Read Wancho Naga Mathi 25 Bible Online

Mathi 25 - Wancho Naga bible

Mathi 25

¹“Ija pongma Zang Wangting a ija ningle tüiüi: Hanpak tuita ma tuipa füi apong angkya hanpakma, wünti tikbu koplaxle laikya naochabu hwom bün tüikya.

²Hwom khama aga a ongatbu ikoxle aga a hwon füikyabu le changkya.

³Anganu hwom agae ma wüntik füi tomle wünti onüi chikop;

⁴ikoxle hwon füikya naocha hwom agae ma wünti tik füi tomle thua ma awang le wünti onüi kop.

⁵Tuipa ngui angkya tüle shen; mahüikya bama naochabu ang mikngüt hüile hwom jip.

⁶“Twomtinge akhongle nyak: ‘Tuipa ikhato tüile; nguilaxle chix füi aponglax!’

⁷Naocha hwom bün pangwüi zo ilaxle hwom wüntikbu achwon.

⁸Ipongma anganubu thome hozuinu hwom ang thüi: ‘Kwom angchu hünzom wünti muapong-muapong laxhüi; chemthüikoxle kwom wüntikbu pi maxüna!’

⁹Hwon füikya naochabue lan, ‘Otsingtsingma thüipu, kwom machu kem pangnu hanpakma okhonguile müntüi changa. Hangnui to chatlaxle hünzom hanpak shaklax.’

¹⁰Ikoxle angacha hwom bibi a wünti shak ang chat. Ile hwom chatngo tama tuipa nguile lop. Atha anyem le ngokya naocha hwom aga a tuipa füi tomle aju-asomkya püntut fongsüt ma hak ang dong, ilaxle ka hak.

¹¹“Ofüima naocha hwom aga chuwüi ikha alople ngui. ‘Opunu! Opunu! Kwomchu dong ang kox hüi’, le homtho tokhange hwom akhong.

¹²Ikoxle tuipae lanle thüi: ‘Otsingtsingma kue hünzom opang changkya hex müntsing.’”

¹³Ilaxle Jisu-e ashuk: “Hunga ngolax, chemthüikoxle hünzome otu hia hanpak münawan.

¹⁴“Ija pongma Zang Wangting a ile tüiüi: Khünak tuitae chix mixwün to paoüi ma, ma dabu nyak ilaxle chix tuina to hume angkya hwom ang mwot ahanle koxle tox.

¹⁵Chixe nok ang wüi mathüt mapanpan le kox; mixhuak tuita ang chixe ngun hajat aga kox; atat mix ang ngun hajat anyi kox; ilaxle ata mix ang ngun jat tuita le koxle tox ilaxle chix mixwün to pao.

¹⁶Ima wüi jat aga ngun kopkya mix pao; ija füi thalex, ilaxle mama hajat aga ngun alap.

¹⁷Ija ningle hajat anyi kopkya mixsünechu wüi hajat anyi onüi alai.

¹⁸Ikoxle jat tuita wüi kopkya mixsün pao, ilaxle hax tho üntoxle chixe hopunu ngun akhünle thom.

¹⁹“Hanpak zulole ngo füima ibu da hopupa chat. Chixe hwom füi akiak angkya hanpak lax.

²⁰Jat aga kopkya da sün ngui ilaxle mama onüi jat aga chuwüi koxle thüi: ‘Nange ku ang jat aga ngun koxpu; ikoxle hulax, ikhama kue thalex laxle kopkya olap ngun jat aga chuwüi tüile!’

²¹Opunue chix ang thüi: Müidaoa! Nang a müikya tamchu mongong tüikya da changle. Nang ang hidaole wüi koxkya ngun nange otwon manle twondaoa; idaile kue nang ang süluikya mwot twon ang faüi. Donglax ilaxle ku mongmüi süntswon ma womlax.

²²“Hajat anyi kopkya dachu wüi ngui ilaxle thüi: ‘Nange ku ang jat anyi ngun koxpu; hopunu, ikoxle hulax, ikhama kue thalex laxle kopkya olap hajat anyichu wüi tüile!’

²³Opunue chix ang thüi: ‘Müidaoa! Nang müikya tamchu mongong tüikya da changle. Nange ngun hidaole twon ang koxkya otwon manle twondaoa; idaile kue nang ang süluikya twon angkya mwot faüi. Oman, donglax ilaxle ku mongmüi süntswon ma womlax!’

