Read Wancho Naga Luk 19 Bible Online

Luk 19 - Wancho Naga bible

Luk 19

¹Üntoxle Jisu a Jeriko akaile lele ngokya.

²Ikha to hakpa khünak süisai mix khama akhokya, Zakaria le amünkya mixsün tuita tüikya.

³Chixe Jisu owahex ang ngünse tsu, ikoxlechu chix mixmox daile khünake tukle Jisu ngün ang chitho.

⁴Idaile chix thochi to zikle lelaxle, imakhange lekya zuma Jisu ngün ang fupsa kho to nga.

⁵Otue Jisu-e ikha alop, chixe angakle hulaxle Zakaria füi akax: “Momle juhüi, Zakaria, aja ku nang hom ma athong angkya changle.”

⁶Zakaria nonokhaile ju üntoxle mongmüi atungle chix wün pongle kop.

⁷Ija ngünkya khünaknue chix wün ahaile akax: “Ija khünak ochax mix hom to athong ang paotüia!”

⁸Zakaria ajong üntoxle Jowanpa ang thüi: “Apalax Jowanpa, kue ku bwotba süifi chitüi-chinangkyabu ang koxüi, üntoxle kue owawa dyen-ngankya jangtüidaoba, kue chix ang othom alie nüile achat koxüi.”

⁹Jisu-e chix ang thüi: “Anyixkha ija hom ma khosün nguingole; chemthüikoxle chixchu wüi Abraham sasün changle.

¹⁰Khünak Hosa a maxdaokyabu lom ang hia sün ang nguipu.”

¹¹Khünaknue ija kax apale ngoponge wüi ito bole Jisu-e hwom hama kaxpan ija akax. Athax chix Jerusalem hato soxünkya, ikoxle Zang Wangting thuile laiüi le hwome thüt.

¹²Ijadaile chixe thüi: “Ochu tokya chaxwan to wanghom ang achang ang pao ifüima hom to chat angkya mwot chak ma kop laxle alixachong tuita tüikya.

¹³Chix achexüi ma, chix da hwom mixhuak bün nyak ilaxle hwom ang hun ngunkhix tupong koxlaxle thüi: ‘Huhax, hünzome ku chitüi tama otukux thalex tsuaküihex.’

¹⁴Ikoxle ikha tokya nokpubue chix to chilua ilaxle chix füima lüile kaxhomix achatle thüi: ‘Ija khünak kwom wanghom ang achang angkya to kwome münlua.’

¹⁵“Ija khünak wanghom ang achang laxle chat. Nguikya thuile chix dabu nyakle asox, ilaxle hwome opongle alapdaopuix ang akiak.

¹⁶Owang angkya mixsün hüi ilaxle thüi: ‘Opunu, nange tuita wüi koxkya hun ngunkhix füi kue mama bün hun ngunkhix alapdaoa.’

¹⁷Chixe thüi: ‘Müidaoa, nang müikya da changle! Hixkya mwot to nang khünkhi koxle, kue nang ang nok bün apün ang koxpu.’

¹⁸Ifüi angkya dachu hüi ilaxle thüi: ‘Opunu, nange tuita wüi koxkya hun ngunkhix füi kue mama aga hun ngunkhix alapdaoa.’

¹⁹Ija da angchu chixe thüi: ‘Nang angchu nok aga apün ang koxüi.’

²⁰“Mama da hüi ilaxle thüi: ‘Opunu, ija nang ngun a; ija kue nyifüi loplaxle khomle thomkya changpu.

²¹Nang zongzankya mix changkoxle ku a nang thua zapu; chemthüikoxle nang kux chichangkya nange lax üntoxle nange chisaikya khato nange züt-tüi.’

²²Chixe ija da ang thüi: ‘Nang a chilaxli da changle! Athaxkya nangkax kue nang thajao ang wüi twonüi. Ku kux chichangkya kue lax üntoxle kue chisaikya khato kue züt ilaxle ku zongzankya mix changpule nange awan ngünlaxle.

²³Müipu, ikoxle nange ku ngun ngun-thomnui to koxle büthüikoxle chithom? Ile jangthom thüikoxle achatkya zuma kue hidaole olap kopse.’

