Read Wancho Naga Luk 5 Bible Online

Luk 5 - Wancho Naga bible

Luk 5

¹Nyixta Jisu Geneseret Shinthuk-titung kaxma ajongle ngoponge khünaknu abobosüt le Zang Kax apa ang chix hato hüi.

²Chixe jinu kaxma khua anyi ngün; ikha angkya nyaxkop mixbu thai laxle sha sole ngokya.

³Chix khua tuita, oja Simon kux changkya hex, ija ma ngalaxle, khua shuakax angkya hidaole jimong to ajenkox le chix füi akax. Üntoxle thung laxle khua makhange chixe khünaknu othom hama hwon-ano.

⁴Chix kax ashuk füima chixe Simon ang thüi: “Khua ji zukya khato chüile paokox, ilaxle hünzome nyax kop ang sha fulax.”

⁵Simon-e lan: “Kwome jamütungle sha thuppu ikoxle tuita ngaxchu chikop; nange ile jangthüiba kue sha thuple anohuhax.”

⁶Hwome sha thuple adüt ilaxle shabu kyet ang thüile nyax huanuma kop.

⁷Ikhoma hwome mama khua ma tüikya hwom füikyabu asun ang hüihüi le chake jep. Hwom hüilaxle khua monyi wüi ji to düt ang thüile awang le nyax dan.

⁸Simon Pitar-e ile changkyabu ngünkya zuma, Jisu chitong ma akhuxle shwomle chix ang thüi: “Jowanpa, ku ha angkya shongpao fa! Ku a ochax khünak tuita changle!”

⁹Chix üntoxle chix füikya katthombu hwome kopkya nyax ngünlaxle abüt.

¹⁰Simon hozui, Jakop hia Juhan, Zebedi sasün nyichu ilewüi chang. Jisu-e Simon ang thüi: “Taxza! Athax makhange nang khünak kople ngo angkya mix ang achang angkya changle.”

¹¹Hwome khua fa to bele adün tox, pangnu danle tox, üntoxle Jisu füito pao.

¹²Hanpak tuita ma ngwon kak füikya mixsün tuita tüikya tingsho to Jisu nguile asu. Otue chixe Jisu ngünle laxpuix, chix alüile chixe Jisu chitong to tswonle awüt le thüi: “Jowanpa, nang mong jangtsuba nange ku amüi ang tsuak!”

¹³Jisu-e chix chak thui üntoxle chix to twon, ilaxle thüi: “Ku mong tsule, nang müilax!” Ima wüi ija kake ija khünak danle tox.

¹⁴Ilaxle Jisu-e chix ang owa hamachu taxwün-ole thüi. Ilaxle chixe thüi: “Nang paolax, nang alüile nguapa hato aholax, üntoxle hwom hato nang kak müiüna le aho ang, nang atsaole fakya khoma, Mosa Wanlom ma tüikya ningle to koxle zomzinglax.”

¹⁵Ikoxlechu chix bama kax süpu-süpu le pule pao, ilaxle chix kax apa ang hia hwom kak müi angkya hanpakma chix hato khünaknu huanuma asox.

¹⁶Ikoxlechu mix kongkya khato paolaxle chixe zangjop.

¹⁷Nyixta Jisu-e hwon-ano le ngoponge, Galili hia Jehudi üntoxlechu Jerusalem pangnukha tokya nguikya farisibu hia wanlom nwotmixbu ikhama thungle tüikya. Tamchu Jisu-e kaklak amüi angkya hanpakma Jowanpa tsakzongchu hakle tüikya.

¹⁸Khünak züizüi e faishokle kakkya mixsün tuita lya ma paile apüi, üntoxle hwome chix hommong to paile anop laxle Jisu thünthoma dan ang azong.

¹⁹Khünaknu huanuma tüikya khoma hwome chix hommong to dün ang chitho, ilaxle hwome chix homkho to ngat, loxtok khutle wo, üntoxle chix khünaknu osung khato Jisu thüntho wama lya ma ashale ajo.

