Read Wancho Naga Luk 7 Bible Online

Luk 7 - Wancho Naga bible

Luk 7

¹Khünaknue atatle Jisu-e ibu akax tsuak füima, chix Kaparnaum to pao.

²Ikha to Roman alixachong tuita ang chixe huanuma künkya da tuita tüikya; ija khünak zikoxlaxle kakle ngokya.

³Otue ija alixachonge Jisu nguikya zing atat, chixe Jisu hato, chix nguilaxle oda amüi angkya hanpakma züita Jehudi khünak mixpa tüichongbu tsanle apao.

⁴Üntoxle otue hwom Jisu hato ngui, hwome chix ma chingcha jule akax: “Chix to nange tüfong koxwüi müile tüile;

⁵chemthüikoxle chixe kwom jat-li to künle, ilaxle kwom Sinagok chuwüi chixe zingle fapu.”

⁶Ikhoma Jisu hwom füito pao. Ikoxle athax Jisu hwom hom makhange otukuxchu chiatsai le tüiponge, ija alixachonge Jisu hato hozuikhuibu ija kax füi tsanle apao:

⁷“Jowanpa, nang sik taxngün ngo, chemthüikoxle nang ku loxkax fang to pui angkya ku ojao münasu. Ikoxle kax tata laxkox, ima wüi ku da kak müiüi;

⁸chemthüikoxle ku chuwüi apün adakya mix fangma ngokya khünak tuita changle, ilaxle kuechu ku fang ma süpahibu thompu; kue mixhuak tuita ang ‘Paokox’ jangthüiba chix pao angkya wüi; ilaxle mama mix ang ‘Oman’ le jangseba chixchu hüi angkya wüi; üntoxle ku da ang ‘Ija mok kox’ le jangtsanba chixe ija mok angkya wüi.”

⁹Ibu atatlaxle Jisu abüt, üntoxle aküile hulaxle chix füito azuikya khünaknu othom ang thüi: “Kue hünzom ang thüipu, ija ningle mongong chongkya Israel khama kue ojongtochu ma atak!”

¹⁰Ilaxle mwot-tsan mixbu hom to chat. Hwom thoma da kak müile nui.

¹¹Ifüima aluile chingo homle chix wangshembu hia khünaknu othom chongkya tuita füi chix Nain le nyak kya ting to ngui.

¹²Chixe pan lünkya füi tomle panjo mixbu jule apong. Zikya mix a zomnu sasün chix tata wüi tüikya lükasa changkya, ilaxle she füi tomle tingsho angkya khünaknu tüihukya.

¹³Otue Jowanpa-e she ngünpuix, chix mong ma she to chingchakyae awang, ilaxle chixe she ang thüi: “Taxsop.”

¹⁴Ifüima chix hüilaxle mangsuak to twon, ikoxle chix pai laxle hüikyabuchu wüi tangle ajong. Jisu-e thüi: “Kue thüipu, naosün zoün!”

¹⁵Ija zidaokya mix zo üntoxle zangwün ang süt, ilaxle Jisu-e chix honu ang achatle kox.

¹⁶Hwom pangnu wüi abütkyae aban ilaxle Zang mün achuak. Hwome thüi: “Kem khama ajepa chongkya laiüna. Zang, chix khünaknu khosün ang nguile tüile!”

¹⁷Jisu bama ija zangwün tomzi nok-za hia chaxwan pangnu khato pule pao.

¹⁸Chix wangshembue Juhan hama ibu pangnu zangwün apüikya zuma, chixe mixsün anyi se;

¹⁹“Juhan-e wünle ngokya hüiüi tüikya a nang hia, hia kwome chatle owawa to hule ngo angkya?”, le atüi ang Juhan-e hokhi Jowanpa hato tsanle apao.

²⁰Otue hokhi Jisu hato ngui, hokhie thüi: “Chixe akaxle ngokya hüiüi tüikya mix nang changcha hex, hia kwome mama owawa to hule shong ngo angkya? le atüi ang kukhi Juhan-e tsanle hüikya changpu.”

²¹Iponge Jisu-e kakmixbu huanuma amüi, haxshix chasa jwonle apao üntoxle mikduakbu ang mik daple kox.

²²Chixe Juhan Mwot-tsan nyi ang thüi: “Hünkhi chatlax ilaxle hünkhie chempang ngünpuix üntoxle atatpuix ibu Juhan hama wünle laxkox: Mikduakbue ngün ang kople, chafai mix ahamle, üntoxle angwonbu amüile; naba mixe atat ang koxle, zidaokyabu azangle zole, ilaxle Kaxho Müikya zasabu hato apukle;

²³ku to mongao chitüikyabu otukuxkya mohiman!”

²⁴Juhan mwot-tsan mix nyi achex füima, Jisu-e khünaknu hama Juhan bama akax ang süt: “Hünzome faokha to Juhan hato paokya zuma, hünzome chem ngünüi le texpu? Zangwin to aloxle ngokya fumchak laifa ngünüi le texpia?

²⁵Hünzom chemto hu ang tomta paopu? Achong abong za-pua laxlaxle ngokya mix to hu ang hia? Hulax, jikjep kya nyiza laxkya mix hia mongtex ma sha le ngokya khünaknubu chongwang hom ma bangüi!

