Read Wancho Naga Luk 23 Bible Online

Luk 23 - Wancho Naga bible

Luk 23

¹Khünaknu othom pangwüi ajong laxle Jisu Pilat hato pao.

²Ikha to hwome chix ma kaxfele akax: “‘Chongwang süi taxtha üntoxle Ku Messaiah, wanghom changpu’ le akaxle chix jaojaoe khünaknu chichangkya lom to jikle pao ngokya, ija mixsün kwome koppu.”

³Pilat-e chix ma atüi: “Nang Jehudi nok wanghom changchami?” Jisu-e lan: “Ija nange akaxdaoa.”

⁴Ifüima Pilat-e nguakhobu hia khünaknu ang thüi: “Kue ija mixsün ma kaxfe ang asule thaikya kha chemchu münatak.”

⁵Ikoxle hwome tamtaile atsang: “Chixe anwot-anokya makhange Jehudi chaxwan pangnu khato wüi tuwuk alai le. Chixe Galili makhange owang wanglaxle athax ikha alopüna.”

⁶Ija atatlaxle Pilat-e atüi: “Ija mixsün Galili nok hia?”

⁷Otue chixe Jisu a Herod wangtinge o-kya kha tokya changa le awan ang kop, chixe chix Herod hato apao. Iponge Herod a Jerusalem ma tüikya.

⁸Jisu ngünkya zuma Herod mong huanuma müi, chemthüikoxle chixe chix mo wünkya atatle ngo laxle, amipong tokhange wüi ngünse le sung. Jisu-e ohünotün mwot mokkya ngün ang kopüi le chixe thüt.

⁹Ikhoma Herod-e Jisu ma kax huanuma atüi, ikoxle Jisu-e chix kax tuita to ngaxchu chilan.

¹⁰Nguakhobu hia Wanlom nwotmixbue thüntho chito hüilaxle Jisu ma kax huanuma fe.

¹¹Herod hia chix süpahibue chix chichang-chizangkya mix changpule thütlaxle Jisu ajao ahai, üntoxle chix ang otha ngamkya nyilo awun le kox ilaxle chix Pilat hato wüi chatle achat.

¹²Üntoxle ija nyix makhange Herod hia Pilat nyi zuikhui ang achang, chemthüikoxle thoto hokhi a zan ang achangle ngokya.

¹³Pilat-e nguakhobu, mixpa tüichongbu hia khünaknu nyakle afox;

¹⁴üntoxle hwom ang thüi: “Hünzome ija khünak ku hato apüipu, üntoxle chixe khünaknu chichangkya lom to zun le pao ngole le thüipu; athax kue hünzom thüntho ma atwon le anodaoa, ikoxle hünzom kaxfyet bama chix thaikya kha kue münatak.

¹⁵Herod-echu chix ma thaikya kha chiatak, ikhoma chixe ija khünak kem hato wüi chatle achatpu. Ija mixsüne chix mik maxtang le thaidaokya kha müntüi.

¹⁶Idaile kue chix to zu füi fit laxle chix danle apaoüi.”

¹⁷(Kaitox Pangpwon fo to hwom hanpakma Pilat-e kun ma hakle thomkya mix tupong danle apao angkya olom tüikya).

¹⁸Khünaknu pangnu wüi akhong: “Chix langdao, kwom ang Barabba danhüi!”

¹⁹(Barabba a tingnu ma tuwuk alaikya hia mix langkya khoma kun ma hakle thomkya mix changkya).

²⁰Pilat-e Jisu wüi dansele tex laxle, khünaknu hama chatlechu zingmüi ma wünzex le ano.

²¹Ikoxle hwom chatle akhong: “Chix takle langdao! Chix takle langdao!”

²²Othom azom lükya ma Pilat-e hwom ang thüi: “Ikoxle chixe chemzya amadaopu? Kue Jisu ma chix mik max tang thaikya tüta limachu münatak. Kue chix to zu füi fit üntoxle danle apaoüi.”

²³Hwom ding-zak otukux kapuix itukux Jisu a lang angkya wüile akhongle ngo, üntoxle oshukma hwom akhongkyae wüi lütle shu.

²⁴Ija khoma hwome jule ngokya ningle wüi mokle alyet angkya Pilat-e kaxkox.

²⁵Tuwuk alaikya hia mix langkya khoma kun ma shole thomkya mixsün chixe dan, ilaxle hwom mongtsutsu ma mok angkya Jisu a owüiole hwom chak to kox.

²⁶Jisu a süpahibue zunle pao, üntoxle hwom paole ngoponge, tingkhua tokya nguiüi Simon le amünkya Sereni nok mixsün hwom füi apong. Hwome chix kop, chix ma pünsak dan, üntoxle Jisu füifüi ma chixe ija pai ang tom.

²⁷Üntoxle khünaknu othom huanuma chix füifüi ma hüi; hwom khama chix hanpakma künmax-mongshanle sopngale azuikya shekobu tüikya;

²⁸Ikoxlechu Jisu-e hwom chito hulaxle thüi: “Jerusalem angkya shekobu! Ku hanpakma taxsopngo, ikoxle ma hanpakma ilaxle masu masabu hanpakma soplax.

