Read Wancho Naga Luk 4 Bible Online

Luk 4 - Wancho Naga bible

Luk 4

¹Jisu Jordan shua tokya Otsao Chasae awang le chat ilaxle Chasae chix faokha to zunle pao.

²Ikha to chix nyix punyi haxshixe thwontsing le ngo. Ibibi bama chixe chemchu chisax chiling, ikoxle ibu hanpak ashukle hüikya zuma chix woknuak e max.

³Haxshixe chix ang thüi: “Nang Zang Hosa jangchangba, ija long ang an ang achang angkya kax laxkox.”

⁴Ikoxle Jisu-e lan: “Otsao Lai ma akax ngole: Khünak a süt lanlan khoma ozün ma ngoüi münchang.”

⁵Chatlechu haxshixe haxnu kho to dün üntoxle mik ajepkya bama wüi chaxwannu Wangting bakle aho.

⁶Haxshixe thüi: “Nang ang kue ibibi tsakzong hia ngunsyen bakle koxüi. Ibu pangnu ku ang koxle thomdaoa, ku mong atsutsu ang kue ibu abakle kox ang tsuaküi.

⁷Nange ku to jangshwom thüiba ibibi bakle nang kux ang achangüi!”

⁸Jisu-e lan: “Otsao Lai ma thüile: Nange Jowanpa, nang Zang tata to shwomlax; chix mwot tix moklax!”

⁹Ifüima haxshixe chix Jerusalem to pao üntoxle Zangshwom-Hom homkho atsuakya khama angwot laxle chix ang thüi: “Nang Zang Hosa jangchang thüiningle ija makhange nang lualua to tswonle awüt hu.

¹⁰Chemthüikoxle Otsao Lai ma akax kya tüile: ‘Zange nang to hume ang, kaxtaimixbu füi akaxüi,

¹¹üntoxle nang cha ngaxchu long to nakfut le, hwome nang hale kopüi.’”

¹²Ikoxle Jisu-e lan: “Otsao Lai e akax ngole: Nang Jowanpa, nang Zang thwon taxtsing.”

¹³Otue haxshixe pangnu lom ma Jisu thwontsing kya ashuk, chixe chix onox ma danle tox.

¹⁴Ifüima Jisu Galili to chat. Otsao Chasa tsakzong chix ma tüikya. Üntoxle chix bama Kaxho ija tuitui pangnu khato wüi atat ang kop.

¹⁵Chixe Sinagok to hwon-ano üntoxle noke wüi chix achuak.

¹⁶Ifüima Jisu chix tsonglokya Nazareth nok to pao, üntoxle nazakle nuikya nyix hwom wanlom ningle Sinagok to ngui ilaxle Otsao Lai e ang ajong.

¹⁷Ajepa Isaia laipex chix ang kox. Chixe laitün shakkya ma ile zakya kha bang:

¹⁸“Jowanpa Chasa ku ma tüile; mütmix shunmix hato, Kaxho Müikya apüi ang chixe ku kam. Kople thomkya hato, dan angkya kax apuk angkya; Mikduakbu hato, ngün angkya kax apuk angkya; mix fang to ngokyabu ang, khangkho angai kox angkya;

¹⁹üntoxle Jowanpa-e chix khünaknu, khosün pongle koptu nguiüna, le apuk ang chixe ku ahyenpu.”

²⁰Ifüima chixe laitün ashyep laxle tuzing mix ang kox ilaxle thung, üntoxle Sinagok ma tüikya pangnue wüi chix to mikzaple hu.

²¹Chixe hwom füi akax ang süt: “Anyix ija Lai Kax hünzom na ma atatle ekya makhange kotok to ngaile ahodaoa.”

²²Üntoxle pangnue wüi chix mowün amüi, ilaxle chix tun makhange zingzama dongle akaxkya bama abüt. Ilaxle hwome thüi: “Ija a Jusep sasün münchangkox hia?”

