Read Wancho Naga Luk 20 Bible Online

Luk 20 - Wancho Naga bible

Luk 20

¹Nyixta Jisu-e Zangshwom-Hom ma Kaxho Müikya bama hwon-ano le ngoponge, nguakhobu hia Wanlom tsingpabu, mixpa tüichongbu füi tomlaxle ngui.

²Ilaxle chix ang thüi: “Kwom hama apua hüi, chemtsak-chemzong füi nange ibu mokpu? Chichangba ibu mok angkya hanpakma nang ang tsakzong koxkya owa?”

³Jisu-e hwom ang thüi: “Kuechu hünzom ma kaxfa tuita atüifang.

⁴Ku hama apua hüi; Bapti fa angkya tsakzong Juhan hato Zang tokhange hüipia hia khünak tokhange hüipuix?”

⁵Hwome tata füi zangwünle thüi: “Keme chemle lanüi? Zang tokhange le thüi ang koxnang, ‘Jangchangba hünzome chix to büthüikoxle chiong’ le chixe wüi thüiüi.

⁶Ikoxle keme khünak tokhange le jangthüi thünchu, ibu khünaknu noke kem to longfüi thupüi; chemthüikoxle hwome Juhan chuwüi ajepa tuita changpule ongle.”

⁷Idaile hwome thüi: “Ojong tokhange hüipuix kwome münawan.”

⁸Üntoxle Jisu-e hwom ang thüi: “Kuechu, chemtsak-chemzong füi kue ibu mokpuix münapua.”

⁹Ifüima Jisu-e khünaknu ang kaxpan ija akax: “Hanpak tuita ma grep manzaikya mix tuita tüikya, üntoxle mwotmok mixbu ang hingmo chaomo angkya dantoxlaxle, chix mixnok ting to ozulole ngo ang pao.

¹⁰Üntoxle otu nguikya zuma manzai mixbu ma chix tsyen grep süisai ang da tuita tsanle akat; ikoxle manzai mixbue chix to fitmüi laxle ohua ma achat.

¹¹Anaolechu chixe da tuita akat; üntoxle hwome chix tochu wüi fit, chatlechu wüi zak akople hwon laxle chix ohua ma achat.

¹²Anaolechu chixe da azom lükya tsanle akat; üntoxle chix to sisi mak-kha laxle jwonle apao.

¹³Ifüima grep haxtok hopunue thüi: ‘Kue chemle hwonüi? Kue ku mongkün kusa akatüi; hwom chix chathua zaüi changtüi angpu!’

¹⁴Ikoxlechu mwotmok mixbue chix ngünkya zuma, hwome tata füi zangwün, ‘Ija a haxtok hopunu sasün jao changle; kemepi chix langhax, ilaxle mantswon angkya kem hato nguiüi!’

¹⁵Tamtaile hwome chix grep haxtok angkya achuale apao ilaxle langle awüt. Jisu-e atüi, ‘Athaxpi ija grep haxtok hopunue hwom to chemle hwonüi?’

¹⁶Chix nguiüi, üntoxle ibu manzai mixbu pangnu wüi oli thule amütüi üntoxle ija grep haxtok mama manzai mixbu ang koxüi.” Üntoxle ija kax atatkya zuma hwome thüi: “Ile büle changüi?”

¹⁷Ikoxlechu chixe hwom to hulaxle thüi: “Jangchangba, ‘Homzing mixbue chilaxle awütkya long, homkom-longnu akhokya ang achangüi! le zale thomkya a chem chang?’ le thüikya Otsao Lai Kax a chem?

¹⁸Ija long tok ma owa dütüi hex, chix akhixle amütüi, ilaxle owa ma ija dütüihex, ijae chix labu ang achangle akhixüi.”

¹⁹Ija kaxpan hwom to dyenle akax ngopule awanlaxle Wanlom tsingpabu hia nguapa akhokyabue ikhama wüi Jisu kop ang azong; ikoxlechu hwom khünaknu thua za.

²⁰Ilaxle hwome oshua to hule ngo. Künkox-mongkoxkya khünak ningle hüilaxle chix dyen angkya hanpakma hwome khünkhi-khikya khünak züita shak ilaxle kax atüikyabu füi Jisu tsün angkya hanpakma hwom tsanle apao. Apün-awangkyabu hia Roman gowarnor chak to chix owüiole koxtsuak angkya kuxmale hwome ile hwon.

