Read Wancho Naga Mathi 27 Bible Online

Mathi 27 - Wancho Naga bible

Mathi 27

¹Anopning swome nguakhobu hia Jehudi nok lompabu komle athütlaxle Jisu lang angkya olom lom.

²Hwome chix to janbüi füi kha, ilaxle paole Gowarnor Pilat ang kox.

³Jisu khohangkya mixsün Juda-e chix mik amüt angkya katzua tsuak dao a le ngün; chix ang mong alüix ilaxle ngun fa tsübün koplaxle nguakhobu hia Jehudi nok lompabu hato ngui,

⁴ilaxle chixe thüi: “Thaikya chitüikya mix khohang laxle lang ang koxkya bama kue ochax lyendaoa.” Hwome lan: “Kwome ija paktik ngo angkya chem mwot tüi? Ija a nang mwot!”

⁵Juda-e Zangshwom-Hom ma ngun tswonle awüt toxlaxle ikha angkya laile pao; ofüima chix laile pao üntoxle fünle zi.

⁶Nguapa akhokyabue ija ngun tswon ilaxle thüi: “Ija a aji ngun changle idaile Zangshwom-Hom ngun khato thom angkya a kem wanlom ma achaxkya ang changüi.”

⁷Hwome zangwün azut tsuak füima ija ngun füi, püntüibu zukting ang lax ang tikjaomix hax shak.

⁸Ija khoma ija haxtok ang anyix ma lün le aji haxtok le nyakle.

⁹“Hwome ngun fa tsübün kop (Israel khünaknue chix mün to fahax le fünkya otha).

¹⁰Üntoxle Zange ku füi akaxkya ningle ija ngun a tikjaomix haxtok shak ang lax”, le Jeremia-e ajekya kax kotok to ngaile lai.

¹¹Jisu a Roman Gowarnor pomtho ma ajong. Chixe atüi: “Nang Jehudi nok wanghom hia?” Jisu-e lan: “Nange akaxdaoa!”

¹²Nguakhobu hia mixpa tüichongbue atüikya kax to chixe chemlechu chilan.

¹³Ija khoma Pitar-e thüi: “Hwome nang bama nang thaikyabu kaxkhi fale akaxkya nange atatchami?”

¹⁴Ikoxle Jisu-e kaxfa tuita ngaxchu lan ang chitsukya ngünlaxle Gowarnor abüt.

¹⁵Kaitox Pangpwon foto, kople thomkya khünak tuita, noknue jukya mix danle kox angkya Roman Gowarnor wanlom tüikya.

¹⁶Ija pongma kople thomkya khama noke awankya mixhuak tuita Jisu Barabba le amünkya mixsün tüikya.

¹⁷Idaile noknu asoxkya füima Pitar-e hwom ma atüi: “Jisu Barabba hia Jisu Khrista nyi khama kue opupu naxdan le hünzome texpu?”

¹⁸Jehudi nok pünpa-chongwangbue Jisu Khrista a chix ang owüiole koxdaoa le tsing; chemthüikoxle hwome chix to miktsak.

¹⁹Pilat kaxfün tüntong ma thungle tüiponge, chix kakonue chix hato kaxho tuita ahüi: “Ija otsao khünak to nange chemlechu taxmok; chemthüikoxle awün wünmang chito chix bama ku ang tüle sikngün daoa.”

²⁰Nguakhobu hia mixpa tüichongbue, Barabba danhüile thüi angkya ikoxle Jisu a lang hüile thüi angkya khünaknu angat.

²¹Ikoxlechu Gowarnor-e atüi: “Hünzom hanpakma kue ija nyi khama opupu naxdan le texpu?” Hwome lan: “Barabba wüi!”

²²Pitar-e atüi: “Jangchangba Jisu Khrista le nyakkya khünak füi kue chem moküi?” Hwom pangnu akhong: “Chix a pünsak ma takkox!”

²³Ikoxlechu Pitar-e atüi: “Chixe chem zia ama daopu?” Ifüima hwome tüle azaxle akhong: “Chix pünsak ma takkox!”

²⁴Pitar-e chix kax chem angchu chilaxle noknu wuk mix huanuma adün angkya changlaxle le ngünkya zuma, chixe ti muale lax ilaxle chak sole thüi: “Ija khünak zikya bama ku thaikya müntüi hexo! Ija a hünzome moklaxpu!”

²⁵Noknue lan: “Chix zikya khoma sikngün kwom hia kwom susabu hato naxngui kox!”

²⁶Ifüima Pitar-e hwom ang Barabba danle kox. Chixe Jisu to zu füi fit ang tom ilaxle pünsak ma takle lang angkya owüiole kox.

²⁷Ifüima Pilat süpahibue Jisu a Gowarnor hom to pao; chix thüntho ma akanle noknu afox.

²⁸Hwome chix nyi sik ilaxle nyikhike awunle kox.

²⁹Hwome kongbüi-zu akwon laxle zingkya hux khüsün chix khang ma asünle kox. Chix tsaxchi chak ma kaithox atwonle kox ilaxle chix pomthochi ma hüilaxle hwome ahuxle chix wanjai. Hwome thüi: “Jehudi nok wanghompa! Nang tsünlo le ngohüi!”

³⁰Hwome chix to thuak füi thuak, pünthom füi chix khang to chiet.

³¹Ile hwome chix wanjaikya ashuk füima nyikhik siklaxle chatle chix nyi wüi awunle kox üntoxle pünsak ma takle lang angkya hanpakma chix pao.

³²Hwom laile paopongma Sereni nok tokya mixsün tuita Simon le amünkya mix apong. Süpahibue Jisu pünsak pai angkya chix atsang.

