Read Wancho Naga Mathi 26 Bible Online

Mathi 26 - Wancho Naga bible

Mathi 26

¹Ibu hwon-anokya pangnu tsuak füima, Jisu-e chix wangshembu ang thüi:

²“Hünzome awan ngopu, nyix anyi füima Kaitox Pangpwon tüiüi, üntoxle Khünak Hosa a pünsak ma takle lang ang koxüi.”

³Nguakhobu hia Jehudi nok lompabu Nguakho Kaifa hom ma afox;

⁴ilaxle hwome Jisu huxsa ma kop laxle lang angkya kat-azua.

⁵Hwome thüi: “Keme ile pangpwon lua ma chihwon angkya oli; ile changkoxle khünaknu khama tüle wuk laiüi.”

⁶Athax Bethani ma Jisu, angwonpa Simon hom ma ngoponge,

⁷ikhato chix hato, long thua ma tüle otha lixkya ongan müikya münga koplaxle mixcha tuita ngui, ilaxle chixe fongsaxle ngopong ma chix khang to pale kox.

⁸Wangshembue ija ngünkya zuma hwom mongto aduak laxle thüi: “Ija chem ang ashix-akhaxkya changkoxpu?

⁹Otha lixkya münga ija hang laxle ngun ma chitüi chinangbu ang wüi kang koxse.”

¹⁰Hwom zangwün awanlaxle Jisu-e thüi: “Hünzome ija mixcha to büthüikoxle tsa ngopu? She-e ku bama mokkya a amüikya changpu.

¹¹Chitüi chinangkyabu hünzom füi othuithuima ngo angkya changle, ikoxle ku a hünzom füi othuithuima ngo angkya chichang.

¹²Ija mixchae mokkya a ku tsangtsa akhünüi ma ongan müikyae pale achwonkya changpu.

¹³Athax ija mong ma koplax! Ojongpang to Kaxho Müikya apukle paoüi hex, ija chaxwan pangnu khato, ija mixchae mokkya mwot bama she texle atak ang wünüi.”

¹⁴Ifüima wangshem bün anyi kha angkya tuita Juda Iskariot le amünkya nguakhobu hato paolaxle akax,

¹⁵“Kue Jisu hünzom ang owüiole jangkoxba hünzome ku ang chem faüi?” Hwome jan ngun huak tsübün akiak laxle chix ang kox.

¹⁶Ija makhange Juda-e Jisu hwom chak to kox angkya bama oshua müikya to hule ngo.

¹⁷Twonkhax chiawonkya Anthut Pangpwon asuikya nyix wangshembu Jisu hato ngui ilaxle chix ma atüi: “Kwome nang hanpakma Kaitox Pangpwon fongsüt ojong khama achwon koxle müiüile texpu?”

¹⁸Chixe hwom ang thüi: “Tingnu ma mixhuak tuita hato paolax ilaxle chix ang thüilax: ‘Nwotmix-e thüile, Ku üntoxle ku wangshembue hüile ngokya Kaitox Pangpwon fong nang hom ma saxüi!’”

¹⁹Jisu-e akaxkya ningle wangshembue mok ilaxle Kaitox Pangpwon fongsüt achwon.

²⁰Han asongkya ma Jisu chix wangshembu füi fongsax ang thung.

²¹Fongsax le ngopong ma Jisu-e hwom ang thüi: “Kue hünzom ang thüipu, hünzom kha angkya mixhuak tuitae ku khohang angkya changle.”

²²Wangshembu ang mong huanuma ma ilaxle tsüilüile chix ma atüi: “Jowanpa, ija ku ang thüikya ning münchang hex nyi?”

²³Jisu-e hwom kax to lan: “Ku füi tomle khua tuita ma chix an somkya mixe ku khohang angkya changle.

²⁴Khünak Hosa a Otsao Lai kax ma tüikya ningle zilaxüi, ikoxchu Khünak Hosa khohang angkya mix a maxsax! Ija khünak zongma chix a chipux kox wüi müise dai!”

²⁵Khohang angkya mix Juda-e akax: “Nwotmix, otsingtsing ma ku la ang thüikya ning münchang hexnyi?” Jisu-e lan: “Nange akaxdaoa!”

²⁶Hwome saxle ngopongma Jisu-e an lax, jople münchong fa, ija akhix ilaxle chix wangshembu ang kox. Chixe thüi: “Koplax ilaxle saxlax, ija a ku müi changle.”

²⁷Ifüima chixe wansa kop, Zang mün achuak ilaxle ija hwom ang fa. Chixe thüi: “hünzom pangnue wüi ija linglax;

²⁸chemthüikoxle ija a Zang Tsaotsüt hozün changle tamchu khünaknue ochax thailak atak angkya hanpakma awütkya ku aji changle.

