Read Wancho Naga Luk 22 Bible Online

Luk 22 - Wancho Naga bible

Luk 22

¹Athax a Kaitox Pangpwonle nyak kya an thukya nyix hato nguile hüi.

²Ikoxle nguakhobu hia Wanlom tsingpabue huxsa ma Jisu büle langüihex le otua lom; chemthüikoxle hwomchu wüi khünaknu thua za.

³Wangshem hwom bün anyi kha angkya tuita, Juda Iskariot le nyak kya mixsün ma bao wang.

⁴Chix paolaxle, nguakhobu hia Zangshwom-Hom nyetmix alixachongbu füi, chixe hwom ang Jisu khohang angkya bama azua.

⁵Hwom ang huanuma mongmüi, ilaxle chix ang ngun koxüile tsao.

⁶Üntoxle chixechu wüi ija to lua, ilaxle khünaknu chitüi ponge hwom chak to Jisu owüiole kox angkya oshua lom ang süt.

⁷Kaitox Pangpwon hanpakma chun hosa lang angkya an thukya nyix nguile hüi.

⁸Jisu-e ija kax füi Pitar hia Juhan nyi achale tomle apao: “Keme sax angkya Kaitox Pangpwon fong achwon thün!”

⁹Okhie chix ma atüi: “Kukhie ija ojongkha ma achwon koxle müiüile texpu?”

¹⁰Chixe lan: “Hünkhi tingnu to lele ngoponge, ti tik-kux kop laxle mixsün tuita apongüi. Chix füifüile chix nopkya hom to nguikox,

¹¹ilaxle hom hopunu ang thüikox, ‘Nwotmix-e nang füi akaxle, kue ku wangshembu füi Kaitox Pangpwon fong sax angkya nui ojong?’

¹²Üntoxle chixe homdingkho angkya nui chongkya tuita, komle atha-anyem daokya kha ahoüi, ikhama achwonlax.”

¹³Okhi nguikya thoma hokhi füi Jisu-e akaxkya tangtang ningle bang, ilaxle hokhie Kaitox Pangpwon fongsüt achwon.

¹⁴Hanpak nguile hüikya zuma wangshembu füi tomle chixe ma ngwotnui lax.

¹⁵Chixe hwom ang thüi: “Kue, ku sikngünüi thoma hünzom füi tomle ija fong saxsele texhukya;

¹⁶chemthüikoxle kue hünzom ang thüipu, Zang Wangting to ija angaile changle ma-aho tanto kue ija fong chatle tam münsaxüi.”

¹⁷Ifüima chixe wansa tuita lax üntoxle münchong koxlaxle thüi: “Ija koplax, ilaxle hünzom khama ahanlax;

¹⁸Chemthüikoxle kue hünzom ang thüipu, athax makhange Zang Wangting mahüi mahüile, kue grep-ju münlingüi!”

¹⁹Üntoxle chixe ankhao kop, Zang achuak laxle ija ashik, üntoxle hwom ang koxle thüi: “Ija a hünzom hanpakma fakya ku tsangtsa changle. Ku texle atak angkya hanpakma ile moklax.”

²⁰Üntoxle fongsax füima, ile wüi wansa kop laxle thüi: “Ija wansa a hünzom hanpakma ajenkya ku aji ma Zang Tsaotsüt hozün changpu.

²¹“Ikoxle hulax, ku khohang angkya mix ija tsap ma ku füi tomle tüile!

²²Khünak Hosa a Zange naxchango le thüikya ningle zilaxüi, ikoxle owa makhange chix khohang laxpuix, chix a maxsax!”

²³Ikoxle ile mok angkya mix hwom khama owa changüi le hwome tata ma atüi ang süt.

²⁴Hwom khama akhokya ang opupu achangüile wangshembu atinle zangwün alai.

²⁵Jisu-e hwom ang thüi: “Chaxwannu wanghombu ang wangpünnu thakma zong tüile, üntoxle apün adakyabu ang ‘khünaknu zuikhui’ le nyakle!

²⁶Ikoxle hünzom khama ile chichangüi; ikoxle hünzom khama owa ma akhopuix, chix nok-naoli ningle, üntoxle owa lompa hex chix da tuita ningle changüi.

