Read Wancho Naga Luk 11 Bible Online

Luk 11 - Wancho Naga bible

Luk 11

¹Nyixta Jisu-e jongta khama zangjople ngokya changkya. Chixe zangjop ashuk kya zuma chix wangshem khama tuitae thüi: “Jowanpa, Juhan-e chix wangshembu hama apuakya ningle kwom hamachu zangjop angkya apua hüi.”

²Jisu-e hwom ang thüi: “Ongai hünzome zangjopüi hex, ile zexlax: ‘Apa: Nang otsao mün wüi naxachuak; Nang Wangting naxhüi.

³Nyixfo to kwom ang süt laxhüi.

⁴Kwom zong to achaxkyabu pangnu ang, Kwome thailak koxkya ningle, Kwom ochaxchu wüi thailak laxhüi. Tsak kya thwontsing to kwom taxalyet.’”

⁵Üntoxle Jisu-e chix wangshembu ang thüi: “Thütba hünzomkha angkya owawa wünmongtsange zuikhui hom to pao, üntoxle ‘zuikhui, ku ang an khao azom shongkox ngohüi,

⁶ku zuikhui tuita wünham mix ku hato athax ile nguile tüile, ikoxle chixe sax ang kox ang ku ma chemchu müntüi’, le thüi angkya lai.

⁷Thütba ija ma chixe hom-mong tokhange lanle thüi: ‘Ku ting taxatui ngo. Athax ka hakdaoa, ilaxle kusa hwom ku füi tomle lya ma jipngole.

⁸Ku zo ang müntsuak ilaxle nang angchu chemchu münfatsuak.’ Ifüima chem? Kue hünzom ang thüipu, chixe hozuikhui changle le zolaxle koxse chitsu, ikoxlechu chixe chatwüi chatle zakmax thünba le akax ngokoxle, chix zolaxle chix ma jukya chixe chix ang koxüi.

⁹“Üntoxle kue hünzom ang thüipu: Julax, ija hünzom ang koxüi; Lomlax, hünzome ataküi; Hongkox, ka hünzom ang daple koxüi.

¹⁰Chemthüikoxle ajujue kopüi; owae lompuix chixe ataküi; hongkya mix ang ka daple koxüi.

¹¹Hünzom khama hopabu owawae hosae nyax jukoxle, chix ang pu tuita kox angcha?

¹²Chichangba chixe oti tuita jukoxle, chix ang twonsi tuita koxüi hi?

¹³Itukux hünzom chimüikox ngaxchu, hünzome masumasabu ang amüimüi kox ang awanle; hünzom Zangkangting Hopae chix ma jukyabu ang Otsao Chasa chifale büle tüiüi?”

¹⁴Jisu-e kaxux angkya haxshix chasa jwonle apao ngokya; ilaxle haxshix laile paokya zuma, ija khünak akax ang süt, ikhoma khünaknu abüt;

¹⁵ikoxlechu hwomkha angkya züizüi e thüi: “Chix ang ibu haxshix chasabu jwonle apao angkya tsakzong fakya a haxshix khama akhokya Belzebul changpu.”

¹⁶Mamabue Jisu tsün ilaxle chixe Zang zong kop laxle ngokya aho ang ohünotün mwot mokhu le thüi.

¹⁷Ikoxlechu Jisu-e hwom mongjang awanlaxle, chixe hwom ang thüi: “Chaxwan oja ma hwom-hwom lüile ahak-ahanle achax-azankya tüiüi hex, otsün münloüi; üntoxle kako tuita ma hwom khakha ma wüi ahak-ahanle jangtüiba hwom shukshuk to shuüi.

¹⁸Üntoxle bao Wangtingchu hwom-hwom lüile achax-azan jangngoba, ija otsün lole büle ngomanüi? Kue haxshix chasabu jwonkya Belzebul zong makhange tsuakpule hünzome büthüikya to akax ang tsuak?