²⁰Otue hwom mongong itukux kya Jisu-e ngünle laxpuih, chixe ija mixsün ang thüi: “Shempa, nang ochax thailak koxdaoa.”

²¹Wanlom tsingpabu hia farisibue hwom-hwom tata füi zangwün ang süt: “Zang adale akax ang chix owa changlaxpuix! Ochax thailak koxtsuak angkya Zang tata wüi!”

²²Jisu-e hwom mongjang awanlaxle hwom ang thüi: “Hünzome iningkyabu büthüikoxle ajang ngopu?

²³‘Nang ochax thailak koxdaoa’ le thüi ang wüi süchwon pia; chichangba, ‘zolax, üntoxle ahamlax’ le thüi ang wüi chwonpuix?

²⁴Ikoxlechu chaxwannu ma ochax thailak kox angkya Khünak Hosa ma zong tüile le kue hünzom ang awan ang koxüi.” (Chixe faishokle kakkya mixsün ang thüi): “Kue nang ang thüipu, zolax! Nang jiplya koplax ilaxle nang hom to chatlax.”

²⁵Ijama wüi thuile hwom pangnu thüntho ma ija khünak zole ajong, chix jiple ngokya jiplya kop, ilaxle Zang mün achuakle hom to chat.

²⁶Hwom pangnu wüi abütkyae khosam! Zakyae awangle Zang achuakle hwome thüi: “Anyix keme chem ohünotün ngünpuix!”

²⁷Ifüima Jisu laile pao ilaxle süisai mix Liwi le amünkya mixsün, chix pa ma thungle ngokya ngün; Jisu-e chix ang thüi: “Ku füito oman.”

²⁸Liwi ajong, pangnu danle tox, ilaxle chix füito pao.

²⁹Ifüima Liwi-e Jisu hanpakma chix hom ma fongkha, üntoxle mixwünbu khama süisai mixbu hia mama khünakbu tüihukya.

³⁰Hwom othom khama asukya züizüi farisibu hia wanlom nwotmixbue Jisu wangshembu füi mongtsik mongma kax apüile akax: “Hünzome süisai mixbu hia ochax khünakbu füi tomle büthüikoxle saxling pu?”, le hwome atüi.

³¹Jisu-e hwom kax to lan: “Müimüi zang-ngai le ngokyabue kak-hu-mix lom angkya chem mwot müntüi, ikoxle kakmixbue tix lomüi wüi.

³²Kuchu mong chat angkya hato alixachongbu nyak ang chichangle tu khato e-ma chilaxle thomkyabu ahyen ang nguipu.”

³³Züizüi khünake Jisu ang thüi: “Juhan wangshembue süt-sax ti chiling homle tele le nui üntoxle zangjople, ilaxle Farisibu wangshem hwomechu ilewüi mokle; ikoxle nang wangshembue sax lingle changle.”

³⁴Jisu-e lan: “Hünzome tuipa hwom füi ngongale aju-asomkya khama tüikya zuikhuibu woknuak-tilan ma thomüi hia?

³⁵Ikoxlechu hanpak nguile hüiüi, otue tuipa hwom kha angkya paoüihex, ifüima hwome chisax chilingle changüi.”

³⁶Anaolechu chixe hwom füi kaxpan tuita akax: “Owaechu nyizün angkya kyetlaxle nyizang to münthap. Ile changkoxle chixe nyizün akyet angkya laiüi, ilaxle nyizün thapkya nyizang füi chiashemüi.

³⁷Chichangba namfyet tankya grep-ti müikhwon sang ozang ma münsho. Ile changkoxle grep tie müikhwon sang akyetüi, ilaxle grepti-ju ashix-khaxüi, üntoxle müikhwon sang amaüi.

³⁸Idaile grepti-ju namfyet tankya a müikhwon sang hozün ma wüi sho angkya changle.

³⁹Üntoxle grepti-ju ozya ling füima owaechu namfyet tankya lingse chitsuüi; chemthüikoxle chixe thüiüi, ‘Ozya wüi sümüi tüia.’”