Read Wancho Naga Luk 8 Bible Online

Luk 8 - Wancho Naga bible

Luk 8

¹Ifüima aluile chihomle, Jisu tinglong hia tingkhuabu to Zang Wangting bama Kaxho Müikya apukle aham.

²Wangshembu bün anyi chix füito pao, ilaxlechu chixe hwom angkya haxshix chasabu jwonle apaole hia kaklakbu amüile koxkya shekobu züizüi tüikya. Hwom a Meri (owa ang Magdalen le nyak) owa angkya haxshix chasa anüt jwonle apao;

³Juana, owa kakopa Chuza, wanghom Herod khwa ma alixachong tuita changkya hex; üntoxle Susana, ilaxlechu hwom ma atüitüi füi Jisu hia chix wangshembu to fongle ngokya mama shekobu le tüikya.

⁴Jisu hato khünaknubu ata ting tokya füima ata ting tokya dule nguile ngo; ilaxle khünaknu othom huanuma asoxkya zuma Jisu-e ija kaxpan akax:

⁵“Hanpak tuita ma tsaxli sai ang kakya mix mixsün tuita tüikya. Chixe tsaxli zangdom awangle saikya zuma, ikha angkya züizüi lomtang fole düt, ibu to chae nak üntoxlechu osabu nguilaxle tswonle sax.

⁶Ikha angkya züizüi long tüikya khato düt, tsaxtsang ibu momle khang, ikoxle hax zomkya kha chitüi koxle ijabu zanle zi.

⁷Tsaxtsang züizüi a hux füikya fum khato düt, ijabu fum füi tomle tsong, ikoxle ibu to fume alumle amüt.

⁸Üntoxle tsaxtsang züizüi a haxwan Müikya khato düt; ibu tsaxpün tsong ilaxle otsang hopong nguile saxto dün.” Üntoxle Jisu-e ashuk: “Nang ma na jangzaiba apalax.”

⁹Ija kaxpan chem hanpakhex le Wangshembue Jisu ma atüi;

¹⁰Üntoxle chixe lan: “Zang Wangting bama huxsa je-hwon hünzom ang fadaoa, ikoxle mamabu hanpakma kaxpan makhange tix angaiüi; ikoxle hwome hukoxchu chingünüi, ilaxle atatkoxchu chiawanüi.

¹¹“Athax kya kaxpan a ija changle: Tsaxtsang a Zang Kax.

¹²Lomtang fole dütkyabu tsaxtsang a, chix kax atatkyabu hanpak changle; atat daokoxlechu mongong hia khosün füi atsaile naxngo ang hwom kün-mong tokya Zang Kaxho haxshix nguilaxle pale pao.

¹³Long tüikya khato dütkya a; Zang Kax atatlaxle mongmüi tungle pongle kopkyabu. Ikoxlechu ija hwom mongto zule düt ang chikox; onox ma mongongle ngo laxle thwontsing hüikya zuma hwom dütle max.

¹⁴Fum khato dütkya tsaxtsangbu a; Zang Kax atatlaxle ngokyabu; ikoxlechu künthang mongdang üntoxle okop olwot tamchu chaxwannu mongmüi akhople hüilaxle hwom to alum, ilaxle hwom oziak otuechu mün ang chifa.

¹⁵Haxwan Müikya khato dütkya tsaxtsang a; Zang Kaxho atatlaxle, ija kax ma laxle mongtsang ma athünle thom, ilaxle oziak opua mamün-mamünle adu ngokyabu changpu.

¹⁶“Wünzua tuita atsop laxle owaechu khonge akhuple münthom, chichangba lyafang to münthom. Itülüi chixe ija wüntik dan-nui ma thomüi, ikoxletix homkha to dongkya khünaknue zangngai ngün ang kopüi.

¹⁷“Chempang pyenle thomtüipuix ibu pangnu ko to angaiüi, ilaxle akhünle thomkya pangnu ataküi üntoxle zangngai to alaiüi.

