Read Wancho Naga Luk 16 Bible Online

Luk 16 - Wancho Naga bible

Luk 16

¹Üntoxle Jisu-e chix wangshembu ang thüi: “Hakpa sün tuita ang chix tuina to apu-achangle hume ang da tuita tüikya. Da khohang le, chixe hopunu ngunsyen shixshixkhaxle changtüia le chix hama wünle kox.

²Ikhoma hopupae chix nyaklaxle chix ang thüi: ‘Nang bama kue atatkya chempang changkox? Nang mwot akiak-azyakkya ahohu, chemthüikoxle nange da akhokya ang owüi moktsuaküi!’

³Ikoxle dae chix mongto thüi: ‘Opunue ku mwot züt angkya changüi, kue chem moküi? Kue haxthwot nang chitho, ilaxle jusax ang aham ang nang azak.

⁴Kue mok angkya athax kue awandaoa! Otue ku mwot angkya apao üihex, ku hwom hom to sele kop angkya zuikhuibu ku ang tüikox wüi müi angkya changle.’

⁵Ikhoma chixe hopunu ang thashe atüitüi komle nyaklaxle, owang angkya ma atüi, ‘Opunu ang kox angkya thashe nang ma otukux tüi?’

⁶Chixe lan, ‘Münga pe hota.’ Üntoxle chixe chix ang thüi: ‘Akiak kya nang lai ija laxlax, thung üntoxle momle punyi bün le zalax.’

⁷Üntoxle chixe mama mix ma atüi, ‘Nang machu thashe otukux tüi?’ Chixe lan, ‘Tsax khia hota.’ Chixe chix ang thüi: ‘Akiak kya nang lai ija laxlaxle thung üntoxle momle puli le zalax.’

⁸Üntoxle hopunue iningkya huxtsing-loptsang mwot khoma chix da mün achuak; chemthüikoxle zangngai tokya khünakbu füi zangnak tokya khünakbue wüi matsyem madang tu ma huxtsing-loptsang mwot makhange tata to kho-jo ang onüi awanle.”

⁹Chatlechu wüi Jisu-e akaxle thüi: “Ijapue kue hünzom ang thüipu: Chaxwannu ngunsyen füi zuikop manlax, ikoxle otue ija ashuküihex, oshuk chitüikya hom to Zange nang pongle kopüi.

¹⁰Opang to muaküsa mwot bama mongong tüiüihex, chongkya mwot bamachu wüi mongong tüiüi; ikoxle owa muaküsa to tsetselopüi hex, chixe chongkya tochu tsetselopüi.

¹¹Ijadaile chaxwannu ngunsyen twon angkya bama ngaxchu hünzom to mongao, ikoxle otsingtsing ngunsyen twon ang hünzom ang owae koxüi?

¹²Chaxwannu ma tüikya mix jali bama ngaxchu nang to mongao, zangkang tokya hünzom kux tsingtsing ikoxlechu hünzom ang owae chem mongong laxle koxüi?

¹³“Da owaechu hopunu anyi mwot azyep le mok ang müntho, chemthüikoxle chixe tuita thua anuüi ilaxle ata to mongkünüi; chixe tuita to onüi akhexüi ilaxle ata mix ahaiüi. Nange Zang hia ngun hokhi monyi mwot azyep le mok ang müntsuaküi.”

¹⁴Otue farisibue ijabu kax atat, hwome Jisu ajao, chemthüikoxle hwome ngun towüi kün.

¹⁵Jisu-e hwom ang thüi: Hünzome hünzom alüile khünak thüntho ma hünzom chithai kya ang achangle, ibachu Zange hünzom kün-mong awanle; chemthüikoxle khünak zong to thanu-juapa le ekya bwot Zang zongma tüta ziakhochu münngui.

¹⁶“Juhan nguikya kople Mosa Wanlom hia ajebu chakza mwot ma hüile wüi tüikya; ipongma Zang Wangting bama Kaxho Müikya apuk ilaxle ikha to pangnu wüi atinle nop.

¹⁷Wanlom khapta thaile lekya füi ding hia hax max angkya wüi ochwon.

¹⁸“Owae ma kakonu apaolaxle mama mixcha laxüihex chixe chinunchakkaipu; üntoxle apaokya mixcha owae laxlaxüihex chixechu chinunchakkaipu.

¹⁹“Hanpak tuita ma, nyiza otha alixlix lax üntoxle nyixfole mongtex ma fongkhale saxlan le ngokya hakpa tuita tüikya.

²⁰Üntoxle makchake awang le jusaxmix Lazar le amünkya mixsün tuita tüikya. Chix a hakpa hwom zünkai ma ilele wüi danle tox.

²¹Ilaxle chixe hakpa sün tsap tokya dütkya saxfun sax ang kopüi le monghom. Hi-bu to apüile hüilaxle chix mak to chai.

²²“Ifüima jusax mix zi, üntoxle kaxtaimixbue chix Abraham zuima thung ang zangkangting fongkhat nui to pao. Hakpa sünchu wüi zi ilaxle akhün.

²³ilaxle chix amalumfang To sikngün ashukle ngoponge, chixe mik zaple thakchi to hukoxle ochu to chixe Abraham üntoxle chix zuima thungle Lazar le ngün.

²⁴Ija ma chixe akhongle nyak, ‘O Apa Abraham! Ku to chingchalaxle Lazar chakkhizae ti to thulaxle, ku le ma athwotle akong ang ajohüi, chemthüikoxle ija wünchua khato ku sikngün ashukle ngole!’

²⁵“Ikoxle Abraham-e chix kax to lan, ‘Kusa, nang ozün ma ngopongma, nang ang amüimüi pangwüi fadaopuix; ile Lazar-echu chix ang fakya amama kople hüidaoa. Ikoxle athax chix ikha to mongsom ma ngopu, ikoxle nang a sikngün ashukle ngopu.

²⁶Ibu boma chatlechu, kem bama otuechu chiashuk toxkya chongkya ohua tuita tüile, idaile kwom ha tokya owawachu, paosele texkoxlechu nang hato pao ang müntho, chichangthüiba nang ha tokyachu kwom hato ngui ang müntho.’

²⁷Üntoxle hakpae thüi: ‘Idaile Apa Abraham, kue nangma chingcha jupu, apa hom to Lazar tam achatkox.

²⁸Ikha to kutüi kunao hwom aga tüile. Chix chatlaxle hwom hato kax naxfa; ile chichang thüiba hwomchu wüi ija sikngün nui to hüiüi changa.’

²⁹“Ikoxle Abrahame thüi: ‘Hwom hama apua ang Mosa hia ajebu Lai tüile; hwome ibu kax ma naxlaxkox a.’ Chatlechu chixe thüi: ‘Münchang Apa Abraham, itatae mwot münthapüi.

³⁰Zidaokya mix hwom hato jangchat thüikoxtix hwom mong alüixüi.’

³¹Üntoxle Abrahame chix ang thüi: ‘Hwome Mosa hia ajebu kax ma chilaxba, zidaokya mix chatle nguikoxlechu hwome münongüi.’”