Read Wancho Naga Luk 3 Bible Online

Luk 3 - Wancho Naga bible

Luk 3

¹Athax wanghom Tiberia-e apünkya zangbün aga nguikya tuk changkya; Pontias Pilat a Jehudi ma gowarnor changkya. Herod a Galili apün angkya mix changkya, ilaxle honao Filip-e a Ituria hia Trakoniti chaxwan apün; Laisania a Abelen ma apünkya;

²Üntoxle Annas hia Kaifa hwom a nguakhobu changkya. Ijaponge Zakaria sasün Juhan hato faokha to Zang kax hüi.

³Ijadaile Jordan shua tuitui akhople Juhan-e hwon-anole aham: “Hünzom ochax tokya mongchatlax üntoxle bapti laxlax, ikoxle Zange hünzom ochaxbu thailak faüi!”

⁴Ajepa Isaia lai ma tüikya ningle: “Faokha to owawa akhongle ngole: ‘Jowanpa hanpakma lom achwonlax; Chix le angkya lom tangthole zingkox!

⁵Haxbang pangnu wüi awangüi, Haxkang haxhua pangnu ajitüi. Lomtang kwonkexkyabu atangüi; lom khünkhünduakyabu amüiüi.

⁶Khünak noke Zang khosün ngünüi!’”

⁷Khünaknu othom bapti lax angkya hanpakma Juhan hato ngui. Chixe hwom ang thüi: “Hünzom pubu! Zange ahüi angkya sikngün tokya khosünüi le hünzom ang owae thüipu?

⁸Hünzome ochax tokya mong chatdaoa le ahoküli mwot mokkox. Üntoxle hünzom khama: ‘Abraham kwom putong changpu’ le akax ang taxsüt ngo. Kue thüipu, Zange idu long tswonlaxle chu Abraham sixli alai ang tsuaküi.

⁹Pün otsing makhange dak angkya hanpakma wa achwonle thomle; müile chiziak chipuakya pün pangnu wüi dakle anguaküi ilaxle wünkha to awütüi.”

¹⁰Khünaknue chix ma atüi: “Jangchang thüiba kwome chempang moküi?”

¹¹Chixe lan: “Owa ma nyipong anyi tüipuix chixe chitüikya mix ang kox angkya oli, üntoxle sax ang ling ang tüikya mixechu ahanhanle saxlax angkya changpu.”

¹²Bapti lax ang züizüi süisai mixbu hüi, ilaxle hwome chix ma atüi: “Nwotmix, kwome chempang moküi?”

¹³Chixe hwom ang thüi: “Othüt ziakaile hünzomechu süi taxsai.”

¹⁴Züizüi süpahibuechu chix ma atüi: “Kwom ang büle? Kwome a chempang mok angkya oli?” Chixe hwom ang thüi: “Zongzukle owawa angkya ngunsyen pale taxlax, chichangba mixkho taxhang. Hünzom ang fakya lyetngun füi mongtex shale ngolax.”

¹⁵Khünaknu mongsung chongle hüi, ilaxle Juhan ang Messaiah changdaisi le khosam.

¹⁶Ija khoma Juhan-e hwom pangnu ang thüi: “Kue hünzom tima bapti fapu, ikoxle ku thak to akhokya mix hüile ngole, ku a chix chisox sukle fa ang ngaxchu münasu. Chixe hünzom Otsao Chasa hia wün ma baptile faüi.

¹⁷Tsaxfa chaple awüt laxle tsaxtsangtsang pangnu pung ma athün angkya hanpakma chix chak ma own twonlaxle tüile; chixe tsaxfa tamchu chimax angkya wünkha to zokle ashunüi.”

¹⁸Malili lom tokhange Juhan-e hwom hama hwon-anole mongchat angkya zong adünle Kaxho Müikya apuk.

¹⁹Honao kakonu Herodia apüilaxle chuwüi ochax mwotbu huanuma mokkya khoma Juhan-e wanghompa Herod to sa.

²⁰Ikoxle wanghom Herod-e Juhan kun to hakkyae tamtaikya oma mwot mokkya ang achang.

²¹Khünaknu pangnu baptikya füima Jisu chuwüi bapti. Chixe jople ngoponge zangding ka dap.

²²Üntoxle otsangtsa füi osu ningle achang laxle Otsao Chasa chix ma ju. Üntoxle ding to ozing ile lai: “Nang a ku mongtex shakya Ku Sasün. Nang ma ku mongzom müipu.”

²³Jisu-e chix mwot owang wang ponge chix zang tsübün nguiünkya. Chix a lükasa, idaile khünaknue chix a Jusep sasün changpule texle atak. Jusep a Heli sasün changkya.

²⁴Heli a Mathat sasün, Mathat a Liwi sasün, Liwi a Melki sasün, Melki a Jannai sasün, Jannai a Jusep sasün,

²⁵Jusep a Matathia sasün, Matathia a Amos sasün, Amos a Nahum sasün, Nahum a Esli sasün, Esli a Naggai sasün,

²⁶Naggai a Mat sasün, Mat a Matathia sasün, Matathia a Semein sasün, Semein a Josek sasün, Josek a Juda sasün,

²⁷Juda a Joana sasün, Joana a Resa sasün, Resa a Zerubbabel sasün, Zerubbabel a Shealtiel sasün, Shealtiel a Neri sasün,

²⁸Neri a Melki sasün, Melki a Adi sasün, Adi a Kosam sasün, Kosam a Elmadam sasün, Elmadam a Ir sasün,

²⁹Ir a Jihusua sasün, Jihusua a Eliazar sasün, Eliazar a Jorim sasün, Jorim a Mathat sasün, Mathat a Liwi sasün,

³⁰Liwi a Simeon sasün, Simeon a Judah sasün, Judah a Jusep sasün, Jusep a Junam sasün, Junam a Eliakim sasün,

³¹Eliakim a Melea sasün, Melea a Menna sasün, Menna a Matathia sasün, Matathia a Nathan sasün, Nathan a Dawid sasün,

³²Dawid a Jesse sasün, Jesse a Obed sasün, Obed a Boaz sasün, Boaz a Salmon sasün, Salmon a Nahshon sasün,

³³Nahshon a Amminadab sasün, Amminadab a Admin sasün, Admin a Arni sasün, Arni a Hezron sasün, Hezron a Perez sasün, Perez a Judah sasün,

³⁴Judah a Jakop sasün, Jakop a Isak sasün, Isak a Abraham sasün, Abraham a Terah sasün, Terah a Nahor sasün,

³⁵Nahor a Serug sasün, Serug a Reu sasün, Reu a Peleg sasün, Peleg a Eber sasün, Eber a Shelah sasün,

³⁶Shelah a Kainan sasün, Kainan a Arfakshad sasün, Arfakshad a Shem sasün, Shem a Noa sasün, Noa a Lamek sasün,

³⁷Lamek a Methuselah sasün, Methuselah a Inok sasün, Inok a Jared sasün, Jared a Mahalalel sasün, Mahalalel a Kenan sasün,

³⁸Kenan a Enosh sasün, Enosh a Seth sasün, Seth a Adam sasün, Adam a Zang sasün.