Read Wancho Naga Mathi 7 Bible Online

Mathi 7 - Wancho Naga bible

Mathi 7

¹“Zange hünzom ang kaxfün chifa angkya kuxma, hünzome mix ang kaxfün taxfa;

²büthüikoxle chem kaxfün füi nange mix kaxfün puix, ija kaxfün füi Zange nang bama kaxfün faüi tamchu hünzome mix zongto twonkya wanlombu Zange hünzom hanpakma twon angkya changle.

³Jangchang thüiba hünzome ma mik ma tüikya püntho mo a ojao chiwün üntoxle ma tüinao thün ma tüikya zamak to mix ning chemto hupu?

⁴Nang mik ma püntho thomlaxle: ‘Kue nang mik angkya zamak awüt fang’, le chix füi büthüikya to akax ang tho?

⁵Nang a künkux-mongkwom changle; pongwang ma ija nang mik angkya püntho mo shongwün koplax ifüima tix hüntüinao mik angkya zamak awüt ang tsingle ngün ang thoüi.

⁶“Hibu ang tsaokya bwot taxkox; aküi laxle hwome nang to shingüi. Hünzome liknu wak thüntho to taxawüt; hwome ijabu to ocha füi nak angkya changle.

⁷“Julax, ikoxletix ija hünzom ang koxüi; lomlax ikoxletix ija hünzome ataküi; tamchu honglax ikoxletix ija hünzom ang daple koxüi.

⁸Chemthüikoxle ajuju ang kox angkya changle; alomlome atak angkya changle; tamchu ahonghong ang ka daple fa angkya changle.

⁹Chichangba masae an jukoxle chix ang long kox angkya hopa hwom hünzom khama opang tüi?

¹⁰Chichang thüiba nyax jukoxle nange pu koxüi hia?

¹¹Hünzom chimüikoxle ngaxchu masu masa ang müikya jali kox ang awanle jangchang thüiba, zangkangting to ngokya hünzom Hopae, chix ma ajuju ang amüimüi kox ang münawanüi hia?

¹²“Ijadaile ma to mixe chemle hwonkya ma zongma müipuix ija ningle hünzomechu wüi hwom ang mokle laxkox.

¹³“Hitkya pan makhange lelax, chemthüikoxle omüt lom to aliet angkya pan a jakasai le ilaxle lomchu khaole tüile tamchu ichito le angkya mix a huanuma tüile.

¹⁴Ikoxle khüzün lom to le angkya lom a tangthole tamchu hitle tüile, idaile ija atak angkya mix a hidaole wüi.

¹⁵“Othai ajebu, opange hünzom hato chun khwone khwop laxle hüipuix, ibu hanpakma khünzai lax; chemthüikoxle hwom kün-mong a tuita shixkya shwon ningle tüile.

¹⁶Hwom mwot makhange hünzome hwom awan ang thoüi. Kongbüi-zu ma grep münziak tamchu khahux pün ma fupsa münziak;

¹⁷Ija lailaile opün wan müikya ma oziak müile ziaküi;

¹⁸Oponu owan müikya pün ma oziak male chiziaküi ikoxle owan chimüikya pün ma oziak müile chiziak angkya changle.

¹⁹Pün ojae oziak müile chiziak puix ija a daklaxle wünkha to awütle.

²⁰Ija ningle hwom mwot makhange hünzome othai ajebu thwon lop ang thoüi.

²¹“Ku ang Jowanpa le anyaknyak pangwüi Zangkho Wangting to ngui ang thoüile münchang; ikoxle ikha a, zangkangting tokya Apa mongtex ma saxmokkya mixe tix atak angkya onui changle.

²²Kaxfün nyix nguikya zuma, khünakbue ku ang thüiüi: ‘O Jowanpa, O Jowanpa! kwome nang mün ma münaje dai hia? Nang mün ma haxshix jwonle münapao dai hia?’ Nang mün ma kwome ohünotün mwotbu münmok dai hia?

²³Ija ma kue hwom ang ngaile akaxüi: ‘Kue hünzom otuechu müntsing tox; hünzom a owa mwot mokle ngokyabu changkya? Hünzom ku ha angkya atsaiün!’

²⁴“Idaile opange ibu ku kax atat laxpuix, chix a tuita longtok ma hom zingkya je füikya mixsün ningle changpu.

²⁵Thokle zangwat, tichen hüi, ilaxle zangcheie ija hom to zongle thu; ikoxlechu long tok ma zingkya hom changkoxle ija chitsun.

²⁶“Ikoxlechu ku kax ibu atat koxlechu chitwonkyabu a sak tok ma hom zingkya angapa ningle changpu.

²⁷Thokle zangwat, tichen hüilaxle zangcheie ija hom to zongle thu; ija ma ija hom tsunle pao. Ija tsunkya a tüle zadün le changkya.”

²⁸Otue Jisu-e ibu apuakya ashuk; chix hwon-nwot atatlaxle khünaknu ang khosam.

²⁹Chixe wanlom nwotmixbu ningle chichang homtoxle otsak ozong füi anwot-ano.