²⁹Kue hünzom ang thüipu: Apa Wangting to juzün maling tanto kue ija ju hünzom füi tamchatle münlingüi.”

³⁰Ifüima hwome tsai tuita ngao ilaxle laile Olip haxhua chito pao.

³¹Ifüima Jisu-e hwom ang thüi: “Aja hünzom pangnu afa le paoüi ma ku kutata dantox angkya changle, chemthüikoxle Otsao Lai ma akaxle: ‘Zange chun-nyetmix langüi, ilaxle othomkha angkya chunbu, afale pao ang tomüi.’

³²Ikoxlechu ku anaole zokya füima hünzom thoto wüi Galili to paoüi.”

³³Pitar thuile akaxle Jisu ang thüi: “Mamabue danle tox koxchu kue nang danle müntox!”

³⁴Jisu-e Pitar ang thüi: “Ija mong ma koplax; awün ohaüi thoto wüi nange ku münawan hex le othom azom ma tsaoüi!”

³⁵Pitar-e lan: “Nang füi tomle zi angkya laikoxchu kue nang müntsing hex le münthüi!” Wangshem mamabuechu ile wüi akax.

³⁶Ifüima Jisu-e wangshembu kop laxle Getseman le nyakkya khato pao; ilaxle chixe hwom ang thüi: “Ku chuja khama zangjop ang pao ang, hünzom ikhama ngobang.”

³⁷Chixe ma füi tomle Pitar hia Zebedi sasün nyi kop. Chix hato tüle künmax mongshankya hüi.

³⁸Ilaxle chixe hwom ang thüi: “Ku mong shunkyae ku thule amüt tang jao changle. Ikhama ngohüi tamchu ku füi tomle hunga ngohüi.”

³⁹Chix si-achale pao, hax to chix thün akhuple tswonle awüt, ilaxle zangjop: “Ku Apa! Tsuak angkya oli jangchangba, ku angkya ija sikngün wansa shongpao fa! Ikoxlechu ku mongtex ma chichangle nang mongtex ma wüi naxchang.”

⁴⁰Ifüima chix wangshembu hwom azom hato chat, ithoma hwom a jiple bang; ikoxle chixe Pitar ang thüi: “Büle Pitar, hünzome khonta azom ku füi tomle hunga ngo ang müntho hex nyi?

⁴¹Thwontsing to chidüt angkya hanpakma hunga ngolax ilaxlechu zangjoplax. Chasa ma mongtsule ikoxlechu tsangtsa ma zong müntüi changa.”

⁴²Anaolechu othom anyi lekya chix atsaile pao ilaxle zangjop: “Ku Apa! Kue maling-lingba ija wansa chipao tsuak angkya jangchang thünchu nang mongtex ma wüi naxchang!”

⁴³Chix anaole tamchatkya thomachu hwom jiple wüi nui; hwome hwom mik zamle thom ang chitho.

⁴⁴Anaolechu Jisu-e hwom dantoxlaxle pao ilaxle othom azom lekya machu wüi ami zexdaokya kax zexle zangjop.

⁴⁵Ifüima chix wangshembu hato chat ilaxle thüi: “Athaxchu hünzom jiple wüi ngotan hia? Hulax, ochax khünaknu tsakzong chak to Khünak Hosa dan angkya hanpak nguile hüidaoa.

⁴⁶Khaxa, ajongün! Kem paohax. Hulax, ku khohang angkya mix ikhama tüile.”

⁴⁷Ile chixe zangwünle ngopong ma wüi, Juda, owa wangshembu kha angkya tuita changkya hex, chix hüi. Nguakhobu hia Jehudi nok lompabue tsanle apaokya othom, pax hia pünthombu kop laxle chix füi tomle ngui.

⁴⁸Khohang angkya mixe othom ang münwan ile koxle thom: “Kue owa füi tun apongüi hex, chix a hünzome lomkya mix changüi. Chix koplax!”

⁴⁹Onui kopkya thuile chix Jisu hato hüi ilaxle thüi: “Nwotmix, nang füi mongsom naxtüi!” Ilaxle chixe Jisu füi tun apong.

⁵⁰Jisu-e lan: “Ija bama momlax, zuikhui!” Ifüima hwom hüilaxle Jisu kop üntoxle mongle khak.

⁵¹Jisu füi tomle ngokya kha angkya mixsün tuitae ma chang syet laxle Nguakho da ang ngokya mixsün tuita na suakle adüt.

⁵²Iponge Jisu-e chix ang thüi: “Nange chang züpak ma latdao! Chang twonkya khünak chang chak ma lam angkya changle.

