex, chixe ija amütüi; ikoxle ku mün kuxmale owae ma tsün amütüi hex, chixe ija ataküi.

²⁶Khünak tuitae chaxwannu pangnu koptsuak koxlechu ma khüzün amüt le jangchang thüiningle chix ang lap chemtüi? Chemchu müntüi! Khünak ma ma khüzün lüix to kox angkya chemchu müntüi;

²⁷Chemthüikoxle Khünak Hosa ju angkya tüile. Chix a chix kaxtaimixbu füi fuazangle juüi ilaxle pangnusa ang wüi chixe ma mwot-mwot ma thütle hingho koxüi.

²⁸Kue thüipu, Khünak Hosa chongwang ang achangle nguikya mangün tanto ikha ma ngokya züizüie zikya füi münapongüi.”