Read Wancho Naga Mark 10 Bible Online

Mark 10 - Wancho Naga bible

Mark 10

¹Ifüima chix ikha angkya achexle Jehudi longzipong to ngui ilaxle Jordan shuanu ta. Tamchatlechu khünaknu othom chix hato asox ilaxle jao angkya ningle chixe hwom hama hwon-ano.

²Züizüi farisibu chix hato hüilaxle tsünle atüi: “Lüka tuitae ma kakonu apao angkya wanlom ma chitüitüi puix?”

³Chixe hwom ma anongle atüi: “Mosa-e hünzom ang wanlom chemle fapuix le?”

⁴Hwome lan: “Afan angkya laiza fa laxle afan angkya wanlom Mosa-e kwom ang fale.”

⁵Jisu-e hwom ang thüi: “Hünzom ang mong tüle tsak koxle chixe wanlom ija zale toxpu.

⁶Ikoxle chaxwannu zing pongma Zange hwom sheko hia lüka le zingpu. Otsao Lai kax ma tüikya ningle:

⁷‘Ija khoma lükae manu mapa danle toxüi, ilaxle ma kakonu füi notom ma ngoüi, ilaxle hokhi pangnyi müitom tuita ang achangüi.’

⁸Ikhoma athax hokhi a anyi münchang ikoxle müitom tuita changpu.

⁹Ijadaile oja Zange apongle fadaopuix, ija khünake afan ang taxtom.”

¹⁰Otue hwom hom to chat, wangshembue ija bama wüi chix ma atüi.

¹¹Chixe hwom ang thüi: “Owae ma kakonu awüt laxle mama laxüihex, chixe she zongto chinunchakkaipu.

¹²Ilailaile shekonu owawae ma kakopa danle toxlaxle mama lüka ma ating anokle jangchangba, she-e chix zongto chinunchakkaipu.”

¹³Züita khünakbue Jisu ang twon ang tom angkya kuxmale chix hato naosombu apüi ikoxle ibu khünakbu to wangshembue sa.

¹⁴Ikoxle Jisu-e ija ngünkya zuma, mongto kaklaxle, hwom ang thüi: “Naosombu ku hato hüi ang laxkox; hwom taxabax; chemthüikoxle Zang Wangting a iningkyabu kux changle.

¹⁵Kue hünzom ang otsing tomtata akaxpu: Opange naosa tuita ningle Zang Wangting pongle chikop laxüihex, hwom ikhato ngui ang münthoüi.”

¹⁶Ifüima chixe naosombu chix chak ma pai, chix chak füi twon ilaxle mohiman.

¹⁷Üntoxle Jisu pao ang achexle lom ma tüipongma, khünak tuita chix hato zikle hüilaxle akhux üntoxle chix ma atüi: “Müikya Nwotmix, oshuk chitüikya tsün khüzün atak ang kue chem mokse dai?”

¹⁸Ikoxle Jisu-e chix ang thüi: “Chemkho ma nange ku ang müikya nwotmix le nyakpu? Zang boboma müikya owachu müntüi.

¹⁹Nange kaxtom ibu awan ngopu: Mix taxlang; chinunchakkai taxtüi; taxahux; chichang khato othai huxfe le taxchang; ngan-jut le taxlax; hünpa hia hünnu nyi thua zalax.”

²⁰Chixe Jisu ang thüi: “Nwotmix, ibu pangwüi kue naosom tokhange wüi mokle hüikya changle.”

²¹Jisu-e chix to mongkün füi tangthole hu ilaxle chix ang thüi: “Nang oli tuitae ma angui; paolax, nang ma atüitüi pangnu hanglax, ilaxle chitüi chinangkyabu ang ahanle laxkox. Ile jangchangba nang zangkangting to tüle ahak aluale tüiüi; ilaxle oman, ku füito azuilax.”

²²Ikoxle ija kax atatlaxle chix ang thün-nak üntoxle tüle mongtsik dongle paole max; chemthüikoxle chix a ngun syen tüle tüikya hakpa sün tuita changkya.

²³Akhople hulaxle Jisu-e wangshembu ang thüi: “Hakpa luapabu hanpakma Zang Wangting to nop ang otukux tsakpuix!”

²⁴Chix kax atatlaxle wangshembu ang huanuma khosam. Ikoxlechu Jisu-e hwom füi akax: “Kusahom, Zang Wangting to dong angkya otukuxkya mwottsak hex hule koplax!

²⁵Hakpa luapa khünak Zang Wangting to dongkya füi mütkui mik makhange Ut litle lekya wüi ochwon.”

²⁶Ibu kaxzing thoto wangshembu tüle abüt laxle khosam kake chix ma atüi: “Jangchangba owawapi sün tsuak angkya?”

²⁷Jisu-e hwom to tangthole hulaxle lan: “Ija a khünak zongto tsuak angkya fang münchang ikoxlechu Zang zongto chemchu münchang; chemthüikoxle Zang zongto chitho angkya oli jaojao müntüi.”

²⁸Pitar ajong ilaxle thüi: “Hulax, kwome pangnu danle toxlaxle nang füito azuipu.”

