Read Wancho Naga Luk 2 Bible Online

Luk 2 - Wancho Naga bible

Luk 2

¹Iponge Roman Wangting pangkha towüi khünak akiak angkya chongwangpa Agastas-e kaxkox.

²Ija owang lekya mix akiak ponge, Kuirinas a Siria ma gowarnor ang tüikya.

³Ifüima khünak pangnu wüi ma mün za angkya hanpakma ma tingshosho to ngui.

⁴Galili angkya Nazareth tokya Jusep Jehudi angkya Bethlehem, Wanghompa Dawid puxkya tingsho to ngui, chemthüikoxle chix a Dawid sixli changle.

⁵Chix füi tuizing-nazex daokya Meri kop laxle chix münza ang ngui. She a naowok ma tüikya,

⁶üntoxle hokhi Bethlehem to tüi ponge she ang nao ngün tu ngangle hüi.

⁷She e somwang nao lükasa pux, naonam nyi füi nam laxle naosa maihu süt khua ma thom, chemthüikoxle hwom ang hommong to ngo ang nui chitüi.

⁸Ija tui to, zang kotho to wünpomle ma chunbu nyele ngokya chun-nyetmixbu züita tüikya.

⁹Jowanpa kaxtaimix hwom hato ngai, üntoxle Zang fuazang kya e hwom to nyan. Hwom huanuma za,

¹⁰ikoxlechu kaxtaimixe hwom ang thüi: “Taxza! Ku ikha to khünaknu nok hato wüi mongmüi hüi angkya Kaxho Müikya füi nguipu.

¹¹Anyix kha Dawid tingsho ma Jowanpa Khrista hünzom khosünpa puxle tüile!

¹²Üntoxle ija bama hünzom ang münwan a ija changle: Hünzome naosa nyie nam laxle maihu süt khua ma danle thomkya ataküi.”

¹³Allele ija kaxtaimix füi tomle kaxtaimixbu othom lai, ilaxle Zang achuakle tsai ngao:

¹⁴“Zangkho atsua kya khato, Zang fuazang kya naxtüi; zangfang ma chix mongmüikyabu füi, mongsom naxtüi!”

¹⁵Hwom ha angkya kaxtaimixbu zangkho to chat füima, chun-nyetmixbue tata ang thüi: “Hai, kem Bethlehem to paohax ilaxle Jowanpa-e kem füi akax kya ningle changkyabu to huhax.”

¹⁶Idaile hwom momle pao üntoxle Jusep hia Meri nyi atak, üntoxle naosa maihu süt khua ma danle thomkya ngün.

¹⁷Chun-nyetmixbue ija naosa ngünkya zuma, kaxtaimixbue chix bama wün kya hokhi hama apua.

¹⁸Chun-nyetmixbue wünkya kax atatkyabu pangnu wüi abüt.

¹⁹Meri-e ibu pangnu texle atak üntoxle ibu hanpakma zule ajang.

²⁰Hwome atat kya hia ngünkyabu khoma Zang mün achuakle tsai ngaonga le chun-nyetmixbu chat; ibu pangnu kaxtaimixe hwom hama akax kya lailaile chang.

²¹Hatdang tuita füima, naosa Khwonzüt-Zom zing angkya hanpak nguile hüikya zuma, chix wok ma tüiüi tho towüi kaxtaimixe koxle toxkya mün ma, chix ang JESU le amün.

²²Mosa Wanlom ma tüikya ningle, athax Jusep hia Meri nyi hato atsaole zomzing angkya hanpak nguile hüi. Ijadaile hokhie naosa Jerusalem to pao ilaxle,

²³“Owangma puxkya lüka naosa nok wüi Jowanpa hanpakma atsaole kox angkya oli”, le Jowanpa Wanlom ma zale thomkya ningle chix Jowanpa ang kox.

²⁴Üntoxle Jowanpa Wanlom ma tüikya ningle, hwome chatlechu osu oshem tuita chichangba jua-o shem tuita le tö kox ang pao.

²⁵Iponge Simeon le amünkya mixpa tuita Jerusalem ma tüikya. Chix a müikya mix tuita, zangshwom ma zongkya üntoxle Israel khosün hanpakma tanle ngokya mix tuita changkya. Otsao Chasa chix ma tüikya.

²⁶Üntoxle tsaole thomkya Messaiah mangün tanto chix chizi angkya kax Otsao Chasae chix füi akax.

