Read Wancho Naga Mark 3 Bible Online

Mark 3 - Wancho Naga bible

Mark 3

¹Ifüima Jisu sinagok to chat, ikhama chak faile kakkya mixsün tuita tüikya.

²Jisu tuita mütkop mix ang achangse le tsukya khünakbu züita ikhama tüikya; ijadaile nazak nyix chixe ija mixsün amüi angcha hexle hwome soxlaxle khinle hungo.

³Jisu-e ija mixsün ang thüi: “Ikhato thochi to oman.”

⁴Chixe hwom ang thüi: “Wanlom ma nazak nyix chem moklax le tüipuix? Khüzün sün angkya changüi hia mik amüt angkya changüi?” Ikoxle hwom dang ang mix süt.

⁵Üntoxle chixe hwom mongkhüikya khoma mongma laxle mongtsik füi hwom to akhople hu, üntoxle chixe ija mixsün ang thüi: “Nange chak tinkox.” Ija mixsüne chix chak tin. Ijama chix chak owüiole müi.

⁶Ikoxle farisibu sinagok angkya laile paolaxle, Jisu chemle langüihex le Herod othom füi chwonle katzua tsuak.

⁷Jisu chix wangshembu füi Galili Shinthuk-titung to pao; üntoxle khünaknu othom chongkya chix füito azui. Hwom Galili hia Jehudi haxtok tokyabu,

⁸Jerusalem hia Edom nok haxtok tokyabu, üntoxchu Jordan shuanu tachi haxtok tokyabu, ilaxlechu Tair hia Sidon tingnu zui tokyabu changkya. Chixe khomtsikya mwot mokkyabu zing atatlaxle ibu khünaknu othom tuita chongkya chix hato ngui.

⁹Khünaknu othom huanuma changkoxle, chix to thwomthwomshing le chihüi angkya kuxmale Jisu-e chix wangshembu ang khua tuita chix hanpakma achwon angkya akax.

¹⁰Chixe kaklak huanuma amüi koxkya khoma kakmixbue malomlom jamle chix to twon ang atin.

¹¹Ilaxle haxshix chasa füikyabue chix ngünkya zuma, hwom chix thüntho ma nguak üntoxle akhong: “Nang a Zang Hosa changpu.”

¹²Chixe hwom füi, chix owa hex, ija bama owa hamachu chiwün angkya kaxshing kople akax.

¹³Ifüima Jisu-e haxnu kho to dong üntoxle chix mongkünkyabu chix hato nyak. Ibu chix hato hüi.

¹⁴Ilaxle chixe bün anyi zünle kop. Hwom ang chixe “wangshembu”, le nyak. Chixe hwom ang thüi: “Kue hünzom ku füi tomle ngo angkya hanpakma tamchu hwon-ano ang tsanle apao angkya kuxmale zünle koppu.

¹⁵Ilaxle hünzom ma haxshix chasa jwonle apao angkya tsakzong tüi angkya changle.”

¹⁶Chixe kamle kopkya bünanyi a ijabu: Simon (Jisu-e chix ang Pitar le nyak);

¹⁷Zebedi sasün Jakop hia Juhan nyi (Jisu-e hokhi ang zangdung khünak le nyak);

¹⁸Andriw, Filip, Bartholomew, Mathi, Thoma, Alfa sasün Jakop, Thaddaus, Kanan nok Simon,

¹⁹ilaxle Jisu khohangkya mixsün Juda Iskariot, ibibi.

²⁰Ifüima Jisu hom to ngui. Anaolechu khünaknu ile wüi asoxkoxle Jisu hia chix wangshembu ang fongsax angkya chakba ngaxchu chitüi le chang.

²¹Kakobue ija atatkya zuma, hwom chix to sa ang ngui; chemthüikoxle khünaknue chix ang “Chix pi ongat ang achangüna”, le akax.

²²Jerusalem tokhange nguikya züizüi wanlom nwotmixbue thüi: “Chix ma Belzebul tüile! Chix ang haxshix chasabu jwonle apao angkya tsakzong a ija bao wanghome koxkya changle.”

²³Ikoxle Jisu-e hwom chix hato selaxle kaxpanbu füi akax: “Bao-e bao chemle jwon tho angkya?

²⁴Üntoxle chaxwan tuita ahak-ahanle jangtüi thüiba, ija chaxwan ajongle ngo ang müntho.

²⁵Ilaxle kako tuita züizüihanle jangtüi thüikoxle, ija homkha ajongle ngo ang müntho.

²⁶Idaile bao wanghom ma ahak-ahankya jangtüiba, chix ajong ang müntsuak ikoxle oli thukya hato hüiüi.

²⁷“Pongwang ma chix khale koplaxle wüi chichang thüiba khünak owaechu mixtsak naomüi hom to donglaxle, chix hom hia bwotba ama ang müntho.

²⁸“Kue hünzom füi otsing tomtata akaxpu, khünaknüsa ang hwom kaxchax pangnuli thailak tüiüi;

²⁹Ikoxle khünak owae Otsao Chasa zongto kaxthai akax laxüihex, chixe oshuk chitüikya ochax lyendaoa, ikhoma chix ang thailak müntüiüi.”

³⁰(Khünak züitabue chix ma haxshix chasa tüile le thüikya khoma chixe ija kax akax).

³¹Ifüima Jisu honu hia honao hwom hüi. Hwom homtho to ajongle ngo, ilaxle chix nyak ang kaxho mix tuita tsanle adün.

³²Jisu akhople khünakbu thungle tüikya, ilaxle hwome chix ang thüi: “Hulax, hünnu hia hünnao hwom homtho to tüile. Hwome nang lomle.”

³³Jisu-e lan: “Ku anu owa tamchu kunao hwom opang?”

³⁴Chixe chix akhople thungle tüikya khünakbu to hulaxle thüi: “Hulax, anu hia kunao hwom ikhama tüile!

³⁵Jowanpa mongtex ma owae mokpuix, hwom a kutüi-kunaohom tamchu ku anu changpu.” Hwom a kutüi-kunaohom tamchu ku anu changpu.