²⁹Chemthüikoxle hulax: ‘Naosom chipux chipai le zomnu ang ngokyabu üntoxle otuechu tsom chiasipkyabu shomüi’, le khünaknue thüi angkya hanpak tunu hüile ngole.

³⁰Ipongma hwome haxnubu füi akax ang sütüi: ‘Kwom ding to düthüi!’ Üntoxle haxkho tsuakyabu ang thüiüi: ‘Kwom to akhup hüi!’

³¹Chemthüikoxle hwome pün ohing ma tüitanto wüi ile jangmok thüikoxle athax pün ozik ang achang füima chemle changüi?”

³²Üntoxle chichangchizang mwot moklaxle mütkop daokya mixsün anyichu wüi chix füi tomle lang ang pao.

³³Üntoxle otue hwom “khangza hua”, le nyak kya haxhua to ngui, ikhama hwome chix pünsak ma tak ilaxle chichangchizang mixsün nyichu, tuita a chix tsaxchi kao ma üntoxle ata mix a nongchi kao male pünsak ma tak.

³⁴Üntoxle Jisu-e thüi: “Apa, hwom ang thailakkya tüikox; chemthüikoxle hwome chem moklaxpuix ija hwome münawan.” Ijama hwome nantak ilaxle chix-nyi chix-za hwom bama ahanle lax. Üntoxle khünaknue hule ajong.

³⁵Ilaxle apün-adakyabue chuwüi chix ahai le thüi: “Chixe khünakbu a sünle; chix Zange kamle kopkya Messaiah jangchangba, makho alüile naxsünkox a!”

³⁶Üntoxle süpahibuechu chix hato hüilaxle poska le nyakkya jusi kox, üntoxle chix ajao ahaile thüi:

³⁷“Nang Jehudi nok wanghom jangchangba nang lualua to sünlax.”

³⁸Üntoxle IJA JEHUDI NOK WANGHOM le chix khangkho ma zale tox.

³⁹Üntoxle chichang-chizangkya mixsün anyi pünsak ma takle thomkya tuitae Jisu ajao le thüi: “Nang Khrista münchang hia? Nang alüile sünkya boma kukhichu sün hüi!”

⁴⁰Ikoxle ata mixsüne chix to sale thüi: “Chix füi tomwüi sikngün kop laxle ngaxchu nang Zang thua münza hia?

⁴¹Üntoxle künyie nang olom ma koplaxpu; chemthüikoxle künyie nang künyie mokdaokya tha thompu. Ikoxle ija mixsüne thaikya mwot chemchu chimok.”

⁴²Ilaxle chixe thüi: “Jisu, nang wanghom ang achang laxle nguikya zuma ku taxalak.”

⁴³Jisu-e chix ang thüi: “Otsingtsingma kue nang ang thüipu: Anyix wüi nang ku füi tomle zangkang to ngoüi.”

⁴⁴Iponge tungto shen changkya, üntoxle tsomfüi kople chaxwannu pangnu khato zanghane nyankya chitüi le haxshix-zangnak.

⁴⁵Üntoxle Zangshwom-Hom atsyen le thomkya nyi tanti makhange kyetle afi pao.

⁴⁶Ifüima Jisu-e azaxle thüi: “Apa, nang chak to kue ku chasa koxpu.” Ile akaxlaxle chix zi.

⁴⁷Süpahi akhokyae, chempangle changpuix ibu ngünlaxle Zang mün achuakle thüi: “Otsingtsingma chix a sukya khünak wüi changdaoa.”

⁴⁸Ikhama hu ang afoxle ngokyabu thome, bülepang changpuix ibu ngün ilaxle hwome ma khaxtok to chietle mongma ngale pao.

⁴⁹Chix füi huaksüi le süntsing münwan tüikyabu pangnu üntoxle Galili tokhange chix füito azui le hüikya shekobu thome tsai tokhange ibu to hule ajongle ngo.

⁵⁰Jehudi tinglong angkya Arimathia nok Jusep le amünkya mixsün tuita tüikya. Chix a khünak omüi, achuak achen koxle asule tüikya ilaxle Zang Wangting hüikya tanle ngokya mixsün tuita changkya.

⁵¹Chix tuita nguawang changkoxlechu hwom katzua hia süt-mwot bama hwom füi mongno chitomkya mixsün tuita changkya.

⁵²Chix Pilat hato pao ilaxle Jisu mang jule lax.

⁵³Ifüima chixe mang ajo laxle nyidax füi lop, ilaxle long thole zingkya, otuechu khünak mazukya zuk ma chix zu.

⁵⁴Ija a hat aga lükya pangpwon asuikya nyix kha changkya, üntoxle nazak nyix hato nguile hüi.

⁵⁵Galili tokya chix füito azui le hüikya shekobu Jusep füifüi ma azuile hüi, zukting awan ilaxle mang chemle toxpuix, ija ngün ang kop.

⁵⁶Ilaxle hwom chat, üntoxle mang to paküli ongan müikya müngabu achwon. Üntoxle nazak nyix Wanlom ma tüikya ningle hwomchu wüi nui.