Read Wancho Naga Mathi 17 Bible Online

Mathi 17 - Wancho Naga bible

Mathi 17

¹Nyix azok füima Jisu-e chix füito Pitar, Jakop hia Juhan hwom koplaxle haxnukho to hwom tata süile dong.

²Hwome hule ngopongma wüi Jisu sün lüile hüi; chix thün zanghan ningle nyan, ilaxle chix nyizabu a tüle nyanle tse.

³Ifüima wangshem hwom azome Mosa hia Elija nyie Jisu füi kaxkaxle ngokya ngün.

⁴Pitar-e akaxle Jisu ang thüi: “Jowanpa, ikhato kem ngokya tüle müile; nang mong jangtsuba kue pomsa azom zingfang; tuita a nang hanpakma, tuita a Mosa hanpakma ilaxle tuita a Elija hanpakmale.”

⁵Chix akaxle ngopongma nyankya zangfwom tuita hwom khangkho to hüi; ija zangfwom makhange hwome kaxzing ile atat: “Ija a kue mongkünkya Ku Sasün changpu; chix füi ku mongzom müipu! Chix kax ma laxlax!”

⁶Ija ozing atat pongma wangshembu tüle za ilaxle ma thün haxchi to akhuxle khom.

⁷Jisu-e hwom hato hüilaxle hwom to po le thüi: “Ajongün, taxza!”

⁸Ijama hwome laoxle hukya thoma Jisu boma hwom hama owachu chibang.

⁹Hwom haxhua tokya jule ngoponge Jisu-e hwom füi akax: “Khünak Hosa chatle azangle mazo tanto hünzome ngünkya ija mikngün ohün bama owa hamachu taxwün.”

¹⁰Ijama wangshembue Jisu ma atüi: “Wanlom nwotmixbue pongwang ma Elija wüi shonghüi kop angkya changle le büthüikoxle thüipu?”

¹¹Jisu-e lanle thüi: “Elija wüi thoma nguilaxle chixe pangnu achwon angkya zangwün a changle.

¹²Ikoxlechu kue hünzom ang thüipu: Elija a kaile wüi nguidaoa, ikoxle khünaknue chix chitsing ija khoma hwome chix to hwom mongtextex ma hwonpu.”

¹³Iletix wangshembue ija a chixe hwom hama baptikya mix Juhan mowün ngopule awanle lax.

¹⁴Otue hwom othom hato chat, mixsün tuita hüilaxle Jisu chitong ma akhuxle thung laxle akax,

¹⁵“Jowanpa, Ku sasün to chingcha hüi! Chix ma kakma kak tüile; ijae alele le tsünle azik üntoxle ti hia wünkha to füt ang tomtomle.

¹⁶Kue chix nang wangshembu hato apüile anopu, ikoxle hwome amüi ang müntho.”

¹⁷Jisu-e thüi: “Hünzom chem ningkya mongong chitüikya hia thaile ngokya khünakbu hex. Hünzom füi ku a obit ngoüi? Ku hünzom füi athongle chemtukux ngoüi? Naosa ikhato ku hato apüihüi.”

¹⁸Jisu-e haxshix jwonkya ma ija laile pao, ifüi tomle naosa kak müi.

¹⁹Ifüima wangshembue huaksüi le Jisu hato nguilaxle atüi: “Kwome büthüikoxle ija haxshix jwon ang chithopu?”

²⁰Chixe lan: “Ija a hünzom ma mongong anguile chitüikya khoma changle. Hünzom ma mongong suili tsang tukux ngaxchu jangtüi thüikoxle, hünzome ija haxhua füi akax tsuaküi: ‘Nang ikha angkya chukha to paoün!’ Ija ma ija haxhua paoüi. Ija ningle hünzome pangnu mok ang thoüi.

²¹Ikhoma chisax chilingle atsaole zangjopkya etix iningkya jwon ang thoüi; mama chem makhangechu münchang!”

²²Wangshembu pangnu Galili ma afoxkya zuma, Jisu-e hwom füi akax: “Khünak Hosa a khünaknu chak to owüiole kox angkya changle.

²³Hwome chix langüi, ikoxlechu nyix azom lükya to chix chatle azangle zoüi.” Ija atatlaxle wangshembu ang tüle mongma.

²⁴Jisu hia chix wangshembu Kaparnaum to nguikya zuma, Zangshwom-Hom süisai mix nguilaxle Pitar füi akax: “Hünzom Nwotmix-e Zangshwom-Hom süi mafa fapuix?”

²⁵Pitar-e lan: “Chifa lea.” Pitar homkha to dongkya zuma Jisu-e wüi thoma akaxle thüi: “Simon, nange chemle tex? Chaxwannu wanghombu ang wangmwot hia süi opange kox angkya hex? Nokpue kox angkya hia püntüibue kox angkya hex?”

²⁶Pitar-e lan: “Mixnok püntüie kox angkya changüi a.” Ikoxle Jisu-e thüi: “Jangchangba müiüi, ikoxle nokpue fa angkya münchang thüipuix mi?

²⁷Ikoxlechu keme hwom ang mong taxama hax. Idaile nangepi tinu khato paolaxle nyax shongkoplax. Ijama pongwang ma kopkya nyax bele alai laxle owikha afilax, ijama jan ngun khaota bangüi hex; ija a künyi hanpak ang Zangshwom-Hom süi ang danle hwom ang koxdao.”