Read Wancho Naga Luk 6 Bible Online

Luk 6 - Wancho Naga bible

Luk 6

¹Nazak nyix Jisu zim makhange le. Chix wangshembue tsaxkho shik laxle chak ma anuile sax.

²Ikoxle züizüi farisibue thüi: “Nazak nyix chimok küli le Wanlome abaxkya mwot hünzome büthüikoxle mokpu?”

³Jisu-e hwom ang thüi: “Dawid üntoxle chix khünakbu ang wok ano pongma, chixe büle hwon;

⁴chix Zang hom to dong, ilaxle Zang tö kya an, wanlom ma oja nguapabu boma owaechu chisax küli changkya hex, chixe ija laxlaxle sax üntoxle chix füikyabu angchu wüi kox, ija hünzome mün e ano hia?”

⁵Ilaxle chixe ashuk: “Khünak Hosa a nazak nyix thakmachu Jowanpa changpu.”

⁶Ifüi angkya nazak nyix Jisu Sinagok to ngui ilaxle hwon-ano. Tsaxchi chak faile maünkya mixsün ikhama tüikya.

⁷Züizüi farisi hia wanlom nwotmixbue kaxfyet chem makhange alai haxle, nazak nyix kha chixe ija mixsün amüimüi hia chiamüimüi le hule ngo.

⁸Ikoxle Jisu-e hwom mongto thütle ngokya awanlaxle ija mixsün ang thüi: “Ajonglax, üntoxle thochi to oman.” Ija mixsün zolaxle ikhama ajong.

⁹Ifüima Jisu-e hwom ang thüi: “Kue hünzom ma atüipu; Kem Wanlom ma nazak nyix chem moklax le tüikya dai? Amüilax-ole tüipia, ama lax-ole tüipu? Khünak Azünlax-ole tüipia, amütlax-ole tüipu?”

¹⁰Chixe hwom pangnu to akhople hu; ifüima chixe ija mixsün ang thüi: “Nang chak tinkox.” Chixe tin; üntoxle chix chak owüiole müi.

¹¹Hwom mongtsike amün ilaxle Jisu to chemle tomta hwonkoxle müiangkya oli le hwom lualua to ngua azua.

¹²Iponge Jisu haxhua to zangjop ang dong ilaxle wünmütungle zangjople akai.

¹³Otue zang-ngai puix, chixe chix wangshembu chix hato nyak ilaxle mixhuak bün anyi zünle kop; ibu ang chixe wangshembu le nyak:

¹⁴Simon (owa ang chixe Pitar le amün) üntoxle hotüi Andriw; Jakop hia Juhan nyi; Filip hia Bartholomew nyi;

¹⁵Mathi hia Thoma nyi; Alfa hia Jakop nyi; üntoxle Simon (owa ang Patriot le nyak);

¹⁶Jakop hia Juda üntoxle Juda Iskariot, owa khohang kya mix ang achanglaxpuix.

¹⁷Otue Jisu chix wangshembu füi haxhua tokya jupuix, chix wangpünbu huanuma tüikya füi chix haxsha ma thung. Jehudi chaxwan nok khato kya, Jerusalem tokya üntoxle tinu kax angkya noknu Tair hia Sidon tokyabu asoxkya khünaknu othom chongle wüi tüikya.

¹⁸Hwom chix kax apa ang ilaxlechu ma kak naxmüi ang nguikyabu. Haxshix chasae sikangün ngokyabuchu wüi ngui ilaxle hwom kakbu müi.

¹⁹Hwom noke wüi chix to twon ang azong, chemthüikoxle chix makhange laikya tsakzonge hwom kak amüi.

²⁰Jisu-e wangshembu to hulaxle thüi: “Mohiman a hünzom zasabu; Zang Wangting a hünzom kux!

²¹“Hünzom, athax woknuak ma ngokyabu mohiman; hünzom wokfwot tilan müiüi! “Hünzom, athax sople ngokyabu mohiman; hünzom nyi ang ataküi!

²²“Otue Khünak Hosa khoma khünake hünzom thua anuüihex, chilaxle awütüihex, adaüihex, kaxma lili akaxüihex! izuma hünzom mohiman.

²³Ile changkya zuma mongmüikox, pwonla tungle azüikox, chemthüikoxle hünzom hanpakma zangkang to hingho chongkya thomle. Ibu hopu hopa hwomechu ajebu to ile wüi hwonpu.

²⁴“Ikoxle athax hünzom tüinangkyabu maxsax; hünzome hünzom mongmüi komle laxdaoa!

²⁵“Hünzom athax amünle ngokyabu maxsax; hünzom woknuak ma ngoüi! Hünzom athax nyile ngokyabu maxsax; hünzom sopjua angkya laiüi!

²⁶“Ongai khünake hünzom mo amüile wün üihex, maxsax; othai ajebu hanpakma hopu hopa hwomechu ile wüi akaxdaopu.

²⁷“Ikoxle kue hünzom kukax apakyabu ang thüifang: Hünzome zanbu to mongkünlax; hünzom thua anukyabu to müikya mwot moklaxkox;

²⁸hünzom thuakzomkyabu to mohimankox; ilaxle hünzom zong to male tüikyabu hanpakma zangjopkox.

²⁹Owawae kaochi namya ma jangfitba, kaochi namyachu wüi thale ahokox; üntoxle owawae nang kut nyipong janglaxba, chix ang nang nyipongchu wüi laxkox.

³⁰Nang ma jali ajuju ang laxkox, ilaxle nangkux changkoxlechu owawae janglaxdao thüiba chatle taxju.

³¹Ma zong to mixe büle naxmokse le texpuix, ija ningle hünzome mix ang mokle laxkox.

³²“Üntoxle hünzome ma to akünkün to jangkünba, hünzome mohiman büthüikya to kopüi? Ma to akünkün to ochax khünakbue ngaxchu künpu!

³³Üntoxle hünzom zongma mwotmüi mokkyabu tata zongma mwotmüi mok le jangchangba, hünzome mohiman büthüikya to kopüi? Ile nang ochax khünakbue ngaxchu mokpu!

³⁴Üntoxle hünzome ma ang achatle koxtsuaküi le ongkya bubu ang koxle jangchangba, hünzome mohiman büthüikya to kopüi? Ile ochax khünakbue ngaxchu ochax khünak tuita ang otya ma achatle lax ang kangkoxpu!

³⁵Ile münchang! Hünzome ma zanbu to mongkün kox ilaxle hwom ang müikya olom mokle laxkox; olüix kopüi le ongkya chitüi le laxkox. Ile jangchangba nang ang hingho chongkya tüiüi, üntoxle hünzom a Taitax Zang susa ang achangüi; chemthüikoxle münchong chifakya hia chichang-chizangle tüikyabu to chixe chingchale.

³⁶Hünzom Hopa ma chingcha tüikya ningle hünzomchu chingcha füi tüilax.

³⁷“Mix ang kaxfün taxfa, ikoxle Zange nang kax münfünüi; mix ajao ahaile taxchang, ikoxle Zange nang ajao ahaile münchangüi; mix ang thailak laxkox, ikoxle Zange nang ang thailak faüi.

³⁸Mix ang laxkox, ikoxle Zange nang ang koxüi. Othüt müile thütkya, shingle thütkya, sile thütkya, ajunle thütkya, nang tsongmün-khialyem le faüi; chemthüikoxle oja othüt hünzome mix hanpakma twonüihex, ija othüt Zange hünzom hanpakma twonüi!”

³⁹Üntoxlechu Jisu-e hwom ang ija kaxpan akax: “Mikduak mix tuitae hozui mikduak lomzun ang chithoüi; ile changkoxle hokhi monyi wüi tswom khato dütüi.

⁴⁰Lainao owachu nwotmix füi achongkya münchang; ikoxlechu lainao pangnu wüi anokya tsuak kya zuma, nwotmix ningle achangüi.

⁴¹“Ma mik angkya püntho mo chiwün homle ma tüinao mik angkya zamak to mix büthüikoxle hupu?

⁴²Ma mik angkya püntho a ngün ang chitho, jangchangba: ‘Tüinao, kue nang mik angkya zamak awütfang’, le büle thüitsuaküi? Hünzom künkux-mongkwombu! Owangole hünzom mik angkya püntho awütle shongkoplax, ifüima tix hüntüinao mik angkya zamak awüt ang nange tsingle ngünüi.

⁴³“Pünpo müikya ma chilaxli oziak chiziaküi, ija ningle pünpo chimüikya pün ma laxli oziak chiziaküi.

⁴⁴Pün pangnunu wüi ziak kya oziak makhange ija pün changa le awan ang koppu; nange fupsa ziak huxpün ma münkhai chichangba grep ziak thomchong zu ma münkhai.

⁴⁵Müikya mixe ma mongtsang ma müikya athünle thomkya khato kya müikya alaiüi; makya mixe ma mongtsang ma oma athün thomkya khato kya makya alaiüi; chemthüikoxle chemfüi mongtsang awangle ngopuix tune ija akaxpu.

⁴⁶“Hünzome ku ang Jowanpa, Jowanpa, le büthüikoxle nyakpu? Ikoxle kue akaxkya kax ma a chimok?

⁴⁷Owa ku hato hüi üntoxle ku kax atat ilaxle ibu kax ma laxpuix, chix chemningkya mix hex kue hünzom hama ahofang:

⁴⁸Chix a, homting chifün ang long zule tholaxle homzingkya mixsün tuita ningle changpu. Tinu mualyem üntoxle ija hom to thu, ikoxlechu ija alox ang chitho, chemthüikoxle ija a shingmongle zingdao koxle.

⁴⁹Ikoxle owae ku kax atat laxlechu ibu kax ma chilaxpuix, hwom a homting chifün mongle chizingkop homle ongat to hom zingle alaikya mixsün tuita ningle changpu. Tinu mualyemkyae ija hom to thu, ilaxle ija owüiole atsun, ilaxle ija hom tsunkya a za adünkya tuita changkya!”