Read Wancho Naga Mathi 24 Bible Online

Mathi 24 - Wancho Naga bible

Mathi 24

¹Jisu-e Zangshwom-Hom danle toxlaxle laile pao ang thüi pongma, chix wangshembu chix hato Zangshwom-Hom zingkyabu aho ang ngui.

²Chixe thüi: “Changkoxa! Hünzome ibu müile le ngüntüi angpu. Kue hünzom ang thüipu, ikha angkya long tuita ngaxchu omanman ma müntoxüi; ibu bakle atsun dao angkya changle.”

³Jisu Olip haxhua ma thungle ngopong ma, wangshembu huxsa ma chix hato süile ngui. Hwome atüi: “Ibu chemtue chang angkya hex ilaxle nang hüitu hia oshuk nguile hüikya münwan ang chempang chang angkya hex, kwom hama wünhüi.”

⁴Jisu-e hwom ang thüi: “Khünzai le ngolax, owaechu hünzom angat ang taxtom.

⁵Khünakbue ku mün ma hüilaxle khünaknu dyenle thüiüi: ‘Ku a Messaiah changpu!’

⁶Hünzome ozui ma tamchu tsailo to achax-azankya zing atatüi; ikoxlechu hünzom taxaban. Ijabu chang angkya jao; ibachu ibue oshuk nguiüna le münchang.

⁷Chaxwan tuita ata chaxwan füi azanüi; wangting tuitae ata wangting tingtaküi; pangnu khato wüi kaikuak saonu leüi ilaxlechu bütixe siüi.

⁸Ibu pangnu wüi naongün wokkak owang wangkya ningle changpu.

⁹“Ifüima khünaknue hünzom kopüi, ilaxle sikangün ang hia lang ang tomüi. Ku mün khoma hexle khünaknue hünzom thua anuüi.

¹⁰Iponge süchong tukuxe mongong danle toxüi; hwome tata khohangüi ilaxle tata thua anule tüiüi.

¹¹Ija füima othai ajebu huanuma lailaxle khünaknu dyenüi.

¹²Ile ochax tsaüi tamchu khünaknu süchong tukux ang mongkün dangle maxüi.

¹³Ikoxlechu oshuk kople shingmongle adukya khünakbue khosünkya ataküi.

¹⁴Ilaxle Zang Wangting bama ija Kaxho Müikya chaxwannu nok pangnu chito kaxkhi ang apuküi; ija füima tix oshuk hüiüi.

¹⁵“Danel ajepae akaxkya, ‘Nushix dongkya max angkya mix’ otsao nui ma ajongkya hünzome ngünüi” (ekya mixe naxtsing kox.)

¹⁶Ija pongma Jehudi ma asukyabu haxhua to zikle pao angkya changle.

¹⁷Homkho to asukya mixe chix mwotkat lax ang homkha to dong ang hanpak lax ngo angkya münchang.

¹⁸Zim-hax to asukya mixechu ma nyiza lax ang hom to wang ngo angkya oli münchang.

¹⁹Ija pongma wok ma nao tüikya hia tsomsip tankya naodom füikya honubue huanuma sikngün apongüi.

²⁰Hünzom zangwae tamchu nazak nyix kha zikle pao angkya chilai angkya kuxma Zang to joplax.

²¹Chemthüikoxle chaxwannu zingpong tokhange anyix kopkya bama ituk angkya sikngün ma akhole changüi; ija ningle chatle otuechu münchang toxüi.

²²Ikoxlechu Zange hanpak owüiole amox daoa; ile chichang thüikoxle, owachu ozün ma ngo angkya chitüise. Chixe kamle kopdaokya khünaknu hanpakmale Zange hanpak amox angkya changle.

²³Ifüima owawae: “Hulax, Messaiah ikhama tüile”, chichangba “Chix chukhama tüile”, le nang ang jangthüi: chix kax to taxong.

²⁴Chemthüikoxle othai Messaiah hia ajebu lwon angkya changle; jangtsuak thüiningle Zange zünle kopdaokyabu ngaxchu dyen angkya hanpakma hwome münwan chongkya hia ohünotün mwotbu mok angkya changle.

²⁵Apalax, kue ija manguiba wüi hünzom ang apuale thompu.

