Read Wancho Naga Luk 13 Bible Online

Luk 13 - Wancho Naga bible

Luk 13

¹Galili nokbue Zang shwomle tö koxle ngoponge Pilat-e hwom langkya bama Jisu hama wünle fakyabu ikhama khünak züita tüikya changkya.

²Jisu-e hwom ang thüi: “Galili khünak ibue ile mikmax angkya atak kya khoma, Galili nok pangnu füi hwom wüi ochax olyem mokkyabu changpule hünzome texpia?

³Kue hünzom ang thüipu: Münchang! mong chialex jangthüiba, hünzomchu pangnu wüi hwom lailaile max angkya ataküi.

⁴Chichangba Silom ma long katuk nguakkyae thuple mixhuak sünbün achyet langkoxle, Jerusalem ma ngokyabu pangnu füi hwom wüi süchongle achaxkyabu le hünzome thütpia?

⁵Kue hünzom ang thüipu: Münchang! Ikoxle mong chialex jangthüiba hünzom chuwüi ilailaile maxüi.”

⁶Ifüima chixe ija kaxpan akax: “Mixhuak tuitae hwom haxtok ma fupsa pün küi, üntoxle ija pün ma oziak lomle chix ngui, ikoxle tuita ngaxchu chibang.

⁷Üntoxle chixe ija haxtok mozangkya mix ang thüi: ‘Hulax, Ija fupsa pün hato oziak lomle ku zanglao azom nguiüna, ikoxle oziak tuita ngaxchu chibang hom. Ija dakdao; hax ama lanle chemto thomngoüi.’

⁸Ikoxle ija mozangkya mixe chix kax to lanle thüi: ‘Jowanpa! Ija zangpua atalanle naxngokox. Kue otong akhople tholaxle haxzao thokle wanhuhax.

⁹Ilaxle ija püne ngaizang oziak jangdün müihupu, ikoxle chiziak jangthüiba nange dakle awüt ang tsuak.’”

¹⁰Nyixta nazakle nuikya nyix changkya, Jisu-e Sinagok tuita ma hwon-ano le ngokya.

¹¹Haxshix chasae zangbün achyet akakle thomkya mixcha tuita ikhama tüikya; she tangthole ajong ang chimüile akunle thom.

¹²Otue Jisu-e she ngün, chixe she ang thüi: “Mixcha, nang akakle thomkya athaxpi dandaoa!”

¹³Chixe chix chake she to twon, ija füi tomle she tangthole ajong ilaxle Zang mün achuak.

¹⁴Ile Jisu-e nazak nyix kak amüikya khoma, Sinagok ma akhokya mixsüne mongtsik laxle khünakbu füi akax: “Kem ang mwot mok angkya nyix azok panle thompu; ijadaile kak amüi angchu iponge hüihüi, nazak nyixkha wüio le taxchang!.”

¹⁵Ikoxle Jowanpa-e chix kax to lan: “Hünzom künkux-mongkwombu! Hünzom pangnusasae wüi nazak nyix ma maihu hia gathobu kunkha tokya danle ti aling ang münpaozai hia?

¹⁶Ija mixchachu Abraham sixli changkya, ikoxle athax ikhama, haxshix chasae zangbün achyet bibi khale thomkya nazak nyix she dale amüi angkya olom münchang leo?”

¹⁷Chix kaxlan ibue chix zong to tüile ngokyabu pangnu zak akop, ikoxle khünaknu pangnu wüi ija ohünotün mwot hanpakma pwonla tungle mongmüi.

¹⁸Jisu-e atüi: “Zang Wangting a chemningle tüi? Üntoxle kue ija chemfüi apyenüi?

¹⁹Ija a ile changle: Khünak tuitae suili tsang laxlaxle kale chix haxtok ma sai. Ija pün tsongle pünnu ang achang, ilaxle osabue okangbu to ozop zing.”

²⁰Anaolechu Jisu-e atüi: “Zang Wangting kue chemfüi apyenüi?

²¹Ija a, mixnu tuitae tik azom sax to ma-u ma-u le awutkya hidaoküsa twonkhax ningle changpu.”

²²Jerusalem to nguiüi lom to Jisu-e tinglong hia tingkhuabu to khünaknu hama hwon-anole aham.

²³Mixhuak tuitae chix ma atüi: “Nwotmix, khosün atak kya khünakbu muale wüi changüi hia?”

²⁴Chixe hwom ang thüi: “Hitkya fülom makhange le ang zongbakle azonglax; chemthüikoxle imakhange le ang noknusa wüi azonghuüi ikoxlechu noke münthoüi.

²⁵Hom hopupa zoüi ilaxle ka haküi; ifüima homthoma ajong laxle kahak to hongle, ‘Kwom ang ka daple koxhüi, O, Opunu’ le nyak kya zuma chixe hünzom kax to lanüi: ‘Hünzom ojong tokya hüipuix kue münawan!’

²⁶Ijama hünzome thüiüi, ‘Kwom a nangfüi tomle sax-lingle ngokyabu changle! Kwom tingkhua to nange hwon anopu!’

²⁷Ikoxle chatlechu chixe thüiüi, ‘Hünzom ojong tokya nguipuix kue münawan. Hünzom chichang-chizangkyabu, Ku ha angkya paoün!’

²⁸Zangkangting to Abraham, Isak, Jakop üntoxle ajebu ngünlaxle hünzome wa azyaküi, chemthüikoxle hünzom a dong ang chifa.

²⁹Üntoxle handün hia hannopchi tokya, shuakux hia shuathong tokya, khünaknu nguilaxle Zang Wangting fongsüt ma haküi.

³⁰Üntoxle hulax, athax ofüi ang ngokyabu owang ang achangüi üntoxle owang ang ngokyabu ofüi ang achangüi.”

³¹Ipongkhae wüi farisibu züita lai laxle Jisu ang thüi: “Nang tütakoxchu ikha angkya laile mama khato pao angkya wüi changpu; chemthüikoxle Herod-e nang langsele lomle.”

³²Jisu-e hwom kax to lan: “Pao üntoxle hünzome ija hijan ang thüikox: ‘Anyix hia ngainyix kya bama kue haxshixbu jwonle apaole kak-lakbu amüiüi, ilaxle nyix azom lekya to ku mwot ashuküi.

³³Tütakoxlechu anyix hia ngainyix üntoxle ifüinyix le ku kulom ma aham angkya jao changle; chemthüikoxle ajepa tuita Jerusalem boma mama khato lang angkya olom münchang.’

³⁴“Jerusalem! Jerusalem! Nange ajebu lang, nang hato Zange ahüikya kaxho mixbu longe thuple lang! Onue osabu to akhuple womkya ningle, kue nang khünaknu nok to tamle ku chake künse le texhupu; ikoxlechu hünzome ku ang ile kün ang chifa!

³⁵Ija khoma hünzome Zangshwom hom awütle toxüi. Kue hünzom ang thüipu, ‘Jowanpa mün ma hüikya mix to Zange mohimankox’ le hünzome mathüi tanto, hünzome ku münngünüi.”