Read Wancho Naga Luk 18 Bible Online

Luk 18 - Wancho Naga bible

Luk 18

¹Mong chihix le othuithuima zangjop angkya changle le chix wangshembu hama apua ang Jisu-e ija kaxpan tuita akax.

²“Tinglong tuita ma kaxfünmix tuita tüikya, ikoxle chixe Zang thuachu chiza, khünakchu chie.

³Üntoxle ija tinglong ma zomnu tuita tüikya; she chix hato obi thomthom ma hexle nguilaxle akax, ‘Ku zong to chichangle tüikyabu bama kaxfünle süfahüi!’

⁴Kaxfün münfapu le chix ozulole angam; ikoxlechu ofüima chix mongto zangwün, ‘Ku Zang thuachu chiza üntoxle khünakchu chie le tüikoxchu,

⁵ija mixchae chatwüi chatle ku to zwomle ngokya khoma, kue she hanpakma kaxfünle anoüi, ile chichang thüiba she chatwüi chatle ngui ngokyae ku ting wüi atuiüi!’”

⁶Chatlechu Jowanpa-e thüi: “Chitsaokya kaxfünmixe akaxkya apalax.

⁷Üntoxle Zange zünle kopkyabu opange hwom to asunhüile zangnak zangngai chix nyakle akhongle ngopuix, chixe hwom khosele kaxfün münfaüi hia? Üntoxle hwom khosele kaxfün ang shen ngoüi hia?

⁸Kue thüipu, chixe hwom chima sele kaxfün chwonle wüi faüi. Ile changkoxchu chix nguikya zuma chaxwannu ma Khünak Hosae mongong ataklax angma hex?”

⁹Üntoxle khünak züizüi hwom lualua to atsaole ong laxle mama pangnu wüi ajaole ngokyabu füi Jisu-e ija kaxpan akax:

¹⁰“Hanpak tuita ma mixhuak anyi Zangshwom hom to zangjop ang dong; tuita a Farisi khünak üntoxle ata mix a süisai mixle changkya.

¹¹“Farisi khünak chixsüisüi to ajong üntoxle chix mongto ile akaxle jop: ‘O Zang, ku mix khünak, apamkyabu, chitsaokyabu hia chinunchakkaikyabu ningle chichang ilaxlechu ija süisai mix ningle chichangkya khoma kue nang ang münchong fapu.

¹²Hatdang to kue anyi pongma chisax chilingle atsaole joppu; kue akopkop pangnu li angkya bün ma thomta nang ang danpu.’

¹³“Ikoxle süisai mix ochu to ajong üntoxle chixe dingchi to thün aho ang chitsu, ikhoma chixe ma khaxtok ma chietle thüi: ‘O Zang ku a ochax khünak tuita changle, ku to chingcha hüi!’

¹⁴Jisu-e thüi: ‘kue hünzom ang thüipu, Farisi mixsün füi süisai mix wüi Zang miksho ma sule hom to chat. Chemthüikoxle owa malualua to bong-chongüi hex, chix ahixkya ang achangüi; ikoxle owa malualua to hixkya ang achangüihex, chix chongkya ang achangüi.’”

¹⁵Üntoxle Jisu-e hwom to chix chak füi naxtwon le züizüie chix hato naosombu apüi; üntoxle otue wangshembue ija ngünlaxpuix, ile changkya khoma hwome ibu to sa.

¹⁶Ikoxlechu Jisu-e naosombu chix hato sele thüi: “Naosombu ku hato hüi ang laxkox, hwom taxabax; chemthüikoxle Zang Wangting a hwom ningkyabu hanpak changle.

¹⁷Ija ku kax mong ma koplax, Naosa tuita ningle opange Zang Wangting pongle chikopüi hex, hwom ikha to münnop tsuaküi.”

¹⁸Jehudi nok apün-adakya mixsün tuitae Jisu ma atüi: “Müikya Nwotmix, oshuk chitüikya khüzün tsün atak ang kue chem moküi?”

¹⁹Jisu-e chix ang thüi: “Nange ku ang ‘Müikya’ le büthüikoxle nyakpu? Zang boma müikya owachu müntüi.