²⁶Ku hama wünhu, ikoxle hünzom chemto hu ang tomta le pao? Ajepa to hu ang hia? Changpu, kue hünzom ang thüifang, ajepa tuita füichu süchongkya hünzome ngündaoa.

²⁷Otsao Lai kax ma zale thomkya a Juhan hanpak changpu. Zange thüi: Hulax, ku mwot-tsan mix, nang thoma lom achwonle bang ang tsanle apaopu.”

²⁸Jisu-e thüi: “Kue hünzom ang thüipu, honue puxkya khakha ma Juhan thak to chongkya mix müntüi. Ikoxle zangkang to ahixkya ngaxchu chix füi süchongkya changpu.”

²⁹Chix kax atatkya pangnu, tamnüilechu Süisai mixbu Jowanpa Wanlom twonlaxle Juhan makhange baptikya kopkyabu changkya.

³⁰Ikoxlechu Saduki hia farisibue hwom hanpakma tüikya Zang tutex pongle chikop ilaxle Juhan-e baptikya münlaxle chilax.

³¹Chatlechu Jisu-e thüi: “Jangchangba, kue athaxpongkya khünakbu chem füi apyenüi? Hwom chem ningle hex?

³²Hwom a hat-süt nui to thungle ngokya naosombu ningle. Othom tuitae othom tuita füi asa: ‘Kwome hünzom ang sam hongpu, ikoxlechu hünzom chiazüi! Kwome jan tsai ngaopu, ikoxlechu hünzom chisop!’

³³Baptikya mix Juhan nguipu, ilaxle chixe süt chisax ti chilingle atsao üntoxle ju chiling, ikoxle hünzome chix ma bao tüile le thüipu!

³⁴Khünak Hosa ngui, chixe saxling le chang; ikoxle hünzome thüi: ‘Ija khünak to hulax, chix a sütbakmix ilaxlechu juling mix changle; süisai mixbu hia tu to chilaxkyabu zuikhui!’

³⁵Ikoxlechu ija pongle kopkya mix pangnue wüi, Zang hwon-je otsingtsing wüi changpule ahole.”

³⁶Simon le amünkya farisi mixsün tuitae Jisu chix hom to fongsax ang se, idaile Jisu chix hom to nguilaxle fongsax ang thung.

³⁷Ija tingsho ma ochax tsün ngokya mixcha tuita tüikya. Jisu-e farisi hom to fongsax ngole ta le she atat, ikoxle she e longthua tuita ma awangle ongan Müikya mün-nga kop;

³⁸ilaxle she mikfi füi Jisu cha ashanle sopngale chix cha zuima, chix nuakfüima ajong. Ifüima she e chix cha she kho füi fwotle azua, ibu füi tun apong, ilaxle ibu to ongan Müikya müngae pale kox.

³⁹Otue farisi süne ija ngün, chixe chix mongto mongzangwün: “Ija mixsün ajepa tsingtsing jangchangba, chix to lyetle ngokya mixcha owahex awanse; ilaxle she chem ningkya ochax tsün ma ngopuix chixe awanse!”

⁴⁰Jisu-e thuile chix füi akaxle thüi: “Simon, kue nang füi lita kax akax angkya tüile.” Chixe lan: “Nwotmix, akaxhüi.”

⁴¹Jisu-e thüi: “Mixhuak anyi ma mixsün tuita ang kox angkya thashe tüikya. Tutae kox angkya ngunhuak ho-aga, ilaxle ata mixe kox angkya a punyi bün tüikya.

⁴²Okhi monyie wüi chix ang thashe achat ang chitsuak le thom, ikoxle ija mixsüne hokhi monyi ang wüi thashe taxkoxngo le shu. Jangchangba chix to hokhi opupue süchongle künüi?”

⁴³Simon-e lan: “Ku mongtex ma a thashe süchongle tüikya thailak atak kya mixe changüi.” “Nang kax changtomtapu”, le Jisu-e lan.

⁴⁴Ifüima chixe mixcha chito aküi le hulaxle Simon ang thüi: “Nange ija mixcha ngünchami? Ku hünzom hom to nguipu, ikoxle ku cha so ang nange ti ngax chifa, ikoxle she e ku cha mikfi füi solaxle kho füi fwotle azua fadaoa.

⁴⁵Nange ku tun apongle chipongkop, ikoxle ku nguikya shemle she e ku cha füi tun apongkya chidan.

⁴⁶Nange ku khang to pa ang olipe münga chifa, ikoxle she e ku cha a ongan Müikyae awang daoa.

⁴⁷Ikhoma kue akaxpu, she e ahokya mongkün chongkya makhange zazazikya she ochax thailak atak kya ocha ahopu. Ikoxle owa ang hidaokya ochax thailak koxpuix chixe mongkün hidaole wüi ahole.”

⁴⁸Jisu-e ija mixcha füi akax: “Nang ochax thailak koxdaoa.”

⁴⁹Fongsüt tsap ma thungle ngokyabuechu tata füi zangwün: “Ochax thailak to apüi koxtsuak angkya chix owa hex?”

⁵⁰Ikoxle Jisu-e ija mixcha ang thüi: “Nang mongonge nang sündaoa, nang mongsom ma paolax.”