Read Wancho Naga Mark 7 Bible Online

Mark 7 - Wancho Naga bible

Mark 7

¹Jerusalem tokhange züita farisi hia wanlom nwotmixbu Jisu akhople afox.

²Üntoxle hwome wangshembue chak chiatsao homle süt saxkya ngün, ija a farisibue khünaknu hama apuakya chaktsux olom ma chak chiatsux homle saxkya ang thüipu.

³(Chemthüikoxle hwom pupa wanlom to laxle chak müile chiatsux homle, farisi hia Jehudi khünakbue otuechu süt münsax.

⁴Ilaxle thalex nui tokya apüikya tütalichu chiso homtoxle chisax. Iningle hwome pongle kopkya pupa wanlombu chatlechu tüihule; thütba, wansa khopkhua hia tiklakbu azaokya olom tamchu ma jiplya tsaole thom angkya olom, ) iningkyabu.

⁵Ifüima farisibu hia wanlom nwotmixbue chix ma atüi: “Nang wangshembue pupa wanlom chito homle chak ngax chiatsux homle süt büthüikoxle saxpuix?”

⁶Chixe hwom kax to lanle thüi: “Hünzom künkux-mongkwombu! Hünzom hanpakma Isaia ajepae ajekya changtomta koxa! Za le thomkya ningle: ‘Ibu khünakbue, Zang, le lüntüia, ilaxle tunzaza ma, ku achuak tüia; ikoxle hwom kün-mong ku füi ochu towüi.

⁷Hwome ku chishwombachu; khünak chakzing wanlombu hwome, Zang wanlom ningle, mix hama anwot anole.’

⁸“Hünzome Zang kaxtom osyen to thom ikoxle khünake anole fakya kax ma mix laxle.”

⁹Ilaxlechu chizakle Jisu-e hwom ang thüi: “Hünzome ma chakzing hwon-nwotbu thom angkya kuxma, hünzome Zang kaxtom chilaxle awüt ang tüle atsing manle.

¹⁰Chemthüikoxle Mosa-e thüi: ‘Manu mapa chathua zakox; ilaxle owae manu mapa thuakzomle changüi hex, chix mik amüt dao!’

¹¹Ikoxle hünzome thüitüi: ‘Khünak tuitae manu mapa ang, kuchi tokhange fongkya oja kopse hex ija a Korban’ (Ija a Zang kux changpule thüikya tha);

¹²ifüima chixe honu hia hopa nyi hanpakma tütachu mok ang chifa.

¹³Ile hünzome pupa wanlom bama anwot anokyae Zang Kax mwot to chithapkya ang achangle; ilaxle iningkyabu hünzome tüle mokle.”

¹⁴Ifüimachu Jisu-e khünaknu tusox chix hato tamnyakle asox ilaxle hwom ang thüi: “Hünzom pangnusae ku kax apalax üntoxle awan koplax.

¹⁵Kotok tokya noplaxle khünak tuita chitsaokya ang achang angkya olili müntüi; itülüi chix chitsaokya ang achang angkya a, chix mongkha tokya laikyae tix changpu.

¹⁶Owawa ma atat angkya na jangtüi apa koplax.”

¹⁷Otue chix khünaknu othom dantoxlaxle hommong to dongpuix, chix wangshembue ija kaxpan chem hanpak hex le chix ma atüi.

¹⁸Chixe hwom ang thüi: “Hünzom chuwüi mix tukuxlehi? Kotok tokya khünak mongto dongkya tüta liechu chix chitsaokya ang münachang tsuak;

¹⁹chemthüikoxle ija a chix mongtsang to münwang; ikoxle shin wok to nguilaxle tsangtsa angkya laile paoünüi.” Ija Jisu zangwün makhange sütli lingli pangwüi saxling ang tsuaküile thüile.

²⁰Üntoxle chixe chizakle thüi: “Ikoxle khünak mong angkya chem laipuix, ijae tix khünak chitsaokya ang achangle;

²¹Chemthüikoxle omong tokhange khünak kün-mong tokya iningkya tutex omabu laile; ohux-olop, mix mik amütkya,

²²chinunchakkai, nüfux, zanglom chimüikya, huxtsing-loptsang, mix-dyen mix-ngankya, kax ma chilaxkya, miktsak mongngwom, Zang adakya, mongngam, tutubaokya,

²³iningkya ochax oli pangwüi khünak kün-mong tokhange laile ilaxle chix chitsaokya ang achangle.”

²⁴Ifüima Jisu ikha angkya achexle Tair tingnu longzipong to ngui. Chix hom tuita to nop ilaxle chix ikhato tüile le owa angchu awan ang koxse chitsu ikoxlechu chix a azwonle ngo ang chitho.

²⁵Mixcha tuita, owa sacha ma haxshix chasa tüikya hex, she-e chix ikhato tüileta le atatlaxle, chix hato hüilaxle chix chitong ma akhux.

²⁶Ija mixcha a Grik cha, Siria haxtok tokya Foinesia nok tokya changkya. She-e sacha angkya haxshix chasa apaofa le chix ma chingcha ju.

²⁷Ikoxle Jisu-e she ang thüi: “Pongwang ma naosombu wok afwot ang shongkox kop-hax. Naosombu süt apüilaxle hi ang thokle kox angkya olom münchang.”

²⁸She-e chix kax to lanle thüi: “Alixachong, ija changkoxa; ikoxlechu tsap chitong ma ngokya hie, naosombue adütkya saxfun thüichu tswontüipu.”

²⁹Chixe she ang thüi: “Khaxa nang paolax; ija nang kaxlan khoma hünsa angkya haxshix chasa laile paoüna!”

³⁰Ikoxle she hom to chatkya thoma, haxshix chasa laile pao füima hosa shekosa a lya ma shuile nui.

³¹Anaolechu Tair dantoxlaxle Sidon makhange tingkhua bün akaile Galili Shinthuk-titung hato ngui.

³²Hwome chix hato naba mix tuita apüi. Chix a kaxchu müile chidongkya mix changkya. Khünakbue Jisu füi ija mixsün to chix chak füi sütwonfa le akax.

³³Ikoxlechu chixe ija mixsün othom kha angkya süile pao, ilaxle chix chakkhi ija khünak na ma sho üntoxle thuak tamchu chix le to twon.

³⁴Ifüima Jisu-e dingchi to hu, azax, ilaxle ija khünak ang thüi: “Efatha” (Ija a akaxkox le thüikya kax).

³⁵Ima wüi thuile chix na dap, ilaxle kax thangkyachu müile tsaotha le akax ang tho.

³⁶Üntoxle chixe khünaknu ang ija bama owa hamachu chiwün angkya kaxshing kople akax; ikoxlechu otukux chixe abaxpuix itukux ija kax apuk ang hwom mongtsu.

³⁷Üntoxle atatkyakya pangnu wüi huanuma abüt. Ilaxle hwome thüi: “Chixe pangnu wüi müile mokdaoa. Chixe naba mixe atat ang tom tamchu kaxux mix ang akax ang tom!”