²¹Khualop mix ibue Jisu ang thüi: “Nwotmix, nange chem akaxpuix üntoxle chem anwot-anopuix ibu pangnu thaikya müntüile kwome awanle. Nange khünak chifün to chihu homle khünak hanpakma Jowanpa mongtex otsingtsing apuapu le kwome awanle.

²²Kwome Roman gowarnor ang süi kox angkya olom chichang hia changpuix kwom hama apua hüi?”

²³Ikoxle Jisu-e hwom tsingtsang awanlaxle, hwom ang thüi:

²⁴“Ku ang jan ngun tuita ahohüi. Ijama khang zing üntoxle mün zale thomkya mix owa?” Hwome lan: “Ibu a chongwangpa mua üntoxle chix mün changpu.”

²⁵Idaile Jisu-e thüi: “Müidaoa, oja chongwang tsyen hex chongwang ang laxkox ilaxle oja Zang tsyen hex Zang ang laxkox.”

²⁶Ikhama khünaknu pomthoma hwome Jisu kop ang chitho, idaile Jisu kaxlan to abüt üntoxle khosam laxle hwom dangle ngo.

²⁷Zidaokya chatle münzotox le thüikya sadukibu züizüi chix hato ngui.

²⁸Ilaxle hwome chix ma atüi: “Nwotmix, owawae naosom chitox homle ma kakonu dantoxlaxle zikoxle, ija zomnu a zikya mix honao ma shongüi ilaxle chix hanpakma sixli alai angkya changle le Mosa-e kwom ang zale toxpu.

²⁹Ikoxle homkha tuita ma hotüi honao hwom mixsün anüt tüikya; tüichongpae sheko tuita lax ilaxle naosom chitox homle chix zile pao.

³⁰Üntoxle anyi lekyae ilaxlechu azom lekyae le she ma kako ang lax;

³¹Ile hwom mixsün anüt pangnue wüi she ma kako ang lax üntoxle naosom chitox homle hwom pangwüi zile pao.

³²Oshukma ija mixchachu wüi zile pao.

³³Ijadaile anaole zokya zuma she a hwom kha angkya opupu kakonu ang achangüi? Chemthüikoxle she a hwom pangnue wüi kako ang laxle hüidaokya changle.”

³⁴Jisu-e lan le hwom ang thüi: “Chaxwannu tsün ma ngotanto khünake sheko lüka le aju-asomle;

³⁵Ikoxle opang zidaokya chatle azangle zolaxle füichi tsün ma ozün ma ngotang tüilaxpuix hwom hanpakma tuiju-nasomkya müntüiüi.

³⁶Hwom chatle münzi toxüi chemthüikoxle hwom a kaxtaimixbu ningle achangüi. Zidaokya anaole zokyabu daile hwom a Zang susabu changpu.

³⁷“Mosa-e fum ma wünchua le ngokya kha bama akax pongma Abraham Zang, Isak Zang üntoxle Jakop Zang le lünkyae zidaokyabu chatle zo angkya atsingsho le ahole.

³⁸Idaile chix omangbu Zang münchang, athax chix ozün ma tüikyabu Zang changpu, chemthüikoxle pangnu wüi chix ma ozün ma ngopu.”

³⁹Wanlom nwotmixbu züizüie chix kax to lanle thüi: “Nwotmix, nange müile wüi landaoa!”

⁴⁰Ijakoxle hwome chix ma chatle atüi angkya mong chichong.

⁴¹Jisu-e hwom ma atüi: “Messaiah a Dawid sixli changüi le büle thüitsuaküi?

⁴²Chemthüikoxle Dawid, chixe alüile Achuak Tsai ma thüitüi: “‘Jowanpa-e ku Jowanpa ang thüi: Ikha Ku tsaxchi ma ngolax

⁴³Kue nang zanbu china ningle, nang chifa fangma mathomba.’

⁴⁴Dawid-e chix ang: ‘Jowanpa’ le nyak; jangchangba büthüikya to Messaiah ang Dawid sixli changle le thüitsuaküi?”

⁴⁵Khünaknu noknue chix kax apale ngoponge, chixe wangshembu ang thüi:

⁴⁶“Wanlom tsingpabu opange nyilo tholaxle ahamse tsu üntoxle thalex nui to khünaknue hwom shwomkya to künpuix; opange sinagokbu to atsuakya tüntong lom ilaxle fongkhakya khama ngwotnui amüimüi lomlaxpuix;

⁴⁷Opange zomnubu chwom laxle hwom hombu tsuipuix, ilaxle naxzao le ozulole zangjop puix, ibu Wanlom nwotmixbu hanpakma likhünlax! Akhole ma angkya a hwom sikngün changle.”