³³Ilaxle hwom Golgotha (khangza hua) le nyakkya haxhua to ngui.

³⁴Ikhato hwome chix ang pünsi ti füi awutlaxle ling ang kox; ikoxle chixe chaile ano ilaxle chixe chiling.

³⁵Hwome chix pünsak ma tak; nantak laxle chix nyiza hwom bama ahanle lax.

³⁶Ilaxle hwom ikhama chix to hule ngo.

³⁷Chix khangkho ma hwome chix ajaokya kax IJA A JEHUDI NOK WANGHOM JESU le zalaxle apütle tox.

³⁸Ijama chichang-chizangle tüikya mixhuak anyi, tuita a chix tsaxchi ma tuita a chix nongchi male tak.

³⁹Le-zyenüi khünaknue Jisu ajao le akhuxle aho;

⁴⁰ilaxle thüi: “Nange Zangshwom-Hom pünlaxle nyix azom mong ma wüi zingtsuak angkya münchang hia? Nang Zang Hosa jangchangba pünsak angkya julax ilaxle ma kho alüile sünlax!”

⁴¹Ija lailaile wanlom nwotmixbu hia nguakhobu tamchu mixpa tüichongbue chix wanjaile akax:

⁴²“Chixe mik khosün ang tsuakle ikoxle ma khosün ang a müntho! Chix Israel nok wanghom münchang kox hia? Athax ile pünsak angkya jangju thüiningle keme chix to ongse!

⁴³Chixe Zang to ongle; chix ma Zang jangtüi thüiningle chixe naxazün koxa; chemthüikoxle chixe ma Zang Hosa changpule akaxle.”

⁴⁴Chix füi tomle takkya chichang-chizangkya mixsün nyie ngaxchu wüi ilailaile chix wanjai.

⁴⁵Tungto shene khonta azom zangfang pangnu khato haxshix zangnak.

⁴⁶Azom baji bato Jisu akhongle sop: Eloi, Eloi, Lema Sabakthani? Ija a: Ku Zang, Ku Zang, nange ku chem ang dantoxpu? le thüikya kax.

⁴⁷Ikhama ajongle ngokya züita khünake chix akhongkya zing atatlaxle thüi: “Chixe Elija nyak ngole!”

⁴⁸Hwom kha angkya tuita ziklaxle jali za apüi, ija jusik khato som, ilaxle kiatua tun ma la üntoxle chix ang aling ang azong.

⁴⁹Ikoxle züizüie thüi: “Taxmok, chix khosün ang Elija hüi angcha ang shonghuhax!”

⁵⁰Anaolechu wüi Jisu akhongle tamsop. Ija füima a chix zak shu.

⁵¹Ipongkhae Zangshwom-Hom atsyen le thomkya nyikhik okho tokhange chitong kople tanti makhange anyi ang achangle kyetle pao. Chaxwannu tüle sile alox ilaxle longbu file pao.

⁵²Zuk dap laxle ziünkya otsao khünakbu huanuma azangle zo.

⁵³Hwome zuk kha danle tox ilaxle chix chatle zokya füima hwom Otsao Tingnu to ngui, ikhato khünaknue hwom ngün.

⁵⁴Süpahi akhokya hia chix füi tomle Jisu nyele ngokya mama süpahibue bütix sikya hia idule changkyabu ngünlaxle abanlaxle thüi: “Chix a otsingtsing ma Zang Hosa wüi changdaoa!”

⁵⁵Galili tokhange Jisu füito azuile hüilaxle chix to fongle hüikya shekobu opange tsailo tokhange hule ngo, hwomchu wüi ikhato asukya.

⁵⁶Hwom khama Meri Magdalen, Jakop hia Jusep nyi honu Meri tamchu Zebedi sasün hwom tamchu honu le ikhama tüikya.

⁵⁷Han asong füima, saxpu luawang tuita Arimathia nok tokya ngui; chix mün Jusep changkya, ilaxle chixchu wüi Jisu füizuimix khama tuita changkya.

⁵⁸Chix Pilat ngokya khato ngui ilaxle chix ma Jisu mang jule lax. Pitar-e Jisu mang Jusep ang kox angkya kaxkox.

⁵⁹Idaile Jusep-e ija ajo ilaxle nyidax hozün füi lop;

⁶⁰ilaxle chixe chwon-chwonle long thole alaikya chix zukting ma ija dan. Ifüima longnu chongkya füi ija zuk ka hakle toxlaxle chix pao.

⁶¹Meri Magdalen hia mama Meri hwom zuk chito hule ikhama ajongle tüikya.

⁶²Ija füinyix wüi nguakhobu hia farisibu Pilat füi apong.

⁶³Hwome thüi: “Wanghom, kwome mong ma thomle, ija khualop mixe chix mazi tanto, chix zi füima nyix azom lekya to chatle azangle zo angkya changle, le akaxkya changpu!

⁶⁴Zuk to nguilaxle chix wangshembue chix mang ahuxle paolaxle khünaknu hama ‘Chix pi anaole zoüna’ le jang apuk thüikoxle chimüi angkya daile hanpak nyix azom kople kwome ija zuk nye ang koxhüi; chemthüikoxle ami pongwang ma dyen daokya füi izuma dyenkya wüi sümakya ang achang angkya changle.”

⁶⁵Pitar-e thüi: “Nyetmix laxlax ilaxle zuk müile nyelax.”

⁶⁶Ifüima hwom pao ilaxle zuk ka hakkya long ma münwan tox ilaxle nyet mix toxle zuk sün angkya mwot mok.