Read Wancho Naga Luk 14 Bible Online

Luk 14 - Wancho Naga bible

Luk 14

¹Nyixta nazak nyix Jisu-e farisibu khama akhokya mixsün tuita hom to fongsax ang thung; khünaknue chix to khile hungo.

²Cha-chak fingle kak kya mixsün tuita Jisu hato ngui,

³ikoxle Jisu-e Wanlom tsingpabu hia farisibu ang thüi: “Nazak nyix kaklak chiamüimüikya li hex? Wanlom ma büle tüipuix?”

⁴Ikoxle hwome kaxsu chidün. Ikoxle chixe ija mixsün to twonle amüi ilaxle chix pao ang kox.

⁵Ifüima chixe hwom ang thüi: “Thütba, nang naosa chichangba maihu nazak nyixkha tüküi khato düt, ikoxle nazak nyixkha changkoxchu ija nange nonokhaile münadünüi hex nyi?”

⁶Hwome ibu bama chix kax to lan ang chitho.

⁷Mixwünbue ngwotnui amüimüi kop ang atinkya Jisu-e ngün, idaile ija kaxpan chixe hwom pangnu ang akax:

⁸“Owawae nang tuiju nasom to ahyen pongma tüntong atsuakya ma thung ang taxthüi: olele nang füi süchongkya khünak tuita hopunue ahyenkya mix jangtüi thüiba, hünkhi ahyenkya mixe nang hato hüilaxle nang ang thüiüi,

⁹‘Ikhama chix wüi thung ang laxkox.’ Ijama thünzak kake nang akiakya khato thung ang achexle paoüi.

¹⁰Ikoxle otue nang nyaküi hex, nguilaxle nang apexkya ngwotnui ma thungkox, üntoxle otue nang ahyenkya mix hüiüihex, chixe nang ang thüiüi, ‘Tüinao, thakchi to dongkox.’ Ile changkyae tomle fongsax ang thungle ngokyabu pomthoma ma nang achuak kya tuita ang achangüi.

¹¹Chemthüikoxle owae ma alüile achen üihex, chix a ahixkya ang achangüi; üntoxle opange ma alüile ahixkya ang changpuix, hwom achenüi.”

¹²Ifüima chixe ahyenkya mix angchu thüi: “Otue nange fongkha üihex, nang zuikhuibu wüi changlax, tüinao wüi changlax, kako homkha wüi changlax, aluakya tomzi wüi changlax, tax ahyen; ile changkoxle hwome nang chatle ahyenüi, üntoxle ile nange chem fapuix ija olüix achatle koxkya ang achangüi.

¹³Otue nange fongkhaüi hex, mixshix-zasabu, chifai-chaknyaibu, üntoxle miksut nababu ahyenkox;

¹⁴ijama hwome nang to mohimanüi; chemthüikoxle hwome nang ang olüix achatle kox ang chithoüi; ikoxle otsao khünakbu chatle zo ningle Zange nang ang olüix a chatle koxüi.”

¹⁵Üntoxle chix füi tomle fongsax ang thungle ngokyabu kha angkya khünak tuitae ija atatkya zuma, chixe Jisu ang thüi: “Zang Wangting fongsüt ma hak angkyabu mohiman huanu!”

¹⁶Jisu-e chix ang thüi: “Khünak tuita huanuma fongkha laxle püntuxkya to khünaknu ahyenkya mixsün tuita tüikya.

¹⁷Pangnu achwon laxle fongsax üima, ‘Athaxpi oman, nguihüi! chemthüikoxle sütling pangnu wüi achwondaoa’ le ahyen daokyabu se ang oda tsanle apao.

¹⁸Ikoxle hwom pangnue wüi ata füima ata-e le, ‘Münnguitsuaküi, taxma ta thüikox’ le thüi ang süt. Owang angkya mixe thüi: ‘Kue haxtok tuita shakle kopdaoa, ku a ija to hu ang pao angkya changle, sütaxma ta thüikox.’

¹⁹Mama mixe thüi: ‘Kue zangmo ang maihu han aga shakle kopdaoa, ku a ijabu wanle ano ang paoüi, sütaxma ta thüikox.’

²⁰Ata mixechu wüi thüi: ‘Athax kue kako tankop daoa, ku hüi ang münthoüi changa.’

²¹“Da chatlaxle ibu pangwüi hopupa hama wün. Opupa ang mongma, ilaxle chixe chix da füi akax, ‘Momlax! tingjang angkya hia osam osyen to ngokyabu mixshix-zasa, chifai-chaknyai, miksut naba hia ofai oshokbu hwople apüihüi.’

²²Ifüima aluile homle chingole dae thüi: ‘Opunu, nang kax ningle mokdaoa, ikoxle ngwotnui chatlechu tüihu le.’

²³Chatlechu hopupae da ang thüi: ‘Ja-lyet lomnu hia faokat-suiwün lom to paokox, ilaxle ku hom nax awang ang, tütale wüi changlax hwom sele apüikox.

²⁴Chemthüikoxle kue thüipu, ami ahyendaokyabu owachu ku fongsüt ma hak ang münkoxüi!’”

²⁵Hanpak tuita ma khünaknu othom chongkya Jisu füi tomle aham ngoponge, chixe aküile hulaxle hwom ang thüi:

²⁶“Ku hato hüikya owachu, chixe manu mapa, ma kako hia susabu, mana manaobu ilaxle ma to alüile künkya thak to ku to chiluaba, ku wangshem ang achang ang müntho.

²⁷Ku füito ma pünsak pai laxle chihüikya mix ku wangshem ang achang ang müntsuak.

²⁸“Hünzom khama owawae long katuk zün zingse jangtsuba, mwot ashuk aza tang ngun chitüi hia tüipuixle awan ang, owangole chix thung üntoxle otha otukux sütüihex, ija ajangle kop angkya changle.

²⁹Chixe ile chimok kop jangthüiba, ocha zaile mokfüima chixe mwot ashuk ang chithoüi; ilaxle ile changkya angün-ngün noke chix chanyiüi.

³⁰Hwome thüiüi, ‘Ija mixsüne zing ang owang wanglanlaxle ashuk ang chitsuak langle!’

³¹“Chichangba süpahi jatbün füikya wanghom tuitae hozui wanghom zan to kaüima, chix füi azan ang jattsa kop laxle hüikya wanghom füi apong ang chithoüi hia thoüihex le, pongwangma wüi thung laxle ajangle kop angkya oli changle.

³²Chixe chithoüi ningle jangchangba oba atsaile tüiponge wüi achale, chix hato kaxho mix akatle, muamüi angkya bama zangwün angkya changle.

³³Ilailaile chix ma atüitüi bakle chiawüt tox jangthüiba hünzom kha angkya owachu ku füizuimix ang achang ang müntho.”

³⁴“Hum amüikya, ikoxle ija tikya jang-amütdao thüiba, chatle ija atik tsuak angkya olom müntüi.

³⁵Athax ija a haxwan zongmachu münmüi üntoxle pangtsa süinui zongmachu münmüi; khünake ija awütüi. Owa ma na zaipuix chixe apalax.”