Read Wancho Naga Mathi 19 Bible Online

Mathi 19 - Wancho Naga bible

Mathi 19

¹Otue Jisu-e ija zangwün ashuk puix, Galili dantoxlaxle chix Jordan shuanu tale Jehudi chaxwan to pao.

²Khünak othomnue chix man to ilaxle ikhato chixe hwom kak amüi.

³Züizüi farisibue chix aman angkya hanpakma tsünle kax atüi angkya füi ngui. Hwome atüi: “Tüta khoma wüi changlax, ma kakonu apao angkya kem wanlom ma panle tüicha hex?”

⁴Jisu-e lanle thüi: “Pongwang ma wüi Zange hwom lüka hia sheko le zingpu;

⁵Ija khoma ‘lüka tuitae hopa hia honu nyi dantoxlaxle ma kakonu füi notomüi ilaxle hokhi anyi a tuita ang achangüi’, le thüikya Otsao Lai kax hünzome ele maano hia?

⁶Ikhoma hokhi a anyi münchang ikoxle tuita changpu. Ile Zange apong daokya khünake afan angkya oli münchang.”

⁷Farisibue chix ma chatle atüi: “Jangchangba, afan angkya laiza fa laxle lüka tuitae ma kakonu apao ang tsuaküile Mosa-e wanlom chem ang fale tox?”

⁸Jisu-e lan: “Hünzom mong anwot-ano ang chimüile tsiakkya ngünlaxle Mosa-e ija wanlom fale toxkya changle. Ikoxle ami zingpong tokhange wüi ile changkya oli münchang.

⁹Kue hünzom ang thüipu: Chinunchakkai le thaikya bama wüi chichang, mama khoma hexle khünak owae ma kakonu apaolaxle mama sheko laxüi hex, chixe she füi chinunchakkaipu; tamchu apaole thomponge owawae ija sheko laxle jangchang thüichu, chixe she füi chinunchakkaipu.”

¹⁰Wangshembue chix ma atüi: “Kakonu hia kakopa nyi bama ile tüi angkya jangchang, kako chitankya wüi tüichong changa.”

¹¹Jisu-e hwom ang thüi: “ija kax a pangnusa hanpakmale münchang; ikoxle Zange ileo le koxle thomdaokyabu hanpakma changpu.

¹²Chemthüikoxle khünake kako chitan tsuakkyachu olom-olom tüipu; züizüie hwom puxpong tokhange wüi ileo le puxkya khoma; mamabue, khünake hwom ile zing koxle; ikoxle züizüie a Zang Wangting hanpak ang kako chitan. Ija kax pongle koptsuak angkya mixe tix iningle naxmok kox.”

¹³Khünak züitabue Jisu hato, chixe hwom to twonle mohiman angkya hanpakmale naosombu apüi, ikoxle wangshembue hwom to sa.

¹⁴Jisu-e thüi: “Naosombu taxabax, ku hato hüi ang laxkox; chemthüikoxle Zang Wangting a hwom ningkyabu kux changle.”

¹⁵Chixe hwom to chake twonle mohiman ilaxle ikha angkya pao.

¹⁶Hanpak tuita ma mixsün tuita nguilaxle Jisu ma atüi: “Nwotmix, oshuk chitüikya khüzün atak angkya kuxma kue amüikya mwot chem mokse dai?”

¹⁷Jisu-e lan: “Amüikya bama ku ma chem ang atüipu? Amüikya a tuita wüi. Oshuk chitüikya khüzün kopse jangtsuba Zang kaxtombu thomlax.”

¹⁸Ija mixsüne atüi: “Kaxtombu a chempang?” Jisu-e lan: “Mix mik taxamüt; chinunchakkaile taxtüi; taxahux; taxatse;

¹⁹manu mapa chathua zalax; ilaxle ma tomzi to ma ningle mongkünlax.”

²⁰Ija mixsüne thüi: “Kaxtom ibu kue naosom tokhange wüi mokle hüipu; jangchangba iboma kue mok angkya chem tüi?”

²¹Jisu-e chix ang thüi: “Nang okhonguise jangtsu, paolax, nang ma atüitüi komle hang laxle ngun chitüi chinangbu ang ahanle laxkox, ikoxle zangkangting to nang hakpa ang achangüi; ilaxle oman, ku füito hüilax.”

²²Ija kax atatlaxle ija mixsün ang mongmale pao; chemthüikoxle chix a tuita huanuma tüinangkya hakpa sün changkya.

²³Jisu-e chix wangshembu ang thüi: “Kue hünzom ang thüipu: Hakpa luapa zangkangting to ngui ang müima wüi tsakle;

²⁴Kue thüipu, hakpa luapa zangkangting to nguikya füi mütkui mik makhange Ut litle lekya wüi chwonpai.”

²⁵Ija atatlaxle wangshembu tüle abüt. Hwome thüi: “Jangchangba khosün atat tsuak angkya owapi tüiüi?”

²⁶Tangtho le hulaxle Jisu-e hwom ang thüi: “Khünak zong to ija a tsuak angkya oli münchang ikoxlechu Zang zong to tsuak angkya oli changle.”

²⁷Pitar-e akax: “Hulax, kwome pangnu dantoxlaxle nang füito hüipu; kwome chem kop angkya?”

²⁸Jisu-e lan: “Kue ija hünzom ang thüipu: Ongai Khünak Hosa Tsün Hozün ma, chix fuazangkya tüntong ma thungüi hex, Israel homjen bün anyi kaxfün ang hünzom ku wangshembu bün anyichu wüi ma tüntongtong ma thung angkya changle.

²⁹Ku hanpakmale opange ma homkha, pasa tüinao, tamchu nanao, manu mapa, masu masa, haxtok homting, ibu danle toxlaxpuix, hwome thom hotae nüile atak angkya changle tamchu oshuk chitüikya tsün khüzünchu fa angkya changle.

³⁰Ikoxchu athax pongma tunpa ang achang ngokyabu huanuma füipa ang achang angkya changle ilaxle athax oshuk ang achangle ngokyabu huanuma owang ang achang angkya changle.”