Read Wancho Naga Mark 6 Bible Online

Mark 6 - Wancho Naga bible

Mark 6

¹Ikha dantoxlaxle Jisu manok to chat ilaxle wangshembu chix füito azui.

²Nazak le nuikya nyix chixe sinagok to hwon-ano ang süt. Ikhato khünaknu tüihukya; hwom a chix kaxzing atatlaxle abüt. Hwome thüi: “Ija mixsüne je ibu ojong khato atakpuix? Chixe ohünotün mwot chemle mok ang thopuix?

³Chix a Meri sasün tamchu Jakop, Jusep, Juda hia Simon hwom hotüi, tuita zingpa münchangkox hia?” Ilaxle hwome chix pongle chikop.

⁴Jisu-e hwom ang thüi: “Ajepa tuita a manok hia ma-mixbue ada wüi; mama pangnu khato wüi chix a achuak achenle.”

⁵Chix chak füi twonle kakmixbu züita amüi koxkya boma chixe ikhama mama ohünotün mwot chemchu mok ang chimüi.

⁶Khünaknu ang mongong chitüikya ngünlaxle chix huanuma abüt.

⁷Ifüima Jisu nuihox tokya tingting to hwon-ano le pao. Chixe bün anyi wangshembu nyakle afoxlaxle mixhuak anyinyi pong apao. Chixe hwom ang haxshix chasabu thakma tsakzong kox;

⁸ilaxle hwom füi ile akax: “Kaithox boma mama chemchu taxkop; anchu, nyitsongchu, ilaxle hünzome ma nyipong okhütbu to ngunchu taxkop.

⁹Chisox soxlax, ikoxlechu nyipong onüi taxkop.”

¹⁰Chixe ilechu wüi thüi: “Ojongpang to hünzom pongle koplaxüihex, ikha angkya mapaopaoba ija hom ma ngolax.

¹¹Khünaknue hünzom pongle chikop chichangba hünzom kax to na chitha, iningkya ting-hax to janghüi thüiba ikha dantoxdao ilaxle hünzom paoüima hünzom cha angkya haxbu ngaxchu hongle toxdao. Ija a hwom hanpak ang kaxkhün tuita ningle changüi.”

¹²Ijadaile hwom pao ilaxle ochaxbu tokya khünaknu mong chat angkya oli changpule kaxho apuk.

¹³Hwome haxshix chasabu huanuma jwonle apao tamchu olip münga füi pale kakmixbu huanuma amüi.

¹⁴Üntoxle wanghom Herod-e Jisu bama atat ang kop; (Chemthüikoxle chix mo pangnu khato wüi azingle wün). Khünak züizüie akax: “Baptikya mix Juhan chatle azang ngoüna, ikhoma idu ohünotün mwotbu chix makhange angaile ngopu.”

¹⁵Mamabue thüi: “Chix a Elija changpu.” Züizüie thüi: “Chix a kaipongkyabu ningle ajepa tuita changpu.”

¹⁶Wanghompa Herod-e ija kax atatlaxle thüi: “Chix a, kue dingsom le lang daokya chatle azangle zokya Juhan changpu!”

¹⁷Herod-e Juhan kop angkya kax kox, ilaxle chix janbüi füi khak laxle kun khato hakle thom. Honao wangchanu ang ngokya Herodia khoma chixe ile mok angkya lai.

¹⁸Chemthüikoxle Baptikya mix Juhan-e Herod füi honao ha angkya wangchanu chixe lax angkya oli münchangle akaxle ngo.

¹⁹Ija khoma Herodia mongto chix füi khüt kop ilaxle chix langle awütse le tsu; ikoxlechu Herod khoma she-e ile hwon ang chitho.

²⁰Chemthüikoxle Herod-e, chix thaikya chitüikya otsao khünak tuita changpule awanlaxle chaza üntoxle sünle thom; ilaxle chix ang Juhan kax atat-tatba huanuma khangkho sam. Ile changkoxlechu chixe Juhan kax apase le tsu.

²¹Oshuk chaktua ma Herodia-e opong atak; ija a Herod puxkya din shwomle, chix haxtok ma apün-awangkyabu tamchu süpahi akhokyabu üntoxle Galili nokpu akhokyabu thom püntuxkya zuma chang.

²²Ijama Herodia sacha wangchasa nguilaxle azüi le wanghompa Herod hia chix füi tomle fongsüt ma womle tüikyabu ang mong amüi. Ikhoma wanghompae wangchasa ang thüi: “Nange chem laxse tsupu? Nange laxse atsutsu kue nang ang koxüi!

²³Nange ajuju kue komle koxüi; ku wangting süifi jaojao kox ang thoüi”, le wanghompae sasün füi tsaosax le akax.

²⁴She laile pao üntoxle hotatüi hato nguilaxle atüi: “Tatüi, kue chaxnu ma chem juüi?” Ikoxle wangchanue lan: “Baptikya mix Juhan khangtom jukox.”

²⁵Wangchasa momle hochaxnu hato chatlaxle thüi: “Nange ku ang athax ile khua tuita ma Baptikya mix Juhan khangtom laxhüi!”

²⁶Ijae wanghompa ang mong huanuma ama, ikoxlechu chixe mixwünbu thüntho ma tsaosax le akax daokya khoma chixe ija kax abax ang chitho.