²⁴“Ifüima chixe ikhama ajongle ngokya ang thüi: ‘Chix angkya hun ngunkhix laxdao ilaxle ngunkhix bün füikya mix ang laxkox.’

²⁵Ikoxle hwome chix ang thüi: ‘Opunu chix ma bün tüingoün khato hi?’

²⁶Chixe lan, ‘Kue hünzom ang thüipu, owa ma hidaole tüiüihex, chix ang aluile koxüi; ikoxle chemchu chitüikya mix angkya chix ma hidaole tüiküsa ngaxchu paoüi.

²⁷Idaile ku hwom wanghom ang achangsele chitsukya ku zanbu ikha to apüihüi ilaxle hwom ku pomtho ma langkox.’”

²⁸Jisu-e ija akax ilaxle hwom tho to achale Jerusalem to ngui.

²⁹Olip haxhua angkya Bethfes hia Bethani tingkhua zui to hüikya zuma, chixe ijabu kax füi wangshem anyi achale tsanle apao:

³⁰“Hünkhi thüntho angkya tingkhua to dongkox; hünkhi dongle ngoponge, otuechu khünak mangakya Gatho hosa fünle hünkhi thoma bangüi. Ija dalaxle ikha to apüihüi.

³¹Owawae chem ang dapu le hünkhi to jangtsaba, ‘Opupae lomputa’ le kangthüi.”

³²Okhi paokya zuma Jisu-e akaxkya lailaile pangnu bang.

³³Okhie Gatho hosa dale ngoponge hopunue tsa: “Hünkhie ija chem ang dangopu?”

³⁴Okhie lan: “Opupae lompu ta.” Üntoxle hokhie Gatho hosa Jisu hato apüi.

³⁵Ifüima hwome hwom nyibu ija müi dingma nom ilaxle Jisu idingma angat.

³⁶Chix ngalaxle lengo ponge khünakbue lomtang to hwom nyiza nomle kox.

³⁷Chix Jerusalem hato nguile, Olip haxhua chito jukya lompong ma tüiponge, hwome ngünkya chongkya ohünotün mwotbu khoma chix wangshembu hia khünaknu othome Zang mün achuakle akhongle thüi:

³⁸“Jowanpa mün ma nguikya, Chongwang to Zange mohiman hüi! Zangkangting to mongsom üntoxle Zang ang fuazangkya naxchang!”

³⁹Othom kha angkya züizüi farisibue akaxle Jisu ang thüi: “Nwotmix, nang wangshembu ang dangün le thüikox!”

⁴⁰Jisu-e lan: “Kue hünzom ang thüipu, hwom dangkoxlechu longbue hwom lualua to akhong ang sütüi.”

⁴¹Chix tingnu hato namle ngui, üntoxle chixe ija ngünkya zuma chixe ija tingnu hanpakma sople thüi:

⁴²“Nange anyixkha mongsom tüi angkya bama laxli awanle koppuix thüikoxba! Ikoxle athax nange ija ngün ang chitho!

⁴³Chemthüikoxle zanbue akhople kopkya hanpak nang hato hüiüi; hwome nang kat-wün lom pangnu tsyenüi, ilaxle pangnuchi tokhange nang to singüi.

⁴⁴Üntoxle hwome nang hia nang wankam ma ngokya khünakbu amütüi; hwome chiatsun homle long tuita ngaxchu athünle chitoxüi, chemthüikoxle nang khosün ang Zang ngui angkya hanpak nange awanle chingo!”

⁴⁵Ilaxle Jisu Zangshwom-Hom to dong üntoxle thalex mixbu apao ang süt. Chixe hwom ang thüi:

⁴⁶“Zale thomkya ija tüile: ‘Ku Hom ang Zangshwom-Hom le nyaküi’, ikoxle hünzome ija, ahux-mix longkun ang achangdaoa.”

⁴⁷Üntoxle Jisu-e nyixfole Zangshwom-Hom ma hwon-ano le ngo. Ikoxle nguakhobu, Wanlom nwotmixbu hia apün-adakyabue chix mik amüt angkya ziasyen lomle ngo.

⁴⁸Ikoxlechu hwome ile sua angkya opong chiatak; chemthüikoxle pangnusae wüi kaxfa tuita chialyet le chix kax apa ang tsu.