Read Wancho Naga Mathi 18 Bible Online

Mathi 18 - Wancho Naga bible

Mathi 18

¹Ija pongma wangshembu nguilaxle Jisu ma atüi: “Zang Wangting ma akhokya ang owa changpuix?”

²Jisu-e naosa tuita nyakle apüi, chix hwom pomtho ma ajong ang tom;

³ilaxle akax: “Mong ma koplax, hünzom ang mongnai laxle ija naosa ningle machang tanto, hünzome Zang Wangting to nop ang münkopüi.

⁴Owa malualua to puinai le ija naosa ningle achangüi hex, Zang Wangting ma achongkya ang chix achangüi.

⁵Ilaxle ku mün ma iningkya naosa tuita owae pongle kopüi hex, ija a ku pongle kopkya changpu.

⁶“Owae ku to mongongkya naosa tuita mong amale ku füi atsai ang koxüi hex; ija khünak a dingkux ma chongkya long fün laxle tikha to dütle maxkya wüi chix hanpakma amüikya.

⁷Chaxwannu hanpakma khompuatsi le; chemthüikoxle khünaknu ochax to adüt angkyadu olom tüihule! Ija ningle jento changle ngo angkya jao, ikoxlechu owa makhange ibu chang ang tompuix, chix maxsax.

⁸“Nang chak chichangba cha tuitae nang mongong amüt ang jangtomba, ija düt laxle tswonle awütdao. Cha hia chak atomti le kop laxle haolum wünkham khato oshuk chitüi le shunle ngokya füi chikao chakkao ma othuithuima ozün ma ngo angkya kha alopkya wüi nang hanpakma amüikya.

⁹Tamchu nang mike nang mongong amüt ang jangtomba, ija loklaxle tswonle awütdao! Pangnyi mik koplaxle haolum okham wünkha to tswonle awütkya füi mik kao tuita füi ozün ma ngo angkya kha alopkya wüi nang hanpakma amüikya.

¹⁰“Ija naosombu tuita ngaxchu thajao wünhai le chichang angkya bama hünzom likhün lax. Kue hünzom ang thüipu, Zangkangting to hwom kaxtai mixbu ku Apa hama jento ngole.

¹¹Chemthüikoxle Khünak Hosa a maxle ngoünkya lom ang hüikya changle.

¹²“Hünzome chemle thütpu? Mixhuak tuita ang chun hota tüikya kha angkya tuita amüt koxle chixe chemle hwonüi? Chixe mama puli aku kotho to fumsax ang danle toxlaxle ija tuita maxkya lom ang faokha to paoüi.

¹³Kue hünzom ang thüipu, chixe ija atakkya zuma, puli bün aku tüikya chunbu thak to ija chun tuita füi wüi mongmüikya tüiüi.

¹⁴Ija ningle zangkangting tokya Hünpae ija naosom tuita ngaxchu amüt ang müntsu.

¹⁵“Nang zuikhui owawae nang bama achaxle jangchangba, chix hato paolaxle chix thaikya kha ahole laxkox; ikoxchu ija a hünkhi tatae huxsa ma mokkox. Chixe nang kax ma janglax thüiningle nange hüntüinao kop ang thodaoa.

¹⁶Ikoxle chixe nang kax ma chilaxle jangchangba, mixhuak tuita hia anyi tukux koplaxle wünkox; chemthüikoxle pangnuli towüi kaxkhi ang mixhuak anyi hia azome fakox tix müiüile Otsao Lai-e tsangle.

¹⁷Ikoxle chixe hünzom kax machu chilaxle jangchangba, müimüithom hato ngaile laxkox. Ikoxle chixe müimüithom kax machu chilaxle jangchangba, chix a püntüi hia süisai mixbu thatha ma thomdao.

¹⁸“Ijadaile kue hünzom pangnu ang thüipu: Chaxwannu ma hünzome chempang abaxüi hex, ibu zangkangting tochu wüi abaxüi; chaxwannu ma hünzome chempang danpanüi hex, zangkangting tochu ibu danpan angkya changle.

¹⁹“Tamnüilechu kue hünzom ang thüipu: Hünzome zangjop makhange mixhuak anyi notom laxle ju-lomkya tütalichu zangkangting tokya Apae hünzom ang chifale müntüiüi.

²⁰Chemthüikoxle ojong khama mixhuak anyi azom changkoxchu ku mün ma mong notom ma afoxüi hex, hwom khama ku womle tüile.”

²¹Ifüima Pitar hüilaxle Jisu ma atüi: “Kutüi kunao hwom ang kue thailak obithom ma fatsuak angkya? Othom anüt ma hia?”

²²Jisu-e lan: “Thom anüt tata ma münchang, puzom bün othom anüt ma.

²³Chemthüikoxle Zang Wangting a ma dabu mwot akhikya wanghom tuita ningle changpu.

²⁴Chixe akhi ang sütkya pongwang ma ngun suk jatbün thashe tüikya mix apüile ajong.

²⁵Chix ma, ma thashe achat ang ngun okhonguile chitüi koxle, ija wanghome, ija mixsün kakonu hia susabu komle tamchu chix ma atüitüi komkaile, chix thashe achat angkya kuxma hangle awütlaxle da ang achangle awüt angkya kaxkox.

²⁶Ija dae wanghompa cha to twonle akhuxlaxle chix tong shwomle thailak ju, ‘Ku to chingchalaxle shongaduhüi, kue nang ang bakle achat faüi jao!’

²⁷Wanghompae chix to chingcha, ikoxle chix ma tüikya thashe komkaile thailak koxlaxle chix apao.

²⁸“Ija mixsün laile paokya ma, tomwüi da ang ngokya, chix ma thashe hidaole laxle thomkya mix apong. Ija mixsüne chix ang ngunkhix hota kox angkya tüikya. Chixe ija mixsün chak ma kop tamchu thuile dingkux ma fyet ilaxle chix ang kox ang tüikya thashe athaxthax wüi laxhüi le atsang.

²⁹Ile hozuipa dae chix chato jople shwom, ‘Chingchalaxle siaduhüi, kue nang ang faüi jao hex!’

³⁰Ikoxle chixe ija mixsün kax chiapa; ikoxle chix ang thashe achatle mafa-mafale kun to shole thom ang kox.

³¹Otue ile changkya mama dabue ngünle lax, hwom ang mongma ilaxle wanghompa hato nguilaxle pangnu wünle kox.

³²Ikhoma wanghompae ija da nyakle apüilaxle thüi: ‘Nang a laxli chitüikya da changle. Nange thailak jupue kue nang ang thashe abakle thailak fapu.

³³Nang to kue chingchakya ningle ma zuikhui da tuita tochu nange chingchase tsyen changle.’

³⁴Wanghompa ang mong athukle tsik, ilaxle chix thashe komle achatle matsuak-tsuakba kun to shole thom angkya hanpakma ija mixsün kople pao.”

³⁵Jisu-e ashuk: “Hünzome pangnue wüi matüi manao to mong makhange thailak fakya chitüi jangthüiba zangkangting tokya Apaechu hünzom to ile hwonüi.”