²⁷Büle jangthüiba fongsüt ma hakle thung ngokya mix hia humele fakya mix nyi achongkya opupuhex? Fongsüt ma hakle thung ngokya mix wüi münchanghex nyi? Ikoxle ku hünzom khama tuita humele koxkya mix ningle changle.

²⁸“Ikoxle ku sikngünba ku füi othuithuima ngokyabu a hünzom;

²⁹Ilaxle Apae ku ang apün-awang angkya zong koxle thomkya ningle, kuechu ija zong hünzom ang koxpu.

³⁰Ku Wangting ma hünzome ku tsap ma sax-lingüi, ilaxle Israel homjen bün anyi thakma apün-awang ang hünzom chongwang ngwotnui ma thungüi.

³¹“Simon! Simon! Apalax! Manzai mixe tsaxtsa hia tsaxjun süikya ningle, oma khatokya müikya süi ang, hünzom thwontsing angkya baoe tsaiju kaxju daoa.

³²Ikoxle Simon, nang mongong thaile chinui angkya hanpakma kue nang bama jopdaoa. Ilaxle otue nang ku hato chatüihex, hüntüi-hünnao hwom ang nange zong adün angkya changle.”

³³Pitar-e lan: “Jowanpa, ku nang füi tomle kun to donglaxle nang füi tomle zi ang ngaxchu ku achwon ngopu!”

³⁴Jisu-e thüi: “Kue thüipu, Pitar, Nange ku owahex münawan le othom azom ma mathüi tanto awün o münhaüi.”

³⁵Ifüima Jisu-e wangshembu ma atüi: “Kue hünzom okhüt, nyitsong, hia chisoxbu chikop homle apaokya tuke hünzom tütalimachu tuitai hexcha?” Hwome lan: “Litamachu kwom tuitaikya kha müntüi.”

³⁶Jisu-e thüi: “Ikoxle izuma a, opang ma okhüt hia nyitsong tüipuix, chixe ibu kop angkya changle; üntoxle owa ma changlo chitüipuix, chixe ma nyipong hang laxle thüichu tuita shak angkya wüi changle.

³⁷Chemthüikoxle kue hünzom ang thüifang, ‘mütkopkyabu khama chixchu wüi e’, le ku bama zale thomkya Lai Kax ngai angkya changle.”

³⁸Üntoxle wangshembue thüi: “Jowanpa, hulax! Ikhama changlo anyi tüile.” Üntoxle chixe hwom ang thüi: “Ibibi wüi nguiüi.”

³⁹Wan angkya ningle chixe tingnu danle tox, üntoxle Olip haxhua to pao; üntoxle wangshembuchu chix füi tomle pao.

⁴⁰Otue chix onui to nguipuix, chixe hwom ang thüi: “Hünzom thwontsing to chidüt angkya bama joplax.”

⁴¹Ifüima chix hwom ha angkya haxnox tuita atsaile pao üntoxle akhuxlaxle zangjop.

⁴²Chixe thüi: “Apa, nang mong jangtsuba, ku angkya ija sikngün wansa paohüi. Bachutix ku mongtex münchang, ikoxle nang mongtex ma wüi naxchang.”

⁴³Zangkangting tokya kaxtaimix lai laxle chix ang tsakzong kox. Üntoxle huanuma mong sikngün laxle chixe sisi zongdong le jop;

⁴⁴üntoxle chix zangmuk ti aji ningle jenle hax to düt.

⁴⁵Zangjop ngokya zolaxle, chix wangshembu hato chat üntoxle hwom küntsik mongmae jiple ngokya ngün.

⁴⁶Chixe hwom ang thüi: “Hünzom büthüikoxle jipngopu? Zolax üntoxle hünzom thwontsing to chidüt angkya bama joplax.”

⁴⁷Chixe ile akaxle ngopong khae, chix wangshem tuita Juda le amünkyae zunlaxle khünak othom tuita nguile hüi. Chix Jisu hato dong ilaxle tun apong.