²⁷Ijadaile chixe athaxthax wüi Juhan khangtom apüi ang da tuita tsanle apao. Ija da pao üntoxle kunkha to nguilaxle Juhan khang düt;

²⁸ifüima chixe ija khua tuita ma danle apüilaxle wangchasa ang kox; chatle wangchasae ija hotatüi chak to kox.

²⁹Chix wangshembue ija zing atatlaxle kun to ngui üntoxle chix zwoptho paole zu.

³⁰Wangshembu chat ilaxle Jisu füi apong; hwome mokkya hia hwon-anokyabu bamo chix hama wün.

³¹Nguiüi hia paoüi khünaknu ikhama huanuma tüikoxle Jisu hia chix wangshembu fongsax angkya chakba ngaxchu chikop. Ikhoma chixe hwom ang thüi: “Khaxa, kem tata nazakle ngokya li jongta khato paohax.”

³²Idaile hwom khua ma ngale mix dangkya khato hwom tata pao.

³³Ikoxlechu khünakbue hwom achexüi ngünle lax ilaxle hwom opangpang hex ochwon ma tsingle lax; ilaxle tingnu pangnukha tokya cha ma zikle, Jisu hia chix wangshembu thoto wüi ijongkha alople nui.

³⁴Otue Jisu khua angkya thai, chixe ija khünaknu tusox ngün, ilaxle chix mongkha to hwom hanpakma chingcha dongle tex, chemthüikoxle hwom a nyetmix chitüikya chunbu ningle ngo. Ija khoma chixe hwom hama tüle-tüle anwot-ano ang süt.

³⁵Üntoxle hanhom füima, chix wangshembu chix hato nguilaxle thüi: “Ikha a chemchu chitükya kha ilaxle athax a tuchu lehuüna;

³⁶nuisox ma tüikya khünakbu hom tamchu tingkhuabu to paolaxle sütling naxsax lax ang hwom fan ang tomlax; chemthüikoxle hwom ma sütling chemchu müntüi.”

³⁷Chixe hwom kax to lanle thüi: “Hünzome hwom ang sax angkya tütali thüichu tülaxkox.” Hwome chix ang thüi: “Kwom paolaxtoxle jan ngunkhix ho-anyi tha an shakle apüilaxle hwom ang asütkox lehia?”

³⁸Chixe hwom ang thüi: “Hünzom ma an obi tukux tüipuix ang shonghu anohu.” Hwome opaktik füima akax: “An khao aga ilaxle nyax jang anyi le tüile.”

³⁹Chixe hwom ang khünak othom-othom ma hingzang ding to athung angkya kax kox.

⁴⁰Idaile hwom azienzien le, zienpong to hopong hia punyi bün pongle thung.

⁴¹Ifüima chixe ankhao hia nyax jang anyi chak ma kop, dingchi to angakle hu ilaxle Zang ang münchong fa. Chixe an akhix ilaxle khünaknu ang afanle kox ang wangshembu chak to kox. Chixe nyax jang anyichu wüi hwom pangnu ang ahanle asüt.

⁴²Hwome pangnue wüi wokfwot müile sax.

⁴³Ilaxle an hia nyax atakyabu wangshembue sang bün anyi tswonle kop.

⁴⁴Fongsüt ma hakkya lüka mixmüimüi hajat aga tukux changkya.

⁴⁵Chixe khünaknu fan ang koxkya bama wangshembu momle khua ma nga ilaxle tachi Bethsaida chito achale lenui angkya kax kox.

⁴⁶Hwom afan füima chix a zangjop ang haxhua tuita to pao.

⁴⁷Han asong füima, khua a tikha to ikoxle chix a haxza to chix tata tüikya.

⁴⁸Khuachüi ang hwom thangle ngokya chixe ngünle lax; chemthüikoxle zangwine hwom füi apüile jep; ikoxle ali baji bato huazunge chix hwom hato titok to ahamle hüi. Chix a hwom kaile tox angle hüile ngokya.

⁴⁹Ikoxle hwome chix titok to aham ngokya ngünle lax, ilaxle ija a bao wüi changüi le thütlaxle hwom akhong.

⁵⁰Chix ngün pongma hwom pangwüi abünle za. Jisu-e thuile hwom to tsa: “Mong taxhix, ku changpu, taxza!”

⁵¹Ifüima chix hwom hato khua ma dong, üntoxle zangwin dangle zak. Wangshembu ang huanuma khosamle aban.

⁵²Hajat aga khünaknu tuxle ohünotün mwot ahokya chem hanpak hex hwome awan ang chitho; chemthüikoxle hwom monge ija ajang ang chitsuak.

⁵³Tinu talaxle hwome Geneseret alop. Ikhato hwome khua fünle tox.

⁵⁴Hwome khua danle toxkya füi tomle khünaknue Jisu süntsing.

⁵⁵Ikoxle hwom ija tuitui pangnu khato zikle aham; üntoxle chix ijong khato tüile le atat-tat khato, hwome lyabu ma pai laxle kakmix-bwotmixbu chix hato apüi.

⁵⁶Ilaxle Jisu alele khato, noksa towüi changlax, tingnu towüi changlax ilaxle chaxwan tüta jongkha towüi changkoxlax, kakmixbu lomnu ma danlaxle, chix nyitua to twon ang thüingaxchu koxhüi le chix ma chingcha ju, ilaxle chix to alietliet pangnu wüi müi.