Read Wancho Naga Luk 21 Bible Online

Luk 21 - Wancho Naga bible

Luk 21

¹Jisu-e akhople hukya ma hakpabue hwom hingho Zangshwom-Hom ngun suak ma shokya ngün.

²Ilaxle chemchu chitüikya zomnu tuitae ngunhuak anyi shokyachu chixe wüi ngünle lax.

³Ilaxle chixe thüi: “Otsingtsingma kue hünzom ang thüipu, hwom pangnu füi chemchu chitüi chinangkya ija zomnuchae wüi süluile shodaoa.

⁴Chemthüikoxle mamabu pangnue wüi ma ma ngunsyen huanuma tüikya kha angkya olap showüi, ikoxle she e ma wok hanpakma hidaole wüi tüikya abakle shopu.”

⁵Üntoxle züizüie Zangshwom-Hom, oja thalix longbu füi osün müile swonle zing üntoxle Zang ang koxkyae otukux osün müile ngünpuix, ija mo wünle ngoponge Jisu-e thüi:

⁶“Hünzome chem ngünle ngopuix ibu long tuita dingma tuita le athünle chingo homle pangnu atsun angkya hanpak hüiüi.”

⁷Hwome chix ma atüile thüi: “Nwotmix, jangchangba ibu otue changüi? Ile chang angkya hanpak ngangle hüikya chem ma awanüi?”

⁸Ikoxle Jisu-e thüi: “Hünzom chichang-chizang lom to zunle chipao angkya bama khünlax. ‘Ku chix changpu, üntoxle hanpak chwonüna’ lükya zangwün füi khünaknu hüiüi. Ikoxlechu ibu füito taxazui.

⁹Üntoxle otue achax-azankya tuwuk zing atatüihex, hünzom taxza; chemthüikoxle owangma ibu ile changle lekop angkya changle, ikoxlechu ibue oshuk hato hüiüna le münchang.”

¹⁰Ijama chixe hwom ang thüi: “Chaxwan hia chaxwan azanüi; Wangting hia Wangtinge tata ting ataküi.

¹¹Pangnu khato huanuma bütixe sikya tüiüi, tuinu nuaknu leüi, üntoxle kaknu laknu leüi; üntoxle ding tokya tümangünkya hia za-adünkya jalibu hüiüi.

¹²Ikoxlechu ibu chemchu machangba, ku mün khoma hexle, hwome kop laxle hünzom to chakmok janlangüi, üntoxle wanghombu hia gowarnorbu hato hünzom kaxfün ang Sinagok to paolaxle kun ma shole thom ang owüiole koxle zothupüi.

¹³Ija a hünzom zongma Kaxho Müikya apuk-apua ang oshua amüikya ang changüi.

¹⁴Ijakoxle hünzome makho chemle sünüihex le hanpak manguiba khosamle chingo angkya kax mong ma akhün koplax.

¹⁵Chemthüikoxle hünzom zanbu owaechu hünzom füi apan ang chitho angkya hia lan ang chitsuak angkya kax üntoxle je-hwon kue hünzom ang koxüi.

¹⁶Manu-mapa hwome ilaxlechu matüi-manao hwome üntoxle kako: homkhae, tamchu üipa-zuikhuibue, hünzom a owüiole koxüi, üntoxle hwome hünzom züizüi a omang jao amütüi.

¹⁷Üntoxle ku khoma pangnue wüi hünzom thua anuüi.

¹⁸Ikoxlechu hünzom khang angkya khopa tuita amüt ang münfaüi.

¹⁹Shingmongle ajonglax, ikoxle hünzome makho alüile azün ang thoüi.

²⁰“Otue hünzome Jerusalem zanbue akhop laxle ngünüi hex, iponge she ama angkya chwonünale hünzome awanüi.

²¹Iponge Jehudi ma ngokyabu haxhua to paolax; üntoxle Jerusalem tingnu ma ngokyabu pao angkya changle, üntoxle tingnu pankai to ngokyabu tingmong to taxdong.

²²Chemthüikoxle zale thomkyabu pangnu kotok to ngai angkya hanpakma ibu a zothupkya din changüi.

²³Ituke omün ma asukyabu hia tsomsip tankya nao füi asukya onubu maxsax! Chemthüikoxle ija chaxwannu hato sikngün chongle hüiüi üntoxle ibu khünakbu füi Zang mongtsik kya huanu changüi.

²⁴Üntoxle hwom züizüi chang ma maxüi; hwom züizüi kop laxle pangnu chaxwan to paoüi. Üntoxle mixnok hanpak ma-ashuk ma-ashukle Jerusalem to mixnok cha füi naküi.

²⁵“Üntoxle Zanghan hia Lyetnu üntoxle Lyettsibu to mowan tüiüi; chaxwannu pangnu haxtok towüi tichap hia tinu jazinge khünaknu ang pipale khosamkya tüiüi.

²⁶Khünaknu abüt-abanle zakyae zaktutle maxüi; chemthüikoxle ding tokya tsakzongbu sile achikachaxüi.

²⁷Iponge Khünak Hosa zangfwom ma tsakzong hia fuazangkya füi ngamle jukya hwome ngünüi.

²⁸Otue ibu chang ang owang wangüihex, ajonglax, üntoxle ngom nwonlax; chemthüikoxle hünzom khosün chwonüna.”

²⁹Ifüima Jisu-e hwom ang ija kaxpan akax: “Fupsa pün hia mamabu pün ajangle anolax.

³⁰Otue hünzome ibu ochak chui ang thüile ngünüi hex, hünzome tsonu nguiüna le awanle.

³¹Ija lailaile otue hünzome ibu changle ngünüi hex, hünzome Zang Wangting hüitu nguiüna le awanüi.

³²“Otsingtsingma kue hünzom ang thüipu, ipongkhae ozün ma tüikya khünak komle maziba wüi ibu changle hüiüi.

³³Ding hia hax kaile lemax koxlax ibachu ku kax chichang homle kaile münleüi.

³⁴“Aluile fongkha lanle hia jutok saxnga lanle üntoxlechu ija chaxwannu tsün khoma aban-asan tata le ngokyae janba jao chitüi le nang mong awangle chingo angkya bama khünlilax, chichangthüiba ija chaxwan-zanghane kam ma mankya ningle nang kopüi.

³⁵Chemthüikoxle ija a chaxwannu thün angkya noknusa hato wüi hüiüi.

³⁶Ibu pangnu zia akaile letsuak angkya üntoxle Khünak Hosa chitong ma ajong angkya hanpakma, hünzome othuithuima hule ngolax ilaxle mik-hingle zangjoplax.”

³⁷Nyixfole chixe Zangshwom-Hom ma hwon-anole han ahom üntoxle jafole chix Olip le nyak kya haxhua to zang angai.

³⁸Üntoxle nyixfole Zangshwom-Hom to chix kax apa ang khünaknu swomsasae ngui.