Read Wancho Naga Mark 1 Bible Online

Mark 1 - Wancho Naga bible

Mark 1

¹Kaxho Müikya ija a Zang Hosa Jisu Khrista bama changpu.

²Ija a Isaia ajepae zale toxkya ningle chang: “Zange thüi: ‘Kue, nang thoma, nang lom atangle zingnui ang, Ku kaxho mix tuita apaoüi.

³Mixhuak tuita faokha to akhong ngole: Jowanpa lomtang achwonlax; chix lyet-lom tangthole zingkox!’”

⁴“Hünzom ochaxbu tokya mong chatlax ilaxle baptilax, ile changkoxle Zange hünzom ochaxbu thailak faüi”, le khünaknu hama apuk-apuale tamchu baptile koxle Juhan faokha to ngai.

⁵Jehudi chaxwan hia Jerusalem angkya khünaknu huanuma chix kax apa ang Juhan hato ngui. Hwome hwom ochaxbu ngai, üntoxle chixe hwom Jordan shua ma baptile kox.

⁶Juhan-e Ut mun nyi awun, üntoxle müikhwon züpak chix khiadax ma apak; ilaxle chixe fao naxti hia züfiakbu sax.

⁷Chixe khünak hato khuapule akax: “Ku füi süchongkya mix tuita ku füima hüile tüile. Aku laxle zu dale chix chisox sukle fa angkya ngaxchu kuma ojao münasu.

⁸Kue hünzom ti füi baptile fapu ikoxle chixe hünzom Otsao Chasa ma baptile koxüi.”

⁹Aluile chingo homtoxle Galili chaxwan ma tüikya Nazareth nok angkya Jisu ngui ilaxle Juhan chak makhange Jordan ma bapti lax.

¹⁰Jisu tikha tokya laikya füi tomle zangding ka dapkya tamchu Chasa osu ningle julaxle chix khangkho ma paxkya ngün.

¹¹Ipongkhae dingchi tokya kaxzing ile akax: “Nang a kue mongkünkya Ku Sasün changpu! Nang füi ku mongzom müipu.”

¹²Ifüima lüile Chasae chix faokha to zunle pao.

¹³Chix faokha to bao thwontsing ma nyix punyi nui; fao müibuchu wüi tüikya; ikoxlechu kaxtaimixbu hüilaxle chix to hume.

¹⁴Juhan kun to shokya füima, Jisu Galili to ngui ilaxle Zang Wangting bama Kaxho Müikya apuk.

¹⁵Üntoxle chixe thüi: “Chaxwan zanghan nguile hüiüna ilaxle Zang Wangting a chaknam ma tüile; hünzom ma ochaxbu tokya mong chatlax ilaxle Kaxho müikya to onglax!”

¹⁶Jisu Galili Shinthuk-titung kax fole aham ngopong ma, nyak kop mix anyi, Simon hia honao Andriw nyi, tinu khato sha füi nyax kople ngokya ngün.

¹⁷Jisu-e hokhi ang thüi: “Ku füito oman, kue hünkhi hama khünak kop angkya anole fafang.”

¹⁸Ima wüi hokhie shabu dantox, üntoxle chix füito azui.

¹⁹Ikha angkya siatsaile paokya füima chixe chatlechu Zebedi sasün nyi, Jakop hia Juhan hokhi khua ding ma sha saile ngokya ngün.

²⁰Ngünkya thuile chixe hokhi nyak; üntoxle hokhie hopa Zebedi, hingchak koxle thomkya dabu füi tomle khua ma tox, ilaxle Jisu füito azui.

²¹Jisu üntoxle chix wangshembu Kaparnaum to pao; ilaxle ofüi angkya nazak nyix tangthole Sinagok to ngui üntoxle hwon-ano.

²²Chix hwon-nwot khoma ija atatkyabu ang khosam, chemthüikoxle chixe wanlom tsingpabu ningle chichangle tsak-zong füi hwon-ano.

²³Ijaponge Sinagok ma haxshix chasa füikya khünak tuita ngui; ilaxle ija khünak awao.

