Read Wancho Naga Luk 24 Bible Online

Luk 24 - Wancho Naga bible

Luk 24

¹Ikoxle ofüinop swomsa ma hwome achwonle thomkya ongan müikya müngabu kop laxle hwom zuk to ju.

²Hwom thoma zuk ka hakkya long laoxle awüt bang.

³Ikhoma hwome noplaxle hu, ikoxle Jowanpa Jisu mang ikhama chibang.

⁴Hwom ija bama khosam ashukle tang le ngoponge, mixhuak anyi jikjyepkya nyi-za laxlaxle hwom zuima ajong.

⁵Za laxle shekobue haxchi to hule akhuxle thün khom. Iponge hokhie hwom ang thüi: “Hünzome ozün büthüikoxle omangbu khato lompu? Chix ikhama müntüi, chix a chatle azangle zoüna.

⁶Chix Galili to tüiponge chixe hünzom füi akaxkya ajang koplax:

⁷‘Khünak Hosa ochaxbu chak to owüiole kox angkya changle, ilaxle pünsakma taküi, üntoxle nyix azom lükya to chatle azangle zoüi.’”

⁸Ibu shekobue chix kax mongto texle lax.

⁹Ifüima hwom zuk tokya chatlaxle ibu pangnu hwom bün ata hia mamabu pangnu hama wün.

¹⁰Hwom a Meri Magdalen, üntoxle Joana, üntoxle Jakop honu Meri le changkya; üntoxle hwom füi tomle mama shekobue chuwüi wangshembu hama ibu wün.

¹¹Ikoxle wangshembue ibu shekobu zangwün kaxbi ngaoba le natok to alyet, ilaxle hwom kax to ojao chiong.

¹²Ikoxle Pitar ajong üntoxle zukchi to zikle ju, üntoxle chixe aku le zuk khato hule ano koxle nyidax boma mama chemchu chingün. Ilaxle chempang changkya changkoxpu le khosam ashukle chix hom to chat.

¹³Ija nyixnyix wüi Jisu wangshem anyi, Jerusalem makhange mai anüt atsaikya Emaos lom to ahamle ngokya.

¹⁴Üntoxle hokhie tata füi chempangle changdaopuix idubu mo wünngale ahamle ngokya.

¹⁵Okhi kaxkaxle aham le ngoponge, Jisu chix tomtata hokhi hato hüi ilaxle tomtomle aham;

¹⁶Okhie chix ngün, ikoxlechu amüile süntsing münwan tomtatale chichang.

¹⁷Jisu-e hokhi ang thüi: “Hamlom to hünkhie chempang mo tomta wüntsuakpu?” Mongma füi hokhi tang le ajong.

¹⁸Kleopas le amünkya mixsün tuitae chix ma atüi: “Jerusalem to nguikya khama, shongnyixkya bama chempang le changdaopuix, ija pak chitik kya nang tata wüi changa nyi?”

¹⁹Chixe atüi: “Chempang le changkya?” Okhie lan: “Nazareth nok Jisu to hwonkya a.” Okhie wüi thüi: “Ija mixsün a ajepa changkya. Zange hex üntoxle khünaknue hex, chix kax ma hia mokkya mwottho ma tsakzong tüikya le awanle.

²⁰Kem nguapa akhokyabue üntoxlechu apün-adakyabue chix lang angkya bama kaxfün tsuaklaxle owüiole kox, üntoxle chix pünsak ma takle langle.

²¹Üntoxle Israel khangkho zang angai angkya mix chix changüi le kwome ongkya dai! Ile chang füima anyix ile nyix azom sütüna.

²²Kwom kha angkya shekobu thomtae kwom abüt-aban ang koxle; anop swomsae zuk to jukox le mang münbang ta.

²³Üntoxle kaxtaimix lai laxle hwom ang Jisu chatle azangle zoüna le thüile le wünle chatle.

²⁴Kwom kha angkya züizüi zuk to jule huno koxchu wüi, shekobue wünkya lailaile wüi hwom thomachu Jisu mang münbang ta.”

²⁵Ifüima Jisu-e hokhi ang thüi: “Hünzom ongatbu üntoxle ajebu kax to zazeletix ongkyabu.

²⁶Ija sikngün apong angkya hia fuazangkya khato hüi angkya Khrista hanpakma olom münchang hichem?”