⁵³Kue ku to asun angkya hanpakma Apa ma jukoxle chixe kaxtaimix bün anyi füi sülui le fa ang those le hünzome münawan hia?

⁵⁴Ikoxle ile jangchang thüikoxle ile chang angkya hexo lekya Otsao Lai kax chemle kotok to ngaiüi?”

⁵⁵Ilaxle Jisu-e othom füi akax: “Ku noktu kha tokya alaile awüt thomkya mix tukux, pünthom hia paxbu koplaxle hünzom ku kop ang nguipia? Nyixfo le ku Zangshwom-Hom ma hwon-ano le ngopu, ipongma hünzome ku chikop.

⁵⁶Ikoxlechu ibu pangnu a Otsao Lai ma ajele zale thomdaokya kax changle kotok to ngai angkya hanpakma ile changpu.” Ifüima wangshembu chix danle toxlaxle afale pao.

⁵⁷Wanlom nwotmixbu hia Jehudi nok lompabu afoxle ngokya kha, nguakho kaifa hom to, Jisu kopkyabue chix apüi.

⁵⁸Nguakho hwom nya-o kople Pitar-e Jisu man tole azui. Chix hommong kople donglaxle nyetmixbu füi tomle thung ilaxle chempang le changüi hex le hungo.

⁵⁹Nguakhobu hia Nguawangbue chix lang angkya hanpakma, chix bama thaikya kaxhux fekya atak angchale azong.

⁶⁰Züizüibue hüilaxle thaikya kaxhux fekyabu fakoxchu, hwome chix thaikya kha funtachu chiatak. Oshukma mixsün anyi hüi ilaxle ajongle akax,

⁶¹“Zangshwom-Hom pünlaxle nyix azom bama wüi zingle tsuaküile akaxkya mix a ija mixsün changpu.”

⁶²Nguakho ajong laxle Jisu füi akax: “Nang ma kaxhux fekyabu kax to lan angkya nang ma kax müntüi hex nyi?”

⁶³Ikoxlechu Jisu dangle ngo. Anaolechu Nguakhoe chix ang thüi: “Ozün ma tüikya Zang mün ma kue tsao sax le thüipu: Nang a Messaiah, Zang Hosa jangchangba kwom hama apua hüi.”

⁶⁴Jisu-e chix kax to lan: “Nange wüi akax dao ngünlaxle. Ikoxlechu kue hünzom pangnu ang thüipu: Hünzome athax makhange Khünak Hosa, Khünthak Zang tsaxchi ma ngolaxle, nguikya ding to zangfwom ma ngünüi.”

⁶⁵Nguakhoe ma nyi akyet laxle thüi: “Chixe Zang adakya kax akaxdaoa. Keme mama kaxkhi chem ang lomle ngoüi! Athax ngaxchu chixe Zang ajaokya kax hünzome atatdaoa.

⁶⁶Hünzome chemle texpu?” Hwome lan: “Chix a zi ang tomkox wüi asu le tüile.”

⁶⁷Ifüima hwome chix thün to thuak füi thuak ilaxle fit; üntoxle chix to wyenkyabue thüi:

⁶⁸“Messaiah, ajehu! Kwom hama nang to fitkya mix apua hüi!”

⁶⁹Pitar a khwa homtho to thungle tüikya. Ipongma Nguakho dacha ang ngokya shekosa chix hato hüilaxle thüi: “Nangchu wüi Galili nok, Jisu füi tomle ngokya mix changpu.”

⁷⁰Ikoxle hwom pangnu thüntho ma chixe münchangle lan. “Nange chem akax ngopuix, ija kue münawan”, le Pitar-e thüi.

⁷¹Ifüima chix a khwa ka fülom to achexle pao. Mama dacha shekosae chix ngünlaxle ikha angkya khünakbu hama akax: “Chixchu wüi Nazareth nok Jisu füi tomle ngokya mix changpu.”

⁷²Anaolechu Pitar-e münchangle lan ilaxle tsao: “Kue chuja mixsün owa changkya hex münawan.”

⁷³Noxta aba laxle ikhama ajongle ngokya khünakbu Pitar hato hüi ilaxle hwome thüi: “Nangchu wüi hwom kha angkya tuita changpu; chemthüikoxle nang kax dingdün makhange ngaidao khato.”

⁷⁴Ifüima Pitar-e tsao: “Kue kaxtsing akax ngokya chichang thüiningle Zange ku ang sikngün naxfa kox! Kue chix owa changkya hex ojao münawan!” Ifüima lüile O ha.

⁷⁵Ijama Pitar-e chix füi Jisu-e akaxkya: “Awün O haüi thoma wüi nange ku münawan le othom azom ma tsaoüi hexo”, le thüikya kax texle atak ilaxle chix laile paolaxle mong maxle sop.