¹⁹Üntoxle kue Belzebul tsakzong füi haxshix jwonle apao tsuak kya jangchangba, hünzom füikyabue chem makhange ibu jwon ang tho? Idaile hwom a hünzom kaxfün angkyabu ang achangüi.

²⁰Ikoxle ile chichang homle kue Zang tsakzong füi haxshix jwon ang tsuakpu, imakhange Zang Wangting hünzom hato nguile ngoüna le ahole.

²¹“Otue mixtsak naomüi tuitae changpax hia thuajan füi chix hom nyele thomüihex, chix bwotba to chem münthüitsuak.

²²Ikoxle otue chix füi sütsak kya mix hüilaxle chix to lütüihex, changpax ojabu kop laxle chix chachongle ngokya hex, ibu ija khünake chix angkya pale pao, ilaxle chixe pa-lole kopkyabu ahanle laxle.

²³“Owa ku füi chitüipuix chix ku zong to zan changle, üntoxle afox atom ang ku to chifongkya mixe a fale chiakle.

²⁴“Otue haxshix chasa khünak tuita angkya laile paopuix, chix nazak nui lomle shonu-lingnak faole aham, ilaxle onui müikya chiatakkya zuma chixe akax: ‘Ku hom to chatle chatüi!’

²⁵Üntoxle chix nguikya thoma ija hom tswon-ngwonle atsao athale bang.

²⁶Chix tamchatle pao, üntoxle chix füi süshixkya mama chasabu anüt kop laxle ngui, ilaxle ikhama hwom ngo. Ifüima ija khünak amipongkya füi sütsexle ozya ma.”

²⁷Jisu-e ile akax füima, othomkha angkya mixcha tuitae akaxle thüi: “Nang pux laxle atu-alit le atsünkya mixcha a mohiman akhokya mixcha changle!”

²⁸Ikoxle Jisu-e lan: “Itülüi Zang Kax apalax. Ija kax ma laxkyabu sisi tamtai mohimankyabu changle!”

²⁹Chix akhople khünaknu hüikya zuma, chixe akaxle le: “Anyix ngainyixkya khünakbu otukuxkya ochax mixbu hex! Hwome ohünotün mwot lomle, ikoxle Juna ohünotün mwot boma hwom ang mama chemchu münfaüi.

³⁰Ninewi nok hanpakma Juna büle münwan achongkya hex, ija ningle anyix ngainyixkya khünakbu hanpakma Khünak Hosachu münwan chongkya changüi.

³¹Kaxfünkya nyix Sheba wangchanu ajong laxle athaxpongkya khünakbu ajaoüi, chemthüikoxle she a hwom chaxwan ochu tokya Solomon hwon-je to apa ang ngui; ikoxle hulax, Solomon füi ngaxchu süchongkya ikhama tüile.

³²Kaxfünkya nyix Ninewi nok ajong laxle athaxpongkya tsünthom ajaoüi; chemthüikoxle Juna-e hwon anokya khoma hwom mong alex; ikoxle hulax, Juna füi ngaxchu süchongkya ikhama tüile!

³³“Wünzua atsop laxle khünake owaechu khomle hia khonge akhuple münthom; itülüi hommong to dongkya zuma khünake zangngai naxngün ang chixe ija wüntik dan angkya nui ma danüi.

³⁴Nang mik nang tsangtsa zongto wüntik tuita ningle changle. Otue nang mik müile ngoüi hex, nang tsangtsa zangngaie awangle tüile; ikoxle otue nang mik chimüiüi hex, nang tsangtsa abakle zangnak khato ngoüi.

³⁵Ijadaile nangma tüikya a zangngai changlaxma hex hia zangnak hex awanle koplax.

³⁶Ikoxle nang tsangtsa pangnukha zangnak chemchu chitüi le zangngai e awangle jangngoba, wüntike nyan koxle nang ang zangngai koxkya ningle, nang tsangtsa zangngai e awangle ngoüi.”

