Read Wancho Naga Luk 17 Bible Online

Luk 17 - Wancho Naga bible

Luk 17

¹Jisu-e chix wangshembu ang thüi: “Khünak ochax to düt angkya olom ma dütlaxüi, ikoxle owae ile adüt ang koxlaxpuix, chix maxsax!

²Ibu hixkyabu khama tuita ngaxchu owae ochax to adüt laxüihex, chix hanpakma dingkux ma long fün laxle tinu khato fütle dütkya wüi amüikya.

³Hünzome malualua to khünli lax. Nang tüinaoe nang zong to jangachax thüiba, chix to sakox, ilaxle chixe mong jangalüix thüiba chix ang thailak laxkox.

⁴Üntoxle chixe nyixta kya bama othom anüt ma nang zong to jang achaxba, üntoxle othom foto, ‘Kue mong alüixpu’ le chatle jangakax thüiba, nange chix thaikya bama thailak kox angkya wüi.”

⁵Wangshembue Jisu ang thüi: “Kwom mongong achenhüi.”

⁶Jowanpa-e lan: “Hünzom ma mongong suili tsang tukux ngaxchu jangtüiba ija fupsa pün ang, ‘Nang fuak laxle tinu khato küilax!’ le thüi ang tsuakse üntoxle ijae hünzom kax ma laxse.

⁷“Thütba hünzom khama tuita ang zangmo angkya chichangba chun nyekya mwot mok angkya da tuita tüi. Otue chix zang to ka kya wünwangüi hex, hünzome chix ang, ‘Kangmomlax üntoxle ija fong saxlax’ le thüizaicha?

⁸Münthüi tüi angpu! Itülüi hünzome chix ang, ‘Ku fong fexkox, üntoxle nyi akhak laxle kue saxling kya matsuak matsuakle hume hüi, ifüima tix nange saxlax’ le münthüi tüi angpuix nyi?

⁹Dae chix kaxtom ma saxmok koxle hopunue chix ang münchong fa angchami?

¹⁰Ile hünzomechu hünzom ang atomtom mwot bakle moktsuak füima thüilax, ‘Kwom chingui-chiwangkya dabu changle; kwome chem mokse tsyen hex ija tata moktsuak wüi.’”

¹¹Jisu Jerusalem to nguile ngoponge, chix a Samaria hia Galili longzipong makhange lele ngokya.

¹²Üntoxle chix tingkhua tuita to nguikya ma angwonbu mixhuak bün chix füi apong,

¹³üntoxle ochu to tüitanto wüi ajong laxle akhongle hwome thüi: “Jisu, Nwotmix! Kwom to chingcha hüi.”

¹⁴Jisu-e hwom ngünkya zuma, chixe hwom ang thüi: “Paolax, üntoxle nguapabu hato hünzom tsangtsa aholax.” Hwom paole lomba to tüipongma wüi hwom kak müi.

¹⁵Üntoxle hwom kha angkya mixsün tuitae, chix kak müiüna le ngünkya zuma, chixe akhongle Zang mün achuakle anong chat.

¹⁶Üntoxle Jisu chitongma akhuxlaxle chix ang münchong kox; ija mixsün a Samaria khünak changkya.

¹⁷Ikoxle Jisu-e thüi: “Mixhuak bün kak amüikya münchang hia? Ikoxle mixhuak aku a omaün?

¹⁸Ija mixnoksün boma Zang ang münchong fa ang chatkya owachu müntüi tsuak hexnyi?”

¹⁹Üntoxle Jisu-e chix ang thüi: “Zolax ilaxle paolax, nang mongonge nang amüidaoa.”

²⁰Zang Wangting otue hüi angkya hex le züizüi farisibue Jisu ma atüi. Chixe lan: “Zang Wangting a mike ngünkya lima hüiüi münchang.

²¹Owaechu, ‘Hulax, ikha to tüile!’ chichangba, ‘Chukha to tüile!’ le münthüiüi; chemthüikoxle Zang Wangting a hünzom khama tüile.”

²²Ifüima chixe wangshembu ang thüi: “Hünzome Khünak Hosa din nyixta ngaxchu namngünse le sungkya tuk hüiüi, ikoxle hünzome ija münngünüi.

²³Hünzom füi ile akax angkya khünakbu tüiüi: ‘Chukhato hulax!’ chichangba: ‘Ikhato hulax!’ Ibachu ito hu ang laile taxpao.

²⁴Tüchi tokhange tüchi kople nyanle ding to zangchang ajepkya ningle, Khünak Hosa din ma changüi.

²⁵Ikoxlechu owang ma chix a huanuma sikngün angkya üntoxle anyix ngainyix kya khünaknue chilaxle awüt angkya changle.

²⁶Khünak Hosa dinchu Noa din tokya ningle changüi.

²⁷Noa khua ma dongkya nyix kople, üntoxle tinu mualyem kya hüile hwom ma-amütmütba khünaknue saxlingle üntoxle aju-asom le wüi ngokya.

²⁸Ija a Lut din tokya ningle changüi. Pangnusae wüi saxlingle, hang-jole üntoxle shak-sün le, küi-thwomle hia homzing pungzing le wüi ngokya.

²⁹Ikoxle Lute Sodom tingkhua dantoxlaxle laile paokya nyix ding tokya zangwat ningle wün hia longkhik düt, ilaxle hwom pangnu lang.

³⁰Khünak Hosa ngaile ahokya nyixchu ile wüi changüi.

³¹“Ija nyix opang homkho to asuüihex, hommong tokya ngunsyen lax ang taxju ngo; ilaxle owa zim-hax to asuüihex chix hom to taxchat ngo.

³²Lut kakonu bama ajangle koplax.

³³Owae ma khosün ang azongüihex chix maxüi, ikoxle owae matsün amütüihex chix sünüi.

³⁴Kue hünzom ang thüipu: Ija ja lya tuita ma mixhuak anyi jiple asuüi; tuita a laxlax toxüi üntoxle ata mix a dantoxüi.

³⁵Sheko anyie tomle thomthu le asuüi; tuita a laxlax toxüi üntoxle ata mixcha a dantoxüi.

³⁶Mixhuak anyie haxtok ma zangmo le asuüi; tuita a laxlax toxüi üntoxle ata mix a dantoxüi.”

³⁷Üntoxle wangshembue chix ma atüi: “Jowanpa, ojong khato?” Jisu-e lan: “Ojong khato müimang tüiüihex, okun ikhama asoxüi.”