Read Wancho Naga Mark 2 Bible Online

Mark 2 - Wancho Naga bible

Mark 2

¹Obi nyixchu chingo homle Jisu Kaparnaum to chat, üntoxle chix hom to nguile ngotüia le kax pu.

²Ija khoma khünaknu huanuma afoxle homkha awang; fülom makhange homtho to ngaxchu onui chitüi le chang. Jisu-e hwom hama Zang kax apuale ngo.

³Ipongkhae mixsün alie pai laxle faishokle kakkya khünak tuita Jisu hato apüi.

⁴Khünaknu huanuma aiet koxle hwome ija mixsün Jisu ha alople ahüi ang chitho. Idaile hwome Jisu ngokya tangkha loxtok khwot. Hwome olua jamle tsuak füima ija mixsün lya makhange ashale ajo.

⁵Itukuxkya hwom mongong ngünlaxle Jisu-e kakmix ang thüi: “Kusa, nang ochax thailak fadaoa.”

⁶Ikhama tüikya züita wanlom nwotmixbue hwom mongkhakha to ajang,

⁷“Ija khünake Zang adale ile chemle akax thopuix? Zang boma ochax thailak owae koxtsuak angkya changkoxpuix?”

⁸Ima wüi thuile Jisu-e hwom mongto texkya awan, ilaxle chixe hwom ang thüi: Hünzom mongto iningkyabu büthüikoxle texle ngopu?

⁹Faishok le kakkya mixsün füi: “Nang ochax thailak koxdaoa”, le thüikya füi “Zolax, nang lya kop üntoxle ahamlax”, le thüi angkya wüi ochwon changdaicha?

¹⁰Jangchangba, chaxwannu ma Khünak Hosa ma ochax thailak kox ang kya zong tüile le hünzom ang awan ang tomüi.

¹¹Idaile chixe ija faishokkya mixsün ang thüi: “Kue nang ang thüipu, zolax ilaxle nang lya koplax üntoxle nang ma hom to chatlax!”

¹²Ija khünak momle zo, chix lya kop, ilaxle hwom pangnu thüntho ma chix pao ang achex. Hwom pangnu abüt ilaxle Zang mün achuakle thüi: “Kwome iningkya tümangün tox!”

¹³Anaolechu Jisu Galili Shinthuk-titung kax chito chat. Khünaknu othom tuita chix hato hüi ilaxle chixe hwom ang hwon-anole kox.

¹⁴Chix leüie, chixe süisai mix, Alfa sasün Liwi, chix pa ma thungle ngokya ngün. Jisu-e chix ang thüi: “Ku füito oman.” Liwi ajong ilaxle chix füito pao.

¹⁵Ifüima chix Liwi hom ma fong saxle ngokya changkya. Süisai mixbu hia noktu khatokya alaile thomdaokyabu chix man tole hüikya khünakbu huanuma tamchu wangshembu le chix füi fongsüt ma wom.

¹⁶Züizüi wanlom nwotmixbu, opang farisibu changkya hex, hwome idu süisai mixbu hia noktu khatokya alaile thomdaokyabu füi tomle Jisu-e fongsaxle ngokya ngün. Hwome wangshembu ma atüi: “Iningkya khünakbu füi tomle chixe fong büthüikoxle saxpuix?”

¹⁷Jisu-e ija zangwün atatlaxle hwom ang thüi: “Müimüi zangngaile ngokyabu ang kak-hu-mix laxli münchang, kakmixbu zongma laxli changwüi. Ikoxle ku a chongbongkyabu chichangle ochax khünakbu, mongchat angkya hato ahyen ang nguipu.”

¹⁸Mwotlom tuita bama Juhan hia farisibu wangshembue atsaole jople hanpak laxle ngo. Züizüi khünak Jisu hato hüilaxle atüi: “Juhan wangshembu hia farisi wangshembue a atsaole jopkya hanpak lax ikoxle nang wangshembue a büthüikoxle chilaxpu?”

¹⁹Jisu-e lan: “Tuipa hwom füi tüingale, chix zuikhuibue atsaole jople ngo angchami? Hwom füi tuipa ngokya kople hwome atsaole jopkya hanpak laxngo ang münthoüi.

²⁰Ikoxle hwomkha angkya tuipa pao angkya hanpak nyixta nguile hüiüi, ifüima hwomechu atsaole jopkya hanpak laxüi.

²¹“Khünak owaechu nyizün füi nyizang to münthap; ile changkoxle nyizün thapkya achikle hüiüi ikoxle thapkya otua makhange kyetkyae süchong lümix okha achenüi.

²²Ilaxle khünak owaechu juzün müikhwon tsong ozang ma münsho; ile changkoxle juzüne müikhwon tsong ozang adapüi, ile changkoxle ju ashix-akhaxüi ilaxle muikhwon tsongchu amaüi; idaile juzün a müikhwon tsong hozün ma wüi sho angkya oli changle.”

²³Nazak nyix Jisu zim makhange ahamle le. Chix wangshembuchu chix füi tomle tüikya. Hwome leüi lom to zampa pakle sax ang süt.

²⁴Ikhoma farisibue Jisu füi akax ang süt: “Hulax, nazak nyix nang wangshembue ile mokkya a kwom wanlom füi apüikya changpu.”

²⁵Jisu-e lan: “Dawid hia chix füi tüikyabue, hwom ang wok anole süt lomkya pongma chemle changkya dai? Ija hünzome tamchu ele ma ano hexnyi?

²⁶Ikoxle chix zangshwom-hom to donglaxle Zang ang koxkya süt chixe sax. Ija a Abiathar Nguakho ang ngokya tuke changkya. Kem wanlom ma ija süt nguapa boma owaechu chisax tsuak angkya oli; ikoxle Dawid-e sax ilaxle chix füikyabu angchu wüi kox.”

²⁷Ilaxle Jisu-e ashuk: “Nazak nyix a khünak hanpak ang zingpu, ikoxle khünak mix nazak nyix hanpak angle münchang.

²⁸Ija daile Khünak Hosa a nazak nyix thakmachu hopupa changle.”