Read Wancho Naga Luk 15 Bible Online

Luk 15 - Wancho Naga bible

Luk 15

¹Nyixta süisai mixbu hia noke awütle thomkyabu Jisu kax apa ang nguipongma,

²farisi hia Wanlom tsingpabue chanyile thüi: “Ija mixsüne ochax khünakbu pongle kople ilaxlechu hwom füi tomle sax-lingle!”

³Ija khoma Jisu-e hwom ang ija kaxpan apua:

⁴“Thütba hünzom khama mixhuak tuita ang chun hota tüiüi, ikha angkya tuita max; ikoxle chixe büthüiüi? Chixe mama puli bün aku osüt sax ang danle toxlaxle, ma-atak ma-atak le ija maxkya lom ang paoüi.

⁵Otue chixe ija ataküi hex, chixe huanuma mongmüi laxle, ija chun chix ngomtong ma awexlaxle hom to chatüi.

⁶Ifüima chixe hozuikhuibu hia tomzibu nyaklaxle thüiüi, ‘Ku füi tomle mongmüikox, ku chun maxkya atakdaoa.’

⁷Ilailaile kue hünzom ang thüipu, monglüi angkya chitüikya otsao khünak pulibün aku füi ochax khünak tuita mongchatle hüikya zuma wüi zangkangting to mongmüi huanu changüi.

⁸“Chichangthüiba thütba mixnu tuita ang ngunkhix bün tüikya kha angkya tuita max, ikoxle she e büle hwonüi? She e wüntik atsopüi, homzüile, ma-atak ma-atak le onuk ozong pangnu khato wüi khütmüt le lomüi.

⁹Otue she e ija ataküihex, hozuikhuibu hia tomzibu nyaklaxle thüiüi, ‘Kufüi tomle mongmüikox, ku ngun maxkya kue atakdaoa.’

¹⁰Kue hünzom ang thüipu, ilailaile ochax khünak tuita mong chatkya ma zangkang kaxtaimixbu mong huanuma müiüi.”

¹¹Jisu-e thuithui le akaxle le: “Kaile mixpa tuita ang sasün naosün anyi tüikya.

¹²Naolipa mixe chix ang thüi: ‘Apa, nang bwotba kha angkya kue kopsese athax wüi laxhüi.’ Ikhoma ija mixpae chix bwotba sasün nyi ang matsyentsyen ahanle kox.

¹³Hanpak hidaole ngo laxle sasün naolipae chix tuina hang ilaxle hom angkya laile pao. Ikha to chixe chix ngunsyen chix mong atsutsu saxmokle shixshixkhaxle bak.

¹⁴Üntoxle chixe ngunsyen komkya füima, chix ngokya nok to tuinu nuaknu hüi, ilaxle chix ma chemchu chitüile chak-hua ma tox.

¹⁵Ikhoma chix ikha tokya nokpu sün tuita hom to mwotmok ang pao, ilaxle ija mixsüne chix wak nye ang akat.

¹⁶Waksüt ang koxkya zokdua ngaxchu saxsele chixe thüt, ikoxle chix ang ingaxchu kox angkya mix chitüi.

¹⁷Oshukma chix ang khangka hingle hüi, ilaxle thüi: ‘Apa hom to mwotmok mixbu ang ngaxchu hwome saxkya boma onüi atakle ngopu, ikoxle kua ikha to woknuake ziüi khakha!

¹⁸Ku achexle apa hom to chatle chatüi, ilaxle apa ang thüiüi, apa kue Zang zongmachu üntoxle nang zongmachu achaxdaoa.

¹⁹Ku ang hünsa le nyak ang münasu; nang homkha ma mwotmok mix da tuita ningle ku pongle kop-hüi!’

²⁰Idaile chix ajong ilaxle hopa hato chat ang achex, “Chix ochu to tüiponge wüi hopae chix ngünle lax; chix mong ma chingchae awang, üntoxle ziklaxle chixe chak füi thuile sasün to kün, ilaxle chix füi tun apong.

²¹Hosae thüi: ‘Apa, kue Zang zongmachu üntoxle nang zongmachu achaxdaoa. Ku ang athax hünsa le nyak ang münasu.’

²²Ikoxlechu hopae dabu nyaklaxle thüi: ‘Momlax, nyiza amüimüi apüilaxle chix to awunle laxkox. Chix chakkhi ma khoptüt langle laxkox üntoxle cha ma chisox soxle laxkox.

²³Ifüima maihusa anutnut tuita apüilaxle langkox, üntoxle fongkhale mongmüihax!

²⁴Chemthüikoxle ija kusa zidaokya changle, ikoxle chix athax azangle tüile; chix maxdaokya, ikoxle athax chix atakdaoa!’ Idaile fongkha ang süt.

²⁵“Iponge tüichongpa a zang to kale ngoünkya. Chix wünwangle homha kopkya zuma, tsai ngaokya hia shwonkyadu zing atat.

²⁶Ikhoma chixe da tuita selaxle idu chempang thüipu le atüi.

²⁷Ija dae chix ang thüi: ‘Hünnao chatle nguiüna, chix müimüi zangngaile, chem ozik omüt chitüi le atak koxle hünpae maihusa anutkya tuita langle fongkha puta.’

²⁸“Hotüi mong huanuma tsik ilaxle chix homkha to ngaxchu chidong; ikoxle chix hato lai laxle hopae donghüi le jox-shwom.

²⁹Ikoxle chixe hopa kax to lan, ‘Hulax, ibibi zangpua da tuita tukux kue nang hanpakma saxmokpu, üntoxle kue nang kax ma chilaxle otuechu chitüi, ikoxle nange ku ang chem fadao? Kuechu zuikhuibu füi fong naxkhalax le zwon tangtang ngaxchu chifa tsuakkya a!

³⁰Ikoxle ija hünsae nang ngunsyen shix-shix-khax le bakpu, ikoxle otue chix hom to nguipuix, chix hanpakma nange maihusa anutkya namlang!’

³¹Hopae lan, ‘Kusa, nang ikhama othuithuima ku füi tomle ngopu, ilaxle ku ma atüitüi bakle nang kux.

³²Ikoxle keme mongmüi laxle fongkha angkya olom changle, chemthüikoxle hünnao zidaokya, ikoxle athax azangle tüile; chix maxle ngokya, athax chix atakdaoa.’”