²⁴“Ifüima hajat tuita ngun kopkya da nguilaxle thüi: ‘Opunu, kue nang a tüle mongkhüi khünak tuita le awanpu; nange chiküikya haxtok ma nange tsax zütpu; nange chisaikya khatokya tsaxtsang nange afoxpu.

²⁵Idaile ku a zalaxle pao üntoxle ija nang ngun hax to akhün le thompu. Hulax, ikhama nang kux a!’

²⁶“‘Nang a chimüikya da, nang a aopung; kue chithwomkya kha tokya kue tsaxzüt tamchu kue chisaikya kha tokya tsaxtsang kue afoxkya nange awan puix nyi?’ le hopunue atüi.

²⁷‘Nange ku ngun ngunthün-nui to koxle thomkya hex thüikox ngaxchu, kue alaikya zuma olap füi alai laxse.

²⁸Chix angkya ngun kopdao ilaxle jatbün füikya mix ang laxkox.

²⁹Chemthüikoxle tüikya mix ang aluile faüi ikoxle chix ang onüi tüi ang kopüi; ikoxchu chitüikya mix angkya, chix ma atüitüi ngaxchu komle paoüi.

³⁰Üntoxle laxli chitüikya da, hünzome chix homtho zangnak to awütdao; ikhato chix ang mikfi jenkya hia wa azyakkya tüiüi!’

³¹“Otue Khünak Hosa ma kaxtaimixbu füi wanghom ang achangle nguiüi hex, chix chongwang tüntong ma thungüi.

³²Chaxwannu angkya khünaknu pangnu chixe ma pomtho ma afox ang tomüi. Ifüima chun-nyetmixe zwon hia chun süikya ningle hwom othom anyi ang achangle ahanüi.

³³Chixe chunbu chix tsaxchi ma ilaxle zwonbu chix nongchi ma thomüi.

³⁴Ija ma wanghome ma tsaxchi angkyabu füi akaxüi: ‘Hünzom Apae mohimankyabu! Oman! Hüilax ilaxle chaxwannu zingpong tokhange wüi hünzom kux ang achwonle thomkya wangting koplax.

³⁵Ku wok ano pongma hünzome ku tuxpu; ti alan pongma ling angkya ti fapu; ku mixwün ang achangle ngopongma hünzome ku mahom to pongle koppu;

³⁶ohua ma ngokya ikoxle hünzome ku to awunle fapu; ku kakle ngopong ma hünzome atu-alitle hupu; kople thom pongma hünzome ku waipu!’

³⁷“Otsao khünakbue ipongma chix ang thüiüi: ‘Jowanpa, kwome nang woknuak ma otue ngün ilaxle tux chichangba ti alan pongma ling angkya ti koxdaopu?

³⁸Kwome nang mixwün ningle otue ngün ilaxle kwom hom to pongle koppu chichangba otue nang ohua ma ngopong ma kwome awunle koxdaopu?

³⁹Kwome nang kakle hia kople thomkya chemtue ngün üntoxle waidaopu?’

⁴⁰Wanghome chatle lanüi: ‘Otsingtsingma kue hünzom ang thüipu: ku tüinao hixkyabu to hünzome humekya a ku to humekya changpu!’

⁴¹“Ifüima chixe ma nongchi angkyabu füi akaxüi: ‘Hünzom a Zang thuak Zang zom koplax ngokyabu! Ku ha angkya atsaiün! Bao hia chix wangshembu hanpakma achwonle tüikya, tamchu chimax le chuale ngokya okham wünkha to paolax.

⁴²Ku ang wok ano pongma hünzome ku chitux; ti alan, ikoxlechu hünzome ku ang ti chialing.

⁴³Ku mixwün ang achangle ngopu ikoxle hünzome ku mahom ma pongle chikop; ohua ma ngopong ma hünzome ku to awunle chifa; ku kak pongma hia kople thom pongma hünzome ku to chihu chime!’

⁴⁴“Iponge hwome thüiüi: ‘Kwome otue nang woknua hia tilan ma tamchu mixwün ang achangle hia ohua ma ngokya ngünlaxle chifong le tüidaopu? Nang kakle hia kople thomkya kwome otue ngünlaxle chifong homle toxdaopu?’

⁴⁵Wanghome chatle hwom ang thüi: ‘Kue otsingtsing ma hünzom ang thüipu; Hünzome kutüi kunao hixkyabu to chifongkya a ku to chifongkya changpu!’

⁴⁶Ifüima hwom a oshuk chitüikya zothup nui to apaoüi; ikoxle otsaobu a oshuk chitüikya khüzün khato paoüi.”