²⁰Nange Zang Kaxtom ibu awanle ngopu: Chinunchakkai taxtüi, mix taxlang, taxahux, mixkho taxhang, manu mapa chathua zalax.”

²¹Ija mixsüne thüi: “Ibu kaxtom pangnu kue naosom tokhange wüi mokle hüipu.”

²²Otue Jisu-e ija kax atat, chixe chix ang thüi: “Athaxchu nange mok angkya oli tuita tüile. Nange nang ma atüitüi bakle hanglax ilaxle ngun mixshix-zasabu ang ahanle laxkox, üntoxle zangkang to nang ahak-aluakya tüiüi; üntoxle oman, ku füito hüilax.”

²³Ikoxlechu ija mixsüne otue ija kax atatpuix, chix ang huanuma mongma; chemthüikoxle chix a huanuma ahak-aluakya mix tuita changkoxle.

²⁴Chix ang mongtsik kya ngünlaxle Jisu-e thüi: “Hakpa luapa hanpakma Zang Wangting to nop ang otukux tsakpuix!

²⁵Mütkui mik makhange ut litle leüi füi ngaxchu aluakya mix Zang Wangting to nop angkya wüi sütsakle.”

²⁶Ija chix kax atatkya khünakbue atüi: “Jangchangba owapi süntsuak angkya?”

²⁷Jisu-e lan: “Khünak zong to chitho angkya oli Zang zongma tsuak angkya oli changle.”

²⁸Ifüima Pitar-e thüi: “Hulax, nang man toüi ma kwome hom-pung komle dantoxpu.”

²⁹Jisu-e hwom ang thüi: “Changle, otsingtsing ma kue thüipu, Zang Wangting khoma opange hom-pung, kakonu, hotüi-honao, honu-hopa üntoxlechu su-sabu dantox laxpuix;

³⁰chixe athaxpongechu huanuma kop-loüi, üntoxle füichi machu oshuk chitüikya khüzün tsün ataküi.”

³¹Jisu-e wangshembu süile mama khato pao ilaxle hwom ang thüi: “Apalax, kem Jerusalem to nguiüi, ikha to Khünak Hosa hanpakma ajebue zale toxkya pangnu changle kotok to ngaiüi.

³²Chix a mixnokbu ang owüiole koxüi; hwome chix haoüi, adix-adaüi, ilaxle chix to thuake thuaküi.

³³Hwome chix to müikhwon zu füi fitüi ilaxle langüi, ikoxle nyix azom lükya to chix chatle azangle zoüi.”

³⁴Ikoxlechu ijabu kax tuitachu wangshembue awan ang chitho; akaxkya kax hwome awan ang chikoxle pyenle thom, idaile Jisu-e akaxkyabu hwome chiawantsuak.

³⁵Jisu Jeriko hato nguile tüiponge lomkax ma mikduak tuita thungle tüikya. Chix a jusax ang thungle ngokya.

³⁶Chixe khünaknu chix zui makhange ozyem ma leüi zing atatlaxle atüi: “Ija chem?”

³⁷Hwome lan: “Nazareth nok Jisu leputa.”

³⁸Chix akhong: “Jisu, Dawid Hosa, ku to chingcha hüi.”

³⁹Thochi angkyabu thome chix to dangjale ngoünle sa. Ikoxlechu chix sisile akhong: “Dawid Hosa, ku to chingcha hüi.”

⁴⁰Ikoxle Jisu-e tünle ajong ilaxle mikduak mix chix hato apüi angkya kaxkox. Chix soxle hüikya zuma Jisu-e chix ma atüi,

⁴¹“Nang hanpakma kue chem naxmok le texpu?” Chixe lan: “Jowanpa, kue tam chatle ngünse tsule.”

⁴²Jisu-e chix ang thüi: “Athaxpi ngünlax, nang mongonge nang amüidaoa.”

⁴³Ima wüi chixe ngün ang tho, ilaxle Zang mün achuakle chixe Jisu man to. Ija ngünlaxle khünaknue Zang ang münchong fa.