²⁹Jisu-e thüi: “Kue hünzom ang thüipu, owae, matüi manao wüi changlax, ma tingtok wüi changlax, mana manao wüi changlax, honu wüi changlax, hopa wüi changlax, Kakonu wüi changlax, susabu wüi changlax, haxtok homting wüi changlax, ku bama tamchu Kaxho Müikya hanpakma danle toxdao laxpuix,

³⁰chixe athax ipongkhae tüle onui kopüi: hom-pungchu, hotüi honao hwomchu, hona honao hwomchu, honu hopa hwomchu, kakonubuchu, susabuchu, haxtok homtingchu, ifüi tomle sikngün zothupchu wüi kopüi; ilaxle athax füima oshuk chitüikya khüzün tsün ataküi.

³¹Ikoxlechu athax thopa ang ngokyabu huanuma ma füipa ang achangüi, ilaxle athax füipa ang ngokyabu huanuma thopa ang achangüi.”

³²Athax Jisu hia chix wangshembu Jerusalem to dongüi lomba to tüikya; üntoxle Jisu wangshembu thoto achale le; ilaxle hwom tüle abüt tamchu füifüi ma azuile ngokyabu za. Anaochu chixe bün anyi chix füito süile pao ilaxle chix hato ngai angkya bama hwom hama apua.

³³Chixe thüi: “Hulax, kem a Jerusalem to dongpu; ikhato Khünak Hosa Nguakhobu hia wanlom nwotmixbu chak to fünle koxüi. Hwome chix lang angkya kax tsuakle faüi ilaxle mixnokbu chak to koxüi;

³⁴ibue chix tha ajaoüi, chix to thuak füi thuaküi, ilaxle müiüi, üntoxle chix a langüi; ikoxchu nyix azom lükya to chix chatle azangle zoüi.”

³⁵Ifüima Zebedi sasün Jakop hia Juhan nyie chix hato hüi ilaxle thüi: “Nwotmix, nange kukhi hanpakma naxmokse lekya mwot tütüile.”

³⁶Chixe hokhi ma atüi: “Hünkhi hanpakma kue chem naxmok fase le thütkya?”

³⁷Okhie chix ang thüi: “Fuazangle nang chongwang tüntong ma thungkya zuma, kukhi nang tsaxchi ma tuita ilaxle nongchi ma tuita le thung ang koxhüi.”

³⁸Jisu-e hokhi ang thüi: “Hünkhie chem jupuix ija hünkhie ngaxchu münawan. Kue ling angkya sikngün pe hünkhie ling ang thoüi hia? Chichangba kue chemle bapti laxüihex, ija baptikya olom ma hünkhi bapti ang thoüi hia?”

³⁹Okhie chix ang thüi: “Kukhie thoüi.” Jisu-e hokhi ang thüi: “Kue oja pe ling angkya hex ija pe ma hünkhie ling ang thokoxlax, tamchu ku baptikya olom ma bapti angchu thokoxlax;

⁴⁰ikoxlechu ku tsaxchi hia nongchi ma thung angkya kue faüi münchang; ikoxle ibu a opang hanpakma achwonle tüilaxpuix hwom ang Zange tix kox angkya changle.”

⁴¹Otue wangshem büne ija atatle lax, Jakop hia Juhan nyi füi hwom tüle mongtsik.

⁴²Ikoxle Jisu-e hwom pangnusa wüi chix hato selaxle thüi: “Songsari tu ma owae pünnusa thak ma apün awang le tüilaxpuix, hwom ang a ibu thakma hopunu zong tüipu idaile hwome zong ibu twonpu, ija hünzome awanle ngopu.

⁴³Ikoxlechu hünzom khama ile chang angkya oli chichang. Ikoxle hünzom khama opupue achongkya ang achangse tsupuix, chix hünzom khama naoshuk naolipa ang changkox;

⁴⁴Ilaxle hünzom khama owae ma ma akhose tsupuix, pangnu da ang chix achang angkya changpu.

⁴⁵Chemthüikoxle otsing tomtata ma Khünak Hosa ngaxchu ma to hume hüile chichang le mix to atu alit le kox ang tamchu khünaknu hanpakma ma tsün kox angle nguipu.”

⁴⁶Hwom Jeriko to ngui ilaxle Jisu ma wangshembu hia khünaknu othom chongkya tuita füi Jeriko angkya laile pao pongma, Timia sasün Bartima, ang mik aduakle jusax mix ang achangle tüikya.

⁴⁷Otue chixe Nazareth nok Jisu hüile ta le atat, chix akhongle thüi: “Dawid sasün Jisu, ku to chingcha hüi.”

⁴⁸Khünaknue chix füi dangle ngo angkya akax; ikoxle chixe tamtaile akhongle thüi: “Dawid sasün Jisu, ku to chingcha hüi.”

⁴⁹Jisu zak üntoxle thüi: “Chix nyakkox.” Ikoxle hwome ija mikduak sün nyakle thüi: “Taxza! Ajonglax, chixe nang nyakle.”

⁵⁰Ijama chix nyi sikle awüt laxle Jisu hato hüi.

⁵¹Jisu-e chix ang thüi: “Kue nang hanpakma chem naxmokse le texpu?” Ija mikduak süne lan: “Nwotmix, kue ngünse tsule.”

⁵²Ikoxle Jisu-e chix ang thüi: “Nang mongonge nang amüidaoa, paolax.” Ima wüi thuile chixe ngün ang kop ilaxle lomfo le chix füito azui.