²⁷Mosa hia ajebu pangnu makhange owang wangle Otsao Lai pangnu khato wüi chix bama zale tüikya chixe hokhi hama akhixle apua.

²⁸Okhi ngui angkyakha tingkhua alopkya zuma Jisu-e chix chatlechu süchakza to leüi ningle aho;

²⁹Ikoxle hokhie chix ang thüi: “Kukhi füito zak-hax; chemthüikoxle zanghan namleüna, athax a zangnakpu.” Ikoxle chix hokhi füito zak ang dong.

³⁰Otue chix hokhi füi tomle fongsax ang thungpuix, chixe an kop laxle mohiman, ilaxle ija ashik le hokhi ang kox.

³¹Iponge hokhi mikdap, ilaxle hokhie chix changdaokya changa le awan, ikoxle hokhie ngün ang chitsuak le chix amua.

³²Okhie tata füi akax: “Lomba to chixe künyi hama Otsao Lai akhix akhanle apua ngoponge, künyi mongto wün ningle münpodai hia?”

³³Ija thuile ajong le hokhi Jerusalem to chat. Okhi thoma wangshem bün ata hia hwom füi tomle ngokyabu afox le nui.

³⁴“Jowanpa otsingtsingma chatle azangle zo le tüile, chix Simon hato laile ahodaoa!”, le hwome hokhi hama wün.

³⁵Okhiechu wüi, hokhi füi lomba to apongkya hia an ahanle sax ang thüiponge hokhie Jowanpa süntsing ang kopkyabu hwom hama wün.

³⁶Ija mixsün nyie hwom hama ibu wünle ngoponge, alele, Jowanpa Jisu hwom osungwa ma laile ajong, ilaxle hwom ang thüi: “Hünzom füi mongsom naxtüi.”

³⁷Bao ngünkya changüi le tex laxle hwom abüt-aban.

³⁸Ikoxle chixe hwom ang thüi: “Hünzom büthüikoxle abütsasapu? Ibu mongao hünzom mongto büthüikoxle hüipu?

³⁹Ku chak hia ku chabu to hulax, üntoxle ija ku tomtata changcha le hukoplax. Ku to twonlax ilaxle hulax, chemthüikoxle hünzome ku ma ngünkya ningle bao tuita ma hak hia za müntüi.”

⁴⁰Ile akaxlaxle chixe hwom hato chix chak hia chabu aho.

⁴¹Ikoxlechu hwome chiong tsuak, ile hwom mongmüi hia khosame awang le ngoponge, chixe hwom ang thüi: “Ikhama hünzom ma chemchem saxküli tütüicha?”

⁴²Hwome chix ang hidaole songdaokya nyax kox.

⁴³Ija laxlaxle chixe hwom thüntho ma sax le aho.

⁴⁴Ifüima chixe hwom ang thüi: “Mosa Wanlom üntoxle ajebu Lai hia Achuak Tsai ma ku bama chempangle zale tüilaxpuix, ibu ngai angkya oli changle le kue ibu zangwün bama ku hünzom füi tomle tüipongma wüi akaxdaoa.”

⁴⁵Iponge hwome Otsao Lai awan angkya hwom mongka daple kox,

⁴⁶Üntoxle chixe hwom ang thüi: “Khrista sikngün zolit angkya oli changle, üntoxle nyix azom lekya to chatle azangle zoüi,

⁴⁷üntoxle Jerusalem makhange owang wang le chix mün ma ochax thailak atak angkya hia mongchat angkya kaxho pangnu jat-li hato apuk angkya changle, le zakya tüile.

⁴⁸Ijabu hanpakma kaxkhi ang hünzom changpu.

⁴⁹Üntoxle Apae tsaosax daokya ku tomtatae hünzom ang koxüi. Ikoxlechu thakchi tokya tsakzong hünzom hato mahüi tanto, hünzome ija tanle, Jerusalem ma nui angkya changle.”

⁵⁰Ifüima chixe hwom Jerusalem angkya Bethani kople zunle alai, üntoxle ikha to chixe chak ajong laxle hwom to mohiman.

⁵¹Chixe hwom to mohimanle ngoponge, chix hwom füi afanle zangkang to nwonle dün.

⁵²Hwome chix shwom ilaxle mongmüi atungle Jerusalem to chat.

⁵³Ilaxle hwome hanpakbu Zang mün achuakle Zangshwom-Hom ma alyet.