⁴⁸Ikoxle Jisu-e thüi: “Juda, nange tun apongkya füi Khünak Hosa khohang puixnyi?”

⁴⁹Chix füi tomle ngokya wangshembue chempangle changüihex ibu ngünkya zuma, hwome atüi: “Jowanpa, kwome kwom changlobu twonüi hia?”

⁵⁰Ilaxle hwom kha angkya tuitae nguapa akhokya da tuita to hütle chix tsaxchi na suakle adüt.

⁵¹Ikoxle Jisu-e thüi: “Iwüi nguidaoa!” Chixe ija mixsün na to twon üntoxle otyatyale amüile kox.

⁵²Ifüima Jisu-e chix kop ang nguikya nguakhobu hia Zangshwom-Hom nyetmix akhokyabu üntoxle mixpa tüichongbu füi akax: “Ku zakhut mix tukux, ku hato hünzom changlobu hia pünthombu füi nguipuix nyi?

⁵³Nyixfole ku Zangshwom-Hom ma hünzom füi tomle ngopu, ikoxle ijaponge hünzome ku chikop. Ikoxle zangnak tsakzonge apünle ngoponge, ija hünzom hanpak changkoxpu.”

⁵⁴Hwome Jisu kop laxle Nguakho hom to pao; üntoxle Pitar tsai tokhange azuile hüi.

⁵⁵Hwome homtho osung wama wün tak üntoxle tomle thung. Pitar chuwüi hwom khato thung.

⁵⁶Danu ang ngokya naochasa tuitae chix wün hama thungle ngokya ngün, üntoxle chix to tangthole hulaxle thüi: “Ija mixsünchu Jisu füi tomle ngokya mix changpu.”

⁵⁷Ikoxle Pitar-e atsele thüi: “Afex, kue chix owahex ngaxchu münawan!”

⁵⁸Noxta ngo füima mixsün tuitae Pitar sün tsing laxle thüi: “Nangchu hwom füi tomkya mix tuita changpu.” Ijamachu Pitar-e thüi: “Mixsün, ku hwom füi tomkya mix münchang.”

⁵⁹Chatlechu wüi khonta tuita tukux ngo füima mama mixsün tuitae kaxshing kople akax: “Ija mixsün Jisu füi tomle ngokya mix münchangle mongao angkya jao müntüi, chemthüikoxle chixchu Galili nok changle!”

⁶⁰Imachu wüi Pitar-e lan: “Mixsün, nange chempang bama akaxpuix, kue münawan!” Ile chix akaxle ngopong khae O ha.

⁶¹Jowanpa-e aküile tangthole Pitar to hu, ilaxle Jowanpa-e chix füi: “Aja O haüi thoma nange ku owahex münawan le azom ma thüiüi hexo!”, le akaxkya kax texle atak.

⁶²Pitar Laile Pao üntoxle Mongmaxle Sop.

⁶³Jisu nyele ngokyabue chix ajao ahai ilaxle chix to huanuma fit.

⁶⁴Hwome chix mikzim üntoxle atüi: “Nang to owae fitpuix, ija awandao.”

⁶⁵Ile hwome chix zong to adix-adakya kax huanuma akax.

⁶⁶Zangngai füima, mixpa tüichongbu, nguakhobu üntoxle Wanlom nwotmixbu tomle asox, ilaxle Jisu nguawangbu hato apüi,

⁶⁷Hwome thüi: “Kwom hama apua hüi, Nang Messaiah changcha hex?” Chixe lan: “Kue akaxkoxlechu hünzome ku to ongüi münchang;

⁶⁸Üntoxle kue hünzom hama kax tuita atüikoxle hünzome münlanüi.

⁶⁹Ikoxle athax makhange Khünak Hosa a Khüthak Zang tsaxchi ma thungüi.”

⁷⁰Hwom pangnue thüi: “Ikoxle nang Zang Hosa hia?” Chixe lan: “Ku Zang Hosa changle le hünzome wüi thüingün laxle hi!”

⁷¹Üntoxle hwome thüi: “Keme chatle kaxkhi mama münlom ngoüi! Athax kem jaojaoe chix kax atatle laxdaoa!”