Read Wancho Naga Mathi 22 Bible Online

Mathi 22 - Wancho Naga bible

Mathi 22

¹Anaolechu khünaknu füi akax ang Jisu-e kaxpan tuita lax.

²Chixe thüi: “Zang Wangting a tuita sasün lüka aju-asom ang achwonle tüikya wanghom ningle changpu.

³Ahyen daokya mixwünbu nyak ang chixe dabu tomle apao, ikoxlechu hwom nguise chitsu.

⁴Ija khoma mama dabu, ija kaxho füi chatle tomle apao: ‘Mixwünbu ang thüikox, athax kue fongsüt achwondaoa; ku maihupong hia hingho ang kox angkya müibu lang thomdaoa; ilaxle pangnu wüi achwonle tüile. Aju-somkya püntut to nguihüi!’

⁵Ikoxlechu ahyen daokya khünakbu opupu khangkho machu ija bama lixkya chitüi ilaxle ma mwot-mwot to paole bak. Züizüi a haxtok mo ang ka ikoxle züizüi a thalex ang pao.

⁶Ikoxle mama ota tüikyabue ija dabu koplaxle thünzak akop le chak füi twon ilaxle hwom langle awüt.

⁷Wanghompa ang tüle mongma ilaxle chix dabu langkya khünakbu hia hwom tingsho zokle ashun ang mama dabu tsanle apao.

⁸Ifüima chixe chix dabu nyak. Chixe thüi: ‘Kue aju-asomkya fongsüt achwon daoa, ikoxle ija ahyen daokyabue kop angkya münchang;

⁹athax a lomnu to lai laxle hünzome otsuaktsuak ma pangnu nyakle apüi hüi.’

¹⁰Ija khoma dabu pao üntoxle lomnu to laile hwom thoma abangbang, chimüikya mix hia müikya mix tomwüi sele afox; ilaxle aju-asomkya fongsüt ma khünaknu awangle chang.

¹¹“Wanghome mixwünbu to hule hüikya thoma aju-asomkya zapua chilax homtoxle mixsün tuita bang.

¹²Wanghome atüi, ‘Zuikhui, nang ikhato aju-asomkya zapua chilax homtoxle chemle dongpu?’ Ija mixsüne chemlechu chilan.

¹³Wanghome chix dabu ang thüi: ‘Chix a cha chak ma kha laxle kotho zangnak to awütdao. Ikhato chix ang sopkya hia wa azyakkya tüiüi.’”

¹⁴Chixe ashuk: “Huanuma sepu ikoxlechu hidao le wüi kamle koppu.”

¹⁵Farisibu pao ilaxle kax atüi angkyabu füi Jisu aman angkya lom zing.

¹⁶Ofüima hwome hwom wangshembu tamchu Herod othom kha angkya khünakbu züita Jisu hato tsanle apao. Hwom nguilaxle thüi: “Nwotmix, kwome nang a mixmüi changpule awanle; khünaknue tütale wüi thütkoxlax tamchu owa thuachu chizale, nange khünaknu hama Jowanpa bama otsingtsing anwot-anole le kwome awan ngopu; chemthüikoxle nange khünak chifün to chihu.

¹⁷Jangchangba Kaisar ang süi fa angkya kwom wanlom zongto opüi ang chang an toxcha? Nange chemle thüiüi?”

¹⁸Hwome chix tsünkya awanlaxle Jisu-e lan: “Hünzom künkux-mongkwombu changle; chem hanpakma hünzome ku tsünle ngopu?

¹⁹Süi ang kox angkya ngun apüi hüi.” Hwome ngun khix tuita chix hato apüi.

²⁰Chixe hwom ma atüi: “Ija owa mua tamchu owa mün zale thompu?”

²¹Hwome lan: “Ija a Kaisar mua changpu.” Ija khoma Jisu-e hwom ang thüi: “Müidaoa, Kaisar kux Kaisar ang laxkox; Zang kux Zang ang laxkox.”

²²Ija kaxlan atatkya zuma hwom tüle abüt laxle chix dantox üntoxle pao.

²³Ija nyixnyix wüi züita farisibu Jisu hato ngui. Hwom a khünak zidaokya chatle azangle münzo le thüikya othom.

²⁴Hwome thüi: “Nwotmix, Mosa-e apuakya ile changle: ‘Susa matüikya mix jangzi thüiningle, ziünkya mix hanpak ang sixli naxtüi ang, chixe danle toxkya zomnu a honao ma shong angkya changle!’

²⁵Ikoxle homkha tuita ma hotüi honao hwom mixhuak anüt tüikya; tüichongpae kako tan ikoxle naosom chitox homle zile pao; ikoxle chixe toxkya sheko a honao ma shong.

²⁶Ija ningle anyi lekyachu wüi chang; azom lekyachu, oshuk ma hwom anüt pangnue ija mixcha lax ikoxlechu naosom chitox homle zile pao.

²⁷Oshuk ma ija mixchachu wüi zile pao.

²⁸Ikoxle athaxpi anaole zokya nyix ija mixcha a opupu kakonu ang achangüi? Chemthüikoxle hwom pangnue wüi she a ma kako ang laxle hüidao!”

²⁹Jisu-e hwom kax to lan: “Hünzom a huanuma thaile ngole; ija a hünzome Otsao Lai kax hia Zang tsakzong chitsingkya khoma changpu.

³⁰Chemthüikoxle zidaokya chatle zokya zuma hwom a zangkangting tokya kaxtaimixbu ningle changüi. Ikhato aju-asomle ngo angkya münchangüi.

³¹Anaole zokya bama Zange hünzom füi akaxkya hünzome ele münano hia?

³²Zange thüile, ‘chix a, Abraham Zang, Isak Zang tamchu Jakop Zang changle.’ Idaile chix a omang Zang chichangle ozün Zang changle.”

³³Ija chix kaxlan atatlaxle khünaknu huanuma abüt.

³⁴Jisu-e sadukibu adangkya zing atatlaxle farisibu afox,

³⁵ilaxle wanlom nwotmix mixsün tuitae chix aman ang azong.

³⁶Chixe atüi: “Nwotmix, wanlom khama achongkya ojaja hex?”

³⁷Jisu-e lan: “Nange nang Zang to mong makhange abakle, chasa makhange abakle, tamchu tutex makhange abakle mongkünkox!

³⁸Ija a achongkya tamchu akhokya wanlom changle.

³⁹Anyi lekya achong achongkya wanlom a ile: Nang tomzi to nange ma bütukuxle mongkün angkya changpu.

⁴⁰Mosa wanlom komkaile tamchu ajepabu kax bakle ija wanlom anyi ma tix athongle tüile.”

⁴¹Farisibu afox pongma Jisu-e hwom ma atüi:

⁴²“Messaiah hanpakma hünzome chemle texpu? Chix owa homjen changüi hex?” Hwome lan: “Dawid homjen changüi.”

⁴³Jisu-e atüi: “Jangchangba chem bama Chasae Dawid füi, chix ang Jowanpa le nyakle akax? Chemthüikoxle Dawid-e thüi:

⁴⁴“‘Jowanpa-e ku Jowanpa ang thüile; ku tsaxchi ma ngohüi; kue nang zanbu nang chifa fangma mathom-mathomle!’

⁴⁵Ikoxle Dawid-e chix ang ‘Jowanpa’, le jang nyak thüikoxle Messaiah a Dawid homjen ang chemle changüi?”

⁴⁶owaechu chix kax to fata lan ang chitho. Ija nyix makhange owaechu tamchatle chix ma kax atüi ang chichwom.