Read Wancho Naga Mathi 20 Bible Online

Mathi 20 - Wancho Naga bible

Mathi 20

¹Zang Wangting a ija ningle changle: “Haxtok hopupa anopning kaile ma haxtok ma hingchak katmix lomle pao;

²Hingchak kakyabu füi hingchak mün a jan-ngun huak tupong faüi hexo le atsia laxle akat.

³Chatlechu chix aku baji shene hat to lai, ikhato khünak züita chemchu chimokle ajong ngokya ngün;

⁴ilaxle chixe hwom ang thüi: ‘Hünzom chuwüi ku haxtok mo ang kakox, othachu asule koxüi hex.’

⁵Idaile hwom ka. Ifüima bün anyi hia azom tsomfüiechu chixe ile wüi khünak akat.

⁶Chix hat chito chatlechu wüi tamlai; iponge aga baji nguidaokya. Ijamachu wüi khünak züita ajongle ngokya ngünlaxle chixe hwom ma atüi, ‘Hünzom nyixtungtale chemchu chimok homle büthüikoxle ajongle ngohompu?’

⁷Hwome lan, ‘Kwom ahyen angkya mix owa ngaxchu chitüi khato.’ Ikoxle müiüi, ‘Khaxa hünzom chuwüi kalaxle ku haxtok ma mwot mok kox.’

⁸“Hanhomkya füima haxtok hopupae chix da ang thüi: ‘Akiale ahyenkyabu makhange owang wanglaxle pongwang ma ahyenkyabu ma ashukle, hingchak kakyabu nyaklaxle nok ang wüi otha tomwüi-tomwüi laxkox.’

⁹Aga baji makhange mwot ma sütkyabu ang jan ngun huak pong kox.

¹⁰Oshukma pongwang ole ahyenkyabu hüi; hwome süluile kopüi changtüi angpu le thüt; ikoxle hwom angchu wüi jan ngun huak pong wüi kox.

¹¹Hwome ngun koplaxle hopunu füi mongma kaxzex ang süt.

¹²Hwome thüi: ‘Ija akiale kakyabue khonta tuita wüi mokpu; ikoxle kwom zanghan huak khato nyixtungtale mokpu, ikoxle nange kwom angchu hwom ang koxkya pong wüi koxle hi?’

¹³“Opunue mixsün tuita ang thüi: ‘Apalax, zuikhui, künyi hingchak mün ang jan ngun huak pong wüi ole atsia füima kue nang dyen daicha?

¹⁴Athax nang tsyen koplax ilaxle hom to wanglax. Kue akiale ahyenkyabu angchu nang ang fakya pong wüi fase le tsupu.

¹⁵Ku ngun kue ma mongtex ma twon ang müntho angkya hia? Hia kue chingcha ahokya ngünlaxle hünzome miktsakpu?’”

¹⁶Idaile Jisu-e ashuk: “Owa oshuk changkya hex chix owang ang achangüi ilaxle owa owang changkya hex chix oshuk ang achangüi.”

¹⁷Jisu Jerusalem to nguile ngopongma, wangshembu süile paolaxle aham ngopong ma akax;

¹⁸Jisu-e hwom ang thüi: “Apalax, kem a Jerusalem to dongle ngopu; ikhato khünak Hosa a nguakhobu hia wanlom nwotmixbu chak to owüiole koxüi. Hwome chix a zi ang tomkox wüi müiüile ahaiüi.

¹⁹Ilaxle hwome chix mixnokbu chak to owüiole koxüi; ibue chix chanyiüi, chietüi, ilaxle chix a pünsak ma takle langüi; ikoxlechu nyix azom lükya to chix chatle azangle zoüi.”

²⁰Ifüima Zebedi kakonu sasün nyi kop laxle hüi, ilaxle Jisu chitong ma akhuxlaxle chix ma lita kax ju.

²¹Jisu-e she ma atüi: “Nange chem laxse texpu?” She-e lan: “Nang wanghom ang achangkya zuma ija kusa nyi, tuita nang tsaxchi ma tuita a nang nongchi ma thung ang koxüile ku füi akaxfa.”

²²Jisu-e lanle sasün nyi ang thüi: “Hünzome chem lompuix ija hünzome münawan. Kue ling angkya sikngün pe hünkhie ling ang tho angchami?” Okhie lan: “Kukhie thoüi.”

²³Jisu-e hokhi ang thüi: “Changpu hünzome ku pe makhange ling ang thoüi, ibachu ku tsaxchi hia ku nongchi ma owa thungüi hex, ija kam angkya ku ma chem olom müntüi. Ijabu ngwotnui a opang hanpak ma-ole Apae achwonle tüilaxpuix hwom kux changpu.”

²⁴Mama wangshembu ija zangwün atatkya zuma hotüi-honao nyi füi tüle mongma.

²⁵Ikhoma Jisu-e hwom pangwüi selaxle thüi: “Hünzome awan ngopu, chaxwannu khünak apünkyabu ma tsakzong tüipu tamchu lompabue khünaknu thakma apün-awang angkya tsakzong tüipu.

²⁶Ikoxlechu hünzom khama ija tsakzong tüi angkya oli münchang. Hünzom khama achongkya ang achangse texkya mix pangnu da ang achang angkya changle;

²⁷tamchu hünzom khama owang ang achangse le thütkya mix, Khünak Hosa ningle pangnu zongto da naoli ang achang angkya changle.

²⁸Khünak Hosa a mok ang tom ang chichangle mokle fa angkya hanpakma tamchu khünak khosün angkya bama chix tsün kox angle nguipu.”

²⁹Otue Jisu hia chix wangshembu Jeriko angkya pao ang lai, iponge khünaknue Jisu man to.

³⁰Lomkax ma ngokya khünak anyie ikha makhange Jisu lekya zing atatlaxle akhong: “Dawid Hosa, kukhi to chingcha hüi.”

³¹Khünaknue hokhi to dang angkya hanpakma sa. Ikoxchu hokhi süchongle mix akhong: “Dawid Hosa, kukhi to chingcha hüi!”

³²Jisu zak laxle hokhi nyak. Chixe hokhi ma atüi: “Kue hünkhi hanpakma chem naxmok fa le texpu?”

³³Okhie lan: “Nwotmix, nange kukhi ang ngün angkya zong namfabae le texpu.”

³⁴Jisu-e hokhi to chingcha ilaxle hokhi mik to twon; ifüi tomle hokhie ngün ang kop ilaxle chix füito pao.