²³Chixe hwom ang thüi: “Ija wanwünkax hünzome ku füi akax angkya atsingsho: Kak-humix, nanglualua to müilax! Kue Kaparnaum to mokkya chempang bama hünzome atatdao puix, ibu ma tingsho machu mokle aho hüile hünzome thüiüi.

²⁴Kue hünzom ang thüipu, ajepa ma tingsho ma otuechu pongle münkop.

²⁵“Ku kax apa hüi, changpu, Elija tsün ma otue zang azom lyet azok zangding ka hakle thomkya khoma zang chiwatpuix, üntoxle ongai chaxwannu hato chongkya otui-onuak hüipuix, ipongma Israel zomnubu tüihukya.

²⁶Ikoxlechu Elija Israel haxtok angkya zomnubu owa hatochu chiapao, Sidon angkya Zarefat ma ngokya zomnu tuita hato tata apao.

²⁷Üntoxle Elisha ajepa tsün ma Israel haxtok ma angwonkyabu tüihukya; ikoxle hwom owachu chiamüi; Siria nok Naman tata amüi.”

²⁸Üntoxle ibu kax atatkya ma, Sinagok ma asukya nok ang wüi mongtsik dong.

²⁹Üntoxle hwom ajong laxle tingsho angkya chix jwonle alai, üntoxle haxhua oja ma hwom tingkhua zingle thomkya hex, ija haxhua akixkya kha tokhange zaksam to tswonle awüt ang chix pao.

³⁰Ikoxle chix khünaknu osungkha makhange laile ikha angkya chix paole azang.

³¹Ifüima Jisu Galili angkya Kaparnaum nok to pao. Ikha to chixe nazak nyix khünaknu hama hwon-ano.

³²Hwom pangnu wüi chix hwon-nwot khoma abüt, chemthüikoxle chixe otsak ozong füi apua ano.

³³Sinagok ma haxshix chasa füikya mixsün tuita tüikya;

³⁴chixe akhongle thüi: “Ei, Nazareth nok Jisu, nange kwom füi chem mok angkya tüikya? Nang kwom amüt ang hüipia? Nang owahex kue awanle. Nang a Zang Otsao Kaxho mix changle!”

³⁵Jisu-e chix to sale akax: “Dangün, üntoxle ija mixsün angkya laiün!” Haxshixe ija mixsün hwom thünthoma tswonle awüt toxlaxle chix to oma chemchu chimok homle laile pao.

³⁶Khünaknu nok wüi abüt laxle tata füi akax: “Ibu kax chemningkya hex? kaxza zongle ija khünake haxshix chasabu ang kaxkox koxle hwom laile paotüia!”

³⁷Ilaxle ija tuitui pangnu khato wüi chix mo wünle pao.

³⁸Jisu-e Sinagok toxlaxle Simon hom to pao. Simon honyenu tundün kak kakle ngokya. She kakle ngokya hwome chix hama wün.

³⁹Chix dong üntoxle she jiple ngokya lya hama ajong ilaxle tundün to sa, ikoxle tundüne she danle tox. Ijama wüi zolaxle she e hwom sütling to humele fa.

⁴⁰Zanghan düt füima, kakmix atüitüi ma zuikhuibu, küjo-küjekya kaklak füikya khünakbu Jisu hato apüi; chixe hwom pangnu towüi chake twon üntoxle pangnu kak wüi amüile fa.

⁴¹“Nang a Zang Hosa changpu”, le akhong-khong laxle khünak züitabu angkya haxshihbu laile pao. Jisu-e hwom ang akax ang jao chikox le sa, chemthüikoxle hwome chix a Messaiah changpule awan.

⁴²Anopning swome mix kongkya khato pao. Khünaknue chix lom; ilaxle hwome chix atak kya zuma, chix pao ang chikox le thom ang azong.

⁴³Ikoxle chixe hwom ang thüi: “Kaxho Müikya a kue mama tinghax tochu apuk angkya changle, chemthüikoxle ija mok angkya hanpakma Zange ku tomle apaokya changpu.”

⁴⁴Ijadaile chixe pangnu tinghax towüi Sinagokbu to nguilaxle hwon-ano.