²⁴Chixe thüi: “Kwom tata danhüi, nang füi kwom ang chem mwot tüikya, nang Nazareth nok Jisu? Nang ikhato kwom amüt ang hüipia? Nang owa hex kue awanle: Nang a Zang tokya Otsao changpu!”

²⁵Ikoxle Jisu-e chix to sale thüi: “Nang dangün ilaxle chix angkya laiün!”

²⁶Haxshix chasae ija mixsün to zongle si, ilaxle awaole sople chix angkya laile pao.

²⁷Khünaknu huanuma abüt ilaxle tata ma atüi: “Ija chemli hex? ija a li tuita hozün hwon-nwot hia? Chemthüikoxle ija mixsün ma haxshix chasabu ang kaxkox angkya zongchu tüile, ilaxle ibue chix kax ma laxle.”

²⁸Idaile Galili tuitui pangnu khato wüi Jisu achuakle wünkya zangwün akhang le pu.

²⁹Jisu hia chix wangshembu, Jakop hia Juhan nyichu wüi womle, Sinagok angkya lai ilaxle Simon hia Andriw hokhi hom to tangthole ngui.

³⁰Iponge Simon honyenu tundün kak kakle lya ma jiple tüikya. Chix nguikya füi tomle hwome she bama chix hama wün.

³¹Chix she hato hüilaxle she to chak ma sietle she azwot. Ima wüi thuile tundüne she dan, üntoxle she-e hwom to hume.

³²Üntoxle hansonge zanghan düt füima, hwome kaklak füikya khünakbu tamchu haxshix chasa füikyabu le chix hato tüle apüi.

³³Tingnu angkya khünaknu nok wüi ija homtho ma awangle asox.

³⁴Malili kaklak füikya khünakbu Jisu-e amüi ilaxle haxshix chasabu jwonle apao. Chixe haxshix chasabu ang kaxfa tuitachu akax ang chitom, chemthüikoxle hwome chix owa hex ija awanle ngo.

³⁵Ifüinop huazunge, zang mangaiba wüi zolaxle chix ija hom angkya laile pao ilaxle mix zing chiatatkya khato tingnu pan kaile paolaxle ikhato zangjop.

³⁶Simon hia chix füi tüikyabue chix lomle pao,

³⁷ilaxle otue hwome chix atakpuix, hwome thüi: “Pangnue nang lomle ngole.”

³⁸Ikoxlechu Jisu-e lan: “Ikhama ngokya kem a mama tingsho to pao angkya tüile. Kue hwom hamachu hwon-ano angkya changle, chemthüikoxle ija hanpakmale ku nguipu.”

³⁹Idaile sinagokbu to hwon-ano üntoxle haxshix chasabu jwonle apao le chix Galili pangkha towüi aham.

⁴⁰Ngwon kak füikya mixsün tuita Jisu hato hüilaxle chikux athong le akhux ilaxle chix ma chingcha jule akax: “Nang mong jangtsu thüiba ku amüihüi.”

⁴¹Jisu-e chingchale bang ilaxle chix chak thui, chix to po, ilaxle chix ang thüi: “Ku mongtsule, nang müiün!”

⁴²Chix kax füi tomle, ija mixsün angkya ngwon kak momle atsaile pao ilaxle chix müi.

⁴³Ifüima kaxshing kople Jisu-e chix füi ibu akaxlaxle chix momle chat ang tom:

⁴⁴“Hulax, nange mix hama chemlechu taxwün ikoxle tangthole nguapa hato paolax ilaxle chixe nang to thwonle naxano; ifüima nang owüiole müiüna le khünaknu hato aho angkya kuxma, Mosa wanlom ma tüikya ningle zomzingle tö laxkox.”

⁴⁵Ikoxle ija mixsüne paolaxle pangnu khato ija bama apuk ang süt; ingaxchu Jisu tingnu to noke ngünle nop ang chimüitang le chixe onüimix apuk. Ikhoma chix ahuakle dangkya kha onuk to ngo, ilaxle pangnuchi tokya khünaknu chix hato ngui.