¹⁸“Ijadaile, hünzome atatkya ningle khünzai lax; chemthüikoxle owama muale tüipuix chix ang aluile koxüi, ikoxle owama chitüipuix, chix ma tüipule texngokya sasa ngaxchu bakle paoüi.”

¹⁹Jisu honu hia honao hwom chix hato ngui, ikoxle khünaknu tusox khoma hwom chix hato sox ang chitho.

²⁰Mixhuak tuitae Jisu ang thüi: “Hünnu hia hünnao hwom homtho to ajong ngole, hwome nang füi apongse le ta.”

²¹Jisu-e hwom pangnu ang thüi: “Zang Kax apa üntoxle ija kax ma laxle ngokyabu ku anu hia kunao hwom changpu.”

²²Nyixta Jisu chix wangshembu füi khua ma ngalaxle thüi: “Kem jinu tale tachi to lehax.” Ikoxle hwom achex.

²³Hwom khua chüile ta ngoponge, Jisu mikngüt hüile jip. Tinu mongto alele zangcheie thule hüi, ilaxle khua tie awang ang thüi: ikhoma hwom thomzünüi khakha le monghik ashukle khosam.

²⁴Wangshembu Jisu hato hüilaxle: “Nwotmix! Nwotmix! Kempi ziüi tüia!”, le nyakle azwot. Jisu zolaxle zangchei hia tichap ang dang angkya kax kox; ibu zakle kongkya ma huanuma dang.

²⁵Ifüima Jisu-e chix wangshembu ang thüi: Hünzom mongong oma maxün? Ikoxle hwom abüt aban le ngo, ilaxle tata füi zangwün: “Chix chemningkya mix hex? Chixe kax koxkoxle zangchei hia tichape ngaxchu chix kax ma laxle!”

²⁶Jisu hia chix wangshembu Galili Shinthuk-titung kai laxle tüikya Gerasa nok chaxwan alople khua ma pao.

²⁷Jisu shuakax ma thaikya füi tomle, ija tingkhua angkya hüikya, haxshixbu füikya mixsün tuita chix füi apong. Sükaile wüi chix hom ma ngo ang chitho laxle nyizachu chilax homle zuktsam to paole ngokya mix changkya.

²⁸Otue chixe Jisu ngün, chix akhong, chix Jisu chitongma alüile tswonle awüt ilaxle azaxle thüi: “Jisu, Taitax Zang Hosa! Künyi bama chem tüikya? Kue chingcha jupu, ku ang sik taxangününfa!”

²⁹Jisu-e haxshix ang chix angkya laile paoünle thüikya khoma chixe ile thüi. Ijae chix obithomthom ma hexle kople thom, üntoxle chix cha chix chak ma janbüi füi akalaxle kun ma shole thomkoxchu, chixe janbüi afün üntoxle haxshixe chix faokha to jwonle apao le wüi ngo.

³⁰Jisu-e chix ma atüi: “Nang mün büle?” “Ku mün a Mob”, le chixe lan; chemthüikoxle chix ma haxshix huanuma wangle ngokya changle.

³¹Chingchalaxle othong chitüikya tswom khato kwom taxawütünfa le haxshixbue Jisu ma chingcha ju.

³²Ija zui angkya haxnu ma osüt saxle ngokya wakzyem tuita tüikya. Ikoxle haxshixbue hwom idu wak ma wang ang koxhüi le Jisu ma kax ju, ilaxle Jisu-e hwom pao ang kox.

³³Hwom ija mixsün angkya laile pao ilaxle idu wak ma wang. Ija wakzyem pangnu wüi zakkho chito awukle pao üntoxle pangnu wüi jinu mongto dütle zi-max.

³⁴Ile changkya bu pangnu wak nyetmixbue ngün, ikoxle hwom zikle chatlaxle tingkhua to tamchu wak tsom nui pangnu to ija kax apuk.

³⁵Bülepang changdaokoxpu le hu ang khünaknu laile pao, üntoxle otue hwom Jisu hato nguipuix, chix angkya haxshix laile paokya mixsün khangka hingle üntoxle nyilax laxle Jisu chitong ma thungle