Read Wancho Naga Mark 11 Bible Online

Mark 11 - Wancho Naga bible

Mark 11

¹Bethfes hia Bethani zui to hüile otue hwom Jerusalem hato nguipuix, hwom olip le nyakkya haxhua to ngui. Ija kax füi Jisu-e wangshem anyi thoto achale tsanle apao:

²“Hünkhi thüntho ma tüikya tingnu to paokox; hünkhi ikhato dongkya thoma, otuechu khünak mangakya Gatho hosa tuita fünle thomkya ngünüihex; ija dale ikhato apüihüi.

³Ilaxle owawae hünkhi to ‘Ija chem ang dapu’ le jangtsaba, hünkhie thüilax: ‘Nwotmixe lomputa, ilaxle leba ma wüi achatle koxüi ta.’”

⁴Idaile hokhi pao, ija tingkhua to hokhi thoma homtho ma Gatho hosa tuita fünle bang; hokhie ija da.

⁵Ipongma ikhama ajongle ngokya owawae tsa: “Hünkhie Gatho hosa chem mok ang dapu?”

⁶Ikoxle hokhie Jisu-e anole apaokya ningle ibu kax to lan, ilaxle hwome ija müi hokhi ang pao ang dan.

⁷Ija Gatho hosa hokhie Jisu hato apüi. Ija ding ma hwom nyiza nomle kox ilaxle Jisu ikhama thung.

⁸Züizüi khünakbue manyi maza lom to nomle kox; mamabue faokha tokya fummua pakle apüilaxle nomle kox.

⁹Ilaxle thochi ma lekyabu hia füichi ma hüikyabue akhong: “Hosana! Hosana! Jowanpa mün ma nguikya mix achuak kox!

¹⁰Wanghompa Dawid wangting nguikya to, Zange mohiman kox! Zang mün achuak kox!”

¹¹Jisu Jerusalem to ngui; Zangshwom-Hom to dong ilaxle pangnusa to akhople hu. Ikoxlechu hanhom ünkoxle chix wangshembu koplaxle Bethani to pao.

¹²Ofüi nyix hwom Bethani tokya chatkya zuma, chix ang woknuak hüi.

¹³Iponge ochakmua wüi müi wüi müile lomzui ma Fupsa pün tuita ngün; ilaxle ikhama oziak tuita thüingaxchu bangüi changtüi angpu le ajang laxle chix khe. Ikha alopkya zuma chixe pünchak boma chemchu chingün; chemthüikoxle ituke Fupsa ziaktu chichang.

¹⁴Jisu-e ija Fupsa pün ang thüi: “Athax makhange owaechu nang angkya fupziak tam münsaxpu!” Wangshembue ija chix kax atat.

¹⁵Otue hwom Jerusalem to nguipuix, Jisu Zangshwom-Hom to ngui ilaxle Zangshwom-Hom ma thalex mixbu jwonle alai. Chixe ngun alüixle ngokyabu tsap khole awüt, juao hangle ngokya tüntongbu khole awüt;

¹⁶Üntoxle owa angchu Zangshwom-Hom akaile mwotkat chemchu alyet ang chitom.

¹⁷Ifüima chixe hwom ang thüi: “Otsao Lai ma Zange akaxkya ile zale tüile: ‘Pangnu tingnok hanpakma, ku hom ang, Zangshwom-Hom le nyaküi! Ikoxle ija hünzome, ahux mixbu longlua ang achang thomdaoa!’”

¹⁸Nguakhobu hia wanlom nwotmixbue ija atatlaxle, chix mik chemle amütüi le oshua lom. Hwom chix thua za, chemthüikoxle khünaknu pangnu wüi chix hwon-nwot to abüt.

¹⁹Han asong füima Jisu hia chix wangshembu tingnu angkya laile pao.

²⁰Ofüi nop hwome leüi lom to ija fupsa pün otsing to lünle zikya ngün.

²¹Chemle changkya dai le ibu texle atak laxle Pitar-e thüi: “Nwotmix, hulax! Nange thuakzomle toxkya fupsa pün zidaoa!”

²²Jisu-e hwom ang thüi: “Zang to mongong tüilax.

²³Kue hünzom ang otsing tomtata akaxpu, opange ija haxhua ang: ‘Nang nwonün ilaxle tinu khato dütün’, le thüiüi hex tamchu mong ma aokya chitüi le, chixe chem akax puix ija changüi jao le ongpuix, chixe ija ile changkya ngün ang kopüi.

²⁴Ija khoma kue hünzom ang thüipu: Otue hünzome chempang bama zangjop üihex tamchu juüihex, hünzome ibu kopdaoa le onglax, ile hünzome chem jupuix ija kopüi.

²⁵Üntoxle otue hünzome ajong üntoxle zangjopüi hex, nange mix to thaile mokdaokya jangtüi thüiningle thailak laxkox, ile changkoxle Zangkangting tokya nang Hopae nang thaikyachu thailak tüiüi.

²⁶Nange mix ochax thailak chifatsuak thüiningle, zangkangting tokya Hopaechu nang ang thailak münfaüi.”

²⁷Anaolechu hwom Jerusalem to ngui. Hwom Zangshwom-Hom ma ahamle ngopongma, nguakhobu hia wanlom nwotmixbu tamchu mixpa tüichongbu le chix hato hüi.

²⁸Hwome chix ma atüi: “Chem tsakzong füi nange ibu mwot mok ang thopu? Nang ang ijabu mok angkya tsakzong owae fapu?”

²⁹Ikoxle Jisu-e hwom ang thüi: “Kuechu hünzom ma kax tuita atüifang; ku hama apuahüi. Ile changkox tix kue ibu chem tsakzong füi mokpuix, ija hünzom hama apuaüi.

³⁰Juhan hato bapti angkya tsakzong Jowanpa tokhange hüipia hia khünak tokhange hüipuix?”

³¹Ikoxle hwome tata füi zangwün: “Keme chemle lanüi? Zang tokhange le thüikox le nang: ‘Jangchangba hünzome chix to büthüikoxle chiong’, le chixe wüi kem ang thüiüi.

³²Ikoxle keme, ‘Khünak angkya’ le thüi ang (Hwom a khünaknu thua za); chemthüikoxle pangnue wüi Juhan a tuita ajepa changpule lax.”

³³Idaile hwome Jisu ang thüi: “Kwome münawan.” Jisu-e hwom ang thüi: “Kuechu chem tsak chem zong füi ibu mokpuix, ija hünzom hama münapua.”