Read Wancho Naga Mathi 6 Bible Online

Mathi 6 - Wancho Naga bible

Mathi 6

¹“Khünake naxngün le hwom miksho ma otsao mwot chimok angkya bama hünzom khünlax. Iningkya mwot hünzome noknu thüntho ma mokle jangchang thüiningle, zangkangting tokya hünzom Hopae fa angkya hingho hünzom ang chemchu müntüi.

²“Chitüi chinang mix to fongle jali kox-zun pongma, künkux mongkwombue Zangshwom nui to hia noknu tu ma hwonkya ningle, achenle taxaho. Hwome ile mokkya a khünaknue hwom naxachuak ang mokpu. Kue hünzom füi kaxshing kople akaxpu, hwome ma hingho komle kopdaoa.

³Idaile nange tö koxkya zuma, nang tsaxchi chake chem mokpuix ija nongchi chak ang awan ang taxtom.

⁴Ile changkoxle tix, nange tö fakya, huxsa mwot ang achangüi. Hopa owae ija nange mokkya huxsa mwot ngünle ngolaxpuix, chixe nang ang otia ma hingho faüi.

⁵“Hünzome zangjop pongma, künkux mongkwombu ningle taxchang; chemthüikoxle hwome khünak noknue naxngün ang sinagok hia lompongbu to jopse tsule. Kue hünzom füi otsingtsing akaxpu; hwome otha okhongui le kopdaoa.

⁶Ikoxle otue hünzome zangjopüi hex, nang nuithongdua to donglax, nui ka haklax, ilaxle mike chingünkya Hopa hama joplax. Huxsa ma mokkya mwot ngünkya Hopae nang to mohimanüi.

⁷“Zangjop pongma mixnokbue hwonkya ningle, kaxbi ngaoba chatwüi chatle taxzex ngozi; ile ozulole jopkoxle tix Zange atat angkya changle le hwome thütle.

⁸Hünzom a hwom ningle taxchang; chemthüikoxle hünzome chix ma maju tanto wüi, hünzom hanpakma laxli komle Jowanpa-e awanlaxle ngopu.

⁹Idaile hünzome Zang ile joplax: ‘Zangkangting to ngokya Apa; Nang otsao mün naxachuak;

¹⁰Nang wangting hüi ang laxkox; Zangkangting to tüikya ningle; Chaxwannu machu tsuak ang tomkox;

¹¹Kwome lomkya süt, anyix kwom ang laxhüi;

¹²kwome mix ang thailak tüikya ningle; Kwom angchu thailak tüi ang tomhüi;

¹³Chongkya thwongtsing to kwom taxahüi; Ikoxle omalom tokya kwom sünle thom hüi.’

¹⁴“Chemthüikoxle hünzome mix ochax thailak jangtüiba, zangkangting tokya kem Hopae hünzom angchu thailak kox angkya changle.

¹⁵Ikoxle hünzome mix ochax thailak chitüi thüikoxle Jowanpa-e hünzom ochaxchu thailak müntüiüi.

¹⁶“Tamchu otue hünzome chisax-chilingle atsaole zangjopkya hanpak laxüi hex, künkux-mongkwombu ningle thün ma mongma ahole taxchang. Hwome chisax-chilingle atsao alangle zangjop hanpak laxkya mixe naxngünle, ibue ma thün ma zamak tüikya pak chitik le ahole. Kue hünzom hama otsingtsing akaxpu: hwome ma hinghoho kopdaoa.

¹⁷Ikoxle nange chisax-chilingle zangjopkya hanpak laxkya zuma, mix hato nang atsao alangkya ngün ang taxtom; thünmüt chaktsux tamchu khoshit nasaile changlax.

¹⁸Mixe owaechu chiawanüi ikoxlechu mike chingün homle ngokya Zange ngün angkya hanpakma ile moklax. Ile nange huxsa ma mokle ngokya ngünkya Zange nang to mohimanüi.

¹⁹“Ojong khato chonge sax, siake si tamchu ahux mixe pao ang tsuakle tüipuix, iningkya chaxwannu ma matui mana taxathün.

²⁰Itülüi, ojong khato chong hia siake ama ang chitho, daple donglaxle ahuxle pao ang chitho, iningkya zangkangting to nang hanpakma tuina athünlax.

²¹Chemthüikoxle ojong khato nang tuina tüipuix, nang mongchu ikhato tüile.

²²“Mik a tsangtsa zongto tuita zangngai ningle changpu. Nang mik müile jangngoba, nang tsangtsa pangnu kha zangngai ma ngoüi.

²³Ikoxle nang ang mik chimüiba, nang tsangtsa pangnu kha wüi zangnak to ngoüi; ile nang mong ma tüikya zangngai zangnak tukle jangngo thüikoxle ija zangnak otukuxkya zadün tuita hex?

²⁴“Owachu hopunu anyi da ang ngo ang müntsuak. Ile changkoxle chixe tuita thua anu ikoxle tuita to a mongkünle changüi. Chixe tuita kax ma laxle tüiüi ikoxle ata kax ma a chilaxle changüi. Hünzome Zang hia Ngun pangnyi thotha ang müntho angkya changle.

²⁵“Idaile kue hünzom ang thüipu: Chem saxüi chichangba chem lingüi le khüzün hanpakma chichangba chem awunüihex le taxaban. Süt füi khüzün wüi tamchu tuina füi tsangtsa wüi tüichongpa changpu.

²⁶Ding ma pile ngokya osabu to hulax; hwome chimo-chizang; chizüt chichangba pung ma chiathün; ikoxlechu zangkangting tokya Hopae hwom tuxle. Ija osabu füi hünzom wüi achongkya münchang lea?

²⁷Hünzom khama owawa ile abüt abankyae ma tsün sokta ngaxchu alwot ang tho angchahex?

²⁸“Nyiza khoma hünzom büthüikoxle aban? Fao angkya maipua chemle tsongpuix ito hulax; hwome chemchu chimok chichangba ma hanpakma nyi chitak;

²⁹Ikoxlechu kue hünzom ang thüipu: Solomon-e ngaxchu chix ngun chix syen tüinangkya füi ibu kha angkya tuita ningle ngaxchu aza apuale kox ang chitho.

³⁰Ikoxchu, O hidaole wüi ongkyabu; fao angkya fum oja anyix tüiwüi, ikoxle ngainyix a wünkha to zokdao angkya hex, ibu ang ngaxchu ibibile Zange aza-apuale koxkya jangchang thüikoxle, chixe ibu to nüile hünzom ang aza-apuale münfa puix nyi?

³¹“Idaile kwome chem saxüi chichangba chem lingüi chichangba chem awunüi le zangwünle khosam ang taxsüt.

³²Songsaribue a ibu pangwüi lomle; ikoxle zangkangting tokya Hopae ibu pangwüi hünzom hanpak ang laxli changpule awanle.

³³Itülüi thüikox hünzome pongwang ma chix wangting hia chix otsao shonglomlax; ifüima ibu pangnu chixe hünzom ang kox angkya changle.

³⁴Idaile ngainyixkya hanpakma taxaban. Nyixfo le thang angkya tüingoünkya to chatle janbo lang angkya mwot münchang.