Read Wancho Naga Mark 8 Bible Online

Mark 8 - Wancho Naga bible

Mark 8

¹Ifüima aluile chingo homle, chatlechu khünaknu othom mama chongkya tuita hüi. Hwom ang sütling chemchu chitüi le changkya zuma Jisu-e chix wangshembu nyaklaxle hwom ang thüi:

²“Kue khünaknu othom to tüle chingcha maxle; chemthüikoxle hwom ku füi tomle ngokya athax nyix azom nguile hüile ilaxle athax a hwom ma sütling chemchu müntüi.

³Üntoxle kue fong chiasüt homle hwom hom to chat ang jangtomba hwom a lomba to woknuake lopüi, chemthüikoxle züizüi a tsailo tokya nguikyabu changle.”

⁴Ikoxle chix wangshembue lanle chix ang thüi: “Iningkya faokha to ibibi khünaknue sax ang okhongui le süt ojong tokya atakle koxüi?”

⁵Chixe hwom ma atüi: “Hünzom ma an otukux tüipu?” Hwome lan: “An khao anüt tüile.”

⁶Chixe khünaknu ang haxsha ma thung angkya kaxkox. Ifüima chixe an khao anüt kop, Zang mün achuak, ibu akhix, ilaxle khünaknu ang ahanle kox angkya hanpakma chix wangshembu chak to kox; üntoxle wangshembue ibu hwom ang ahanle kox.

⁷Hwom ma nyaxchu hidaoküsabu sütuikya. Jisu-e ijabu bamachu Zang ang münchong fa ilaxle pangnu ang ahanle kox angkya hanpakma wangshembu chak to kox.

⁸Hwom pangwüie wokfwot müile sax; ilaxle ota otua toxkyabu hwome sang anüt tswonle kop.

⁹Ija fongsüt ma womkya hwom hajat ali tukux tüikya; ifüima Jisu-e khünaknu fan ang tom.

¹⁰Chix tangthole wangshembu füi khua ma nga ilaxle Dalmanutha chaxwan to ngui.

¹¹Züizüi farisibu Jisu hato hüi ilaxle kax ma alat ang süt. Hwome chix amanse tsu, ilaxle chix zangkangting tokya changpule aho ang lita ohünotün mwot mokhu le atsang.

¹²Ikoxle chix mongto tüle kaklaxle Jisu-e thüi: “Anyix ngainyixkya khünakbue ohünotün mwot büthüikoxle lompu? Kue hünzom füi kaxtsing tomtata akaxpu: Ija tsünthom ang münwan chemchu münfaüi.”

¹³Üntoxle chix hwom danle toxlaxle chatle khua ma ngale tinu tachi to pao.

¹⁴Ipongma wangshembue an kop angkya alakle tox, ikoxle hwom chak ma khua ma an tuita wüi tüi.

¹⁵Üntoxle chixe hwom ang kaxshing kople akax: “Farisibu hia Herod hwom twonkhax hanpakma mik hingle ngolax.”

¹⁶Hwome tata füi akaxle thüi: “Kem ang an müntüi koxa, ikhoma chixe ija kax akaxpu.”

¹⁷Ija hwom zangwün awanlaxle Jisu-e hwom ang thüi: “An chitüikya bama hünzome chem zangwün atsat ngopu? Athax kople hünzome matsing tsuak hia? Tamchu ija maawan hia? Hünzom khüzi ma chemchu müntüi hia?

¹⁸Mik tüingale ngaxchu hünzome münngün hexnyi? Ilaxle hünzome texle münatak hexnyi?

¹⁹Kue ankhao aga hajat aga khünaknu tu ma akhix pongma ota otua hünzome sang obi tswonle kopkya dai; ija texle münatak hexnyi?” Hwome chix ang thüi: “Sang bün anyi.”

²⁰Chatlechu Jisu-e atüi: “Ilaxle hajat ali khünaknu tu ma ankhao anüt akhix pongma ota otua hünzome sang obi tswonkya dai?” Hwome lan: “Sang anüt.”

²¹Chatlechu chixe hwom ma atüi: “Athaxchu hünzome matsing tsuak nyi?”

²²Hwom Bethsaida to ngui; ikhato khünakbue mikduak mix tuita Jisu hato apüi ilaxle ija mixsün to chak füi twon angkya chix ma chingcha ju.

²³Jisu-e ija mikduak sün chak ma sietle lax, tingkhua akaile pao, ilaxle Jisu-e chix mik to thuak füi thuak. Jisu-e chix to chake twonlaxle ija mixsün ma atüi: “Nange tütali ngüncha hex?”

²⁴Zaple hulaxle ija mixsüne thüi: “I, kue khünakbu ngünle, ikoxle hwom pünzuabu ahamkya ningle mix ngünle.”

²⁵Anaolechu Jisu-e ija mixsün mik to twon. Izuma ija mixsüne müile zamle hukoxle chatle ngün ang kop, Izuma jali pangwüi müile tsing.

²⁶Ifüima Jisu-e “Tingkhua to chatle taxchat o”, le akaxlaxle chix hom to pao ang tom.

²⁷Ifüima Jisu hia chix wangshembu Kaisaria Filipi zui angkya tingkhua tuita to pao. Lomba to tüipongma chixe hwom ma atüi: “Ku bama wünhu, khünakbue ku ang owa le thüipuix?”

²⁸Hwome lan: “Züizüie nang Bapti fakya mix Juhan changpule thüile; züizüiechu nang ang Elija changpule thüile, ilaxle mamabue nang a ajepabu khama tuita changpule thüile.”

²⁹Chixe hwom ma atüi: “Ikoxle hünzome ku ang owa le texpu?” Pitar-e lan: “Nang a Messaiah changle!”

³⁰Ijama chixe hwom füi kaxshing kople akax: “Ku bama ija owa hamachu taxwün.”

³¹Ifüima Jisu-e wangshembu hama hwon-ano ang süt: “Khünak Hosa ang sik huanuma ngün angkya oli changle. Apün-awangkyabue, Nguapa akhokyabue, tamchu wanlom nwotmixbue chix chilaxle awütüi, ilaxle langüi, üntoxle nyix azom füima chatle azangle zoüi.”

³²Ija kax chixe angaile akax. Pitar-e chix süile pao ilaxle chix to sa.

³³Ikoxlechu Jisu-e chix wangshembu to aküile hu, ilaxle Pitar to sale thüi: “Bao, nang ku ha angkya paoün, chemthüikoxle nang mongjang Zang tokhange chichangle haxshix tokhange hüikya changle!”

³⁴Ifüima Jisu-e chix hato khünaknu othom tamchu chix wangshembu nyaklaxle hwom ang thüi: “Ku füito azuise tsukyabue ma alaklax, ma pünsak pailax, ilaxletix ku füito azuilax.

³⁵Chemthüikoxle opangsae ma khüzün azünse tsuüi hex, hwome ija amütüi; ikoxle opange ku tamchu ku kaxho bama ma khüzün amüt laxüi hex, hwome ija sünle kopüi.

³⁶Khünak tuitae chaxwannu komle kop ang tho ikoxle ma chasa a amüt le jangchang thüikoxle chix ang lap chem tüi?

³⁷Kue thüipu, müntüi! Khünak tuita ma, ma chasa khülüix to kox tsuak angkya chemchu müntüi.

³⁸Ijadaile ija Zang chitüikya tamchu ochax tsünthom ma opange ku tamchu ku kaxho bama azakle maxüi hex; Khünak Hosae ma Hopa fuazang ma kaxtaimixbu füi nguikya zuma, chix bama azakkya tüiüi.”