²⁶Chichangthüiba, khünaknue nang ang: Hulax, chuja faokha to chix a, le jangthüi: ikhato taxpao; chichangba: hulax, chix ikhama azwon ngole, le thüikoxchu ija to taxong.

²⁷Chemthüikoxle Khünak Hosa a handün tokhange hannop kople zangding pangnu khato nyanle zangchang ajepkya ningle nguiüi.

²⁸Müimang atüitüi khato okun kang afoxpu.

²⁹“Ija pongma sikngün füima thuile, zanghan nyankya zaküi; lyetnuechu münnyanüi; lyettsibu punle dütüi; ilaxle ding tokya tsakzongbu, aloxle achikachexüi.

³⁰Ifüima ding to Khünak Hosa münwan laiüi; ifüima chaxwannu angkya khünaknu sopüi; ilaxle hwome Khünak Hosa zangfwom ma tsakzong le tamchu fuazangle jukya ngünüi.

³¹Nyazong chongkya mütüi; chixe chix kaxtaimixbu chaxwannu ozong ali to apaoüi, ilaxle hwome, chixe kamle kopdaokyabu, ozong tuita makhange ata zong to lünle afoxüi.

³²“Tuita Fupsa püne hünzom ang kaxpan naxfa. Otue ija fupsa osong dongle chuiüihex, hünzome tsonu nguiüna le awan ang kople.

³³Ija ningle chemtue ibu changle hüikya hünzome ngünüihex, hanpak chwonünale hünzome tsing ang kopüi.

³⁴Ija akhax koplax! Athax pongma tüikya khünaknu komle mazi tanto wüi ibu pangnu changle hüiüi.

³⁵Ding hia hax kaile leüi; Ku kax a tuitachu kaile münleüi.

³⁶“Otu owan hia hanpak owaechu münawan, zangkangting tokya kaxtaimixbuechu chichangba Khünak Hosae ngaxchu münawan; Apa tatae awan wüi.

³⁷Khünak Hosa nguikya tuk machu Noa tsün to changdaokya ningle changüi.

³⁸Tinu mualyemüi thoma, Noa khua ma dongkya nyix kople, khünaknu a saxling le tamchu aju-asom le ngokya.

³⁹Tinu mualyemkyae hwom abakle chwotle mapao tanto, chempang le changpuix hwome chitsing. Khünak Hosa nguikya machu ile wüi changüi.

⁴⁰Ija pongma mixhuak anyie zangmo le asuüi; tuita paoüi, tuita a dantoxüi.

⁴¹Sheko anyie thomthu le asuüi; tuita dünüi, tuita a danle toxüi.

⁴²“Oja nyix Jowanpa ngui angkya hex hünzome chitsingkya daile mik-hingle ngolax.

⁴³Ija mong ma koplax; homkha angkya khünake ahux mix chemtue nguiüi hex awan koxle chix zole ngose ilaxle ahux mix daple dong ang chikoxse.

⁴⁴Idaile hünzomchu othuithuima atha anyemle ngolax, chemthüikoxle Khünak Hosa a nange chemtex chile ngopong khae nguiüi.

⁴⁵“Jangchangba mongong hia hwon-je füi tüikya da owa? Opunue mama dabu ang otu thütle süt fa angkya mwot koxle thomkya da a chix changpu.

⁴⁶Ija dae hopunu hom to nguikya thoma ija mwot alanle jangbang, chix ang mong chemtukux müiüi hex!

⁴⁷Otsingtsingma kue hünzom ang thüipu: Opunue ija da chak ma chix tuina komle danüi.

⁴⁸Ikoxle chix a tuita chisukya da jangchangba, chixe ma mongto zangwünüi: ‘Ku hopunu a chichatle ozulole ngo angkya changle!’

⁴⁹Ilaxle chixe hozuikhui dabu to fitmüi le changüi ilaxle jutok saxngat mixbu füi tomle saxling le changüi.

⁵⁰Ofüima ija hopunu chixe texle chile ngopong khae nguile hüiüi;

⁵¹Opunue chix texle akhixüi ilaxle chix ang künkux-mongkwombu süntswon ang tomüi. Ikhato chix sopkya tamchu wa azyakkya tüiüi.