Read Wancho Naga Mathi 9 Bible Online

Mathi 9 - Wancho Naga bible

Mathi 9

¹Ifüima chix khua ma ngale tachi to tale hwom tingkhua tongui.

²Züizüi khünake faile kakkya mix lya ma pai le chix hato apüi. Ijama Jisu-e hwom mongong ngünlaxle, faile kakkya mixsün füi akax: “Naosa, mong alüixlax, nang ochax thailak koxdaoa.”

³Ijama züizüi wanlom nwotmixbue: “ija a chixe Zang adakya changpu”, le tata füi akax.

⁴Jisu-e hwom mongjang awanlaxle thüi: “Hünzome ma mongto iningkya oma büthüikoxle ajang ang koxpu?

⁵‘Nang ochax thailak fadaoa’, le thüi angkya füi ‘zolax üntoxle ahamlax’, le thüi angkya wüi chwonpai hia?

⁶Ikoxlechu Khünak Hosa ma ochax thailak fatsuak angkya tsakzong tüile le hünzom hato angaile ahoüi.” Idaile chixe faile kak ngokya mixsün ang thüi: “Zolax, nang lya koplax ilaxle hom to chatlax.”

⁷Ijama wüi zo ilaxle ija mixsün mahom to chat.

⁸Ikoxle ija ngünkya zuma khünaknu othome, hwom zalaxle khünak ang ile tsakzong koxkya Zang ang münchong fa.

⁹Ikha dantoxlaxle achexle chix lom ma ahamle ngopongma, Jisu-e Mathi le amünkya mixsün tuita, chix pa ma thungle ngokya ngün. Jisu-e chix ang thüi: “Ku füito oman.” Ija ma Mathi ajong laxle chix füito azui.

¹⁰Ifüima Mathi hom ma, fongsax ang thungle ngopongma, mama süisai mixbuchu wüi hüi üntoxle Jisu hia chix wangshembu füi tomle fongsüt ma wom.

¹¹Ija ngünlaxle farisibue chix wangshembu ma atüi: “Hünzom nwotmixe süisai mixbu hia ochax khünakbu füi tomle fong büthüikoxle saxpu?”

¹²Ija atatlaxle Jisu-e lan: “Kak-hu-mix a müimüi zangngaile ngokyabu hanpak münchang, chix a kakmixbu hanpakma laxli changpu.

¹³Hünzom paolax ilaxle: ‘Kue tö koxkya chichangle chingcha laxse texpu’, le thüikya Zang Kax awanle koplax. Ku a, otsao khünakbu chichangle ochax khünakbu se-lom ang nguipu.”

¹⁴Iponge Juhan wangshembue chix hato hüilaxle thüi: “Kwome tamchu farisibue onoxnox to atsao alangle zangjop hanpak laxpu, ikoxle nang wangshembue atsao alangle chijop, ija a büthüikoxle?”

¹⁵Jisu-e hwom ang thüi: “Hwom füi tuipa ngokya kople, aju-asomkya to hak ang nguikya zuikhuibu sople ngoüi hia? Ikoxlechu hwom kha angkya tuipa pao angkya hanpak nyixta hüiüi, ifüima hwomechu wüi ile atsao alangle zangjop hanpak laxüi.

¹⁶“Nyiza hozang to owaechu hozün füi münthap, chemthüikoxle thapkya nyizün achikkya zuma otua atsyen le süchongle mix akyetüi.

¹⁷Tamchu khünake ju odom müikhwon nyitsong hozang ma münthom. Ile changkoxle müikhwon nyitsong chaoüi; ijama ju thokle awütüi ilaxle müikhwon nyitsongchu amaüi. Idaile khünake judom müikhwon nyitsong hozün ma thomle; ile changkoxle pangnyi wüi müile ngoüi.”

¹⁸Chixe hwom hama ibu akaxle ngopongma alixachong tuita nguilaxle chix tong shwomle akax: “Ku sacha athax ile zile paoüna; ikoxlechu nang nguilaxle she to jangtwon thüiningle she azangle zo angkya changle.”

¹⁹Ijama Jisu ajong üntoxle chix wangshembu kop laxle ija mixsün füito pao.

²⁰Zangbün anyi kople aji paole kak ngokya mixcha tuita Jisu nuakfüifüi le azui ilaxle chix nyitua to twon.

²¹Chemthüikoxle she-e mongto ile thüt: “She-e chix nyitua to lyet ang thüingaxchu jangkop thüiningle she kak müiüi.”

²²Ikoxle Jisu-e aküile hulaxle akax: “Ku sacha, mongchonglax, nang mongonge nang kak amüidaoa.” Ija ma wüi ija mixcha kak müi.

²³Ifüima Jisu ija alixachong hom to ngui, ijama chixe büihong samthu le hia sop-jua le ngokyabu ngün.

²⁴Chixe hwom ang thüi: “Nui shongshan hüi, chemthüikoxle naosa a zikya münchang, jip wüi.” Ikoxle hwom pange wüi chix chanyi.

²⁵Ikoxlechu khünaknu acha füima, chix dong ilaxle chak ma twonlaxle ija naosa azwot.

²⁶Ija bama kax pangnu chito azingle wünle pu.

²⁷Jisu ikha angkya laile pao ngopongma, mikduak mix mixsün anyi chix füifüile azuile hüilaxle “Dawid Hosa! Kukhi to ching sücha hüi!”, le akhong.

²⁸Ilaxle chix hom mongto dongkya zumachu wüi ija mikduak nyi chix hato hüi. Ijama Jisu-e hokhi ang thüi: “Kue ija mok ang thoüile hünkhie ongpia?” Okhie chix ang thüi: “Ongpu, Jowanpa!”

²⁹Ijama chixe hokhi mik to twon ilaxle thüi: “Hünkhie ongkya ningle naxchang fa.” Ifüi tomle hokhi ang mik dap.

³⁰Ifüima Jisu-e hokhi ang kaxshing kople akax: “Mong ma koplax! Owawa hamachu taxwün!”

³¹Ikoxlechu hokhie paolaxle chix achuakle ija bama pangnu khato apuk.

³²Ilaxle hwom laile paokya zuma, haxshix chasae kople thomkya kaxux mix khünakbue chix hato apüi.

³³Ija haxshix chasa jwonle apaokya zuma, kaxux mixe akax ang tho. Ikhoma khünaknue abüt laxle thüi: “Israel haxtok ma ija ningkya ongaichu mangünkya!”

³⁴Ikoxlechu farisibue thüi: “Chix ang haxshix chasa jwonle apao angkya zong ija a bao wanghome koxkya changle.”

³⁵Ifüima Jisu a tingnu noksa pangnu khato ahamle, sinagokbu to hwon-anole, Zang Wangting bama kaxho apuk ilaxle kaklak jojüikyabu amüile aham.

³⁶Khünak othomnu ngünkya zuma chixe hwom to chingchale thüt; chemthüikoxle nyet mix chitüikya chunbu ningle hwom chiakle ngo.

³⁷Idaile chixe wangshembu füi akax: “Tsax atu angkya huanuma ikoxle ija züt angkya mwotmok mix a muale wüi.

³⁸Idaile tsax atu angkya bama haxtok hopupa ang mwot mok mix akat hüile joplax.”