²⁷Otsao Chasae zunle Simeon Zangshwom-Hom to ngui. Wanlom ma tüikya zomzing ang otue honu hia hopa nyie naosa Jisu Zangshwom-Hom to apüi;

²⁸Simeon-e naosa chix chak ma twon üntoxle Zang mün achuak:

²⁹“Jowanpa, nang kaxtsao nange changle thomdaoa, athax nang kax ningle, nang da ku mongsom ma pao ang koxhüi;

³⁰Ku mik makhange kue nang khosün ngündaoa;

³¹khünaknu thüntho ma nange achwondaokya a;

³²Mixnokbu hato nang mongtex ngai angkya, zang-ngai üntoxle nang khünaknu, Israel hato fuazang apüi angkya bama.”

³³Ija naosa bama Simeon kax atatlaxle honu hopa nyi abüt.

³⁴Simeon-e hwom to mohiman ilaxle honu Meri ang thüi: “Ija naosa a, ama angkya bama üntoxle Israel khünaknu huanuma khosün angkya hanpakma Zange kamdaoa. Khünaknue owa mo amale wünüi hex ilaxle owae hwom huxsa mongtex angaile kox üihex,

³⁵Zang tokhange hüikya münwan ija ang chix achangüi. Üntoxle anax kya changlo tuitae tsunkya ningle, sikngün e nang mongto tsunüi.”

³⁶Ashar jat angkya Fanuel sasün ajenu Anna le amünkya azunu tuita tüikya. (She owüiole azu-ünkya; üntoxle she naocha ponge zang anüt hokakopa füi ngo laxle,

³⁷she zang puli ali nguile zomnu ang achangle hüi). She e chisax chilingle atsaole zangjop hanpak laxle anyixningchu üntoxle awünningchu ojao chidan le Zangshwom hom ma nui.

³⁸Ipongkhae she Zangshwom-Hom to nguilaxle Zang ang münchong kox, üntoxle Jerusalem khosün tanle ngokyabu pangnu hama she e ija naosa bama akax.

³⁹Jusep hia Meri nyie Jowanpa Wanlom ma tüikya komle mokle ashuk kya zuma, hwom Galili angkya ma tingsho Nazareth to chat.

⁴⁰Naosa tsong üntoxle tsak-hi-zong le tüi; chix hwon hia je e amünle tüi, üntoxle Zang mohimanbu chix ma tüikya.

⁴¹Jisu honu hopa hwom zangfo le Kaitox Pangpwon pangpua to Jerusalem to pao.

⁴²Jisu zangbün anyi ma tüipongma hwom paozaikya ningle pangpwon ma hak ang pao.

⁴³Ongai pangpwon ashukpuix, hwom hom to chat ang anong, ikoxle naosa Jisu a Jerusalem to ngo. Chix honu hopa hwome ija chiawan;

⁴⁴hwome chixchu othom khato jangwüi tüingoüna le thüt, ilaxle nyixtung le aham füima tix hwome ma-mixbu hia zuikhuibu khato chix tüichale hu ang süt.

⁴⁵Okhie chix chiatak, ikhoma chix lomle Jerusalem towüi chat.

⁴⁶Nyix azom lekya to tix hokhie chix Zangshwom-Hom to atak. Chixe Jehudi nok wanlom tsingpabu kax apa ilaxle chixechu hwom ma kax atüikyalibu atüile ngokya.

⁴⁷Chixe tsing-wan kya hia khosam chitüi le kaxlankyabu atatlaxle atatkyabu pangnu wüi abüt.

⁴⁸Chix ngünlaxle honu hopa nyi huanuma abüt, ilaxle honue chix ang thüi: “Kusa, nange kwom kho chemkuxma asampu? Hünpa kukhipi nang lom ang huanuma aban max daoa.”

⁴⁹Chixe hokhi ang thüi: “Hünkhie ku chemto lom ngokya? Ku Apa hom ma ngo angkya changle le hünkhie münawan hia?”

⁵⁰Ikoxle hokhie chix kaxlan awan ang chitho.

⁵¹Okhi füi tomle Jisu Nazareth to chat, ikha to chix hokhi kax ma laxle saxmok le ngo. Onue ibu pangnu wüi she mongto akhün le thom.

⁵²Jisu a tsangtsa hia je ma, üntoxle Zang hia khünaknu mikngün ma sule tsong.