³⁷Athax chixe akax tsuak füima, farisi khünak tuitae chix füi tomle fongsax ang se, ikhoma chix hom-mongto donglaxle chix füi fongsax ang thung.

³⁸Süt saxüi thoma chixe chak atsuxle chikopkya ngünlaxle farisi mixsün abüt.

³⁹Ikhoma Jowanpa-e chix ang thüi: Hünzom farisibue khopkhua wansa otok fwotle, ikoxle hünzom mongkha to chichang-chizangkya hia ochax tutex e awangle ngole.

⁴⁰Hünzom ongat khünakbu, omong hex otok hex Zange zingkya tomtom münchang hia?

⁴¹Ikoxle hünzom khopkhua wansa ma tüikya chitüi chinang zasabu ang laxkox, ile jangchangba otsao-olang chemchu chitüi le nang hanpakma pangnu wüi tsaokya ang achangüi.

⁴²Hünzom farisibu, hünzom maxsax! Chemthüikoxle hünzome suingan hia büza üntoxle mama suilai oli pangnu akiakle Zang mün ma bün ma thomta koxpu, ikoxle otya ma kaxfünkya hia Zang mongkün hünzome awütle toxpu. Ibu mokkya hünzome mamabuchu wüi awütle chitoxle mok angkya oli changle.

⁴³“Hünzom farisibu, hünzom maxsax! Chemthüikoxle hünzome Sinagok ma atsuakya ngwotnui lomle, üntoxle thalex nui to mixe chazale hünzom to shwomkya lom.

⁴⁴Hünzom maxsax! Chemthüikoxle hünzom a oding ma khünak ahamle ngokya, otam chitüikya zuktingbu ningle changle.”

⁴⁵Üntoxle Wanlom nwotmix mixsün tuitae chix ang thüi: “Nwotmix, nange ija kax akaxkya e kwom angchu zak akople.”

⁴⁶Üntoxle chixe thüi: “Hünzom Wanlom tsingpabuchu maxsax! Chemthüikoxle hün ang chitho tangkya hün hünzome khünaknu ang ahünle, ikoxle mahuake a hwom to asunle hün to chak-khi zatae chithu.

⁴⁷Hünzom maxsax! Chemthüikoxle hünzome hünpu hünpa hwome langdaokya ajebu zukting ipongmüile zingle.

⁴⁸Hünpu hünpa hwome mokkya hünzome awanpu, ilaxle hünzom mongzomchu müile le hünzome mwot makhange ahole; chemthüikoxle hwome ibu lang üntoxle hünzome a hwom zuktingbu zing.

⁴⁹Idaile Zang hwon-je e thüile: ‘Kue hwom hato ajebu üntoxle kaxho mixbu ahüiüi, ibu züita hwome langüi, ilaxle mamabu to zothupüi!’

⁵⁰Chaxwannu zingpong tokhange wüi ajebu pangnu langkya khoma athaxpongkya khünaknu sikangün angkya changle.

⁵¹Abel langkya makhange zomtong hia otsao nui nyi bama, Zakaria langkya kople, ija tsünthom ma tsangüi. Changpu, kue hünzom ang thüipu, ibu khoma ija tsünthom sikangünüi!

⁵²“Hünzom Wanlom tsingpabu maxsax! Chemthüikoxle hünzome Zang je-hwon hom kapatja kople thom; hünzom chuwüi chinop ilaxle nop ang hüikyabuchu wüi hünzome abaxle thom!”

⁵³Otue Jisu-e ikha danle tox, Wanlom nwotmixbu hia farisibue chiwün kaxwünle chix ajao ang süt üntoxle küjo-küjekyabu kax chix ma atüi.

⁵⁴Ile chix aman angkya hanpakma oli tuita ma ngax thüichu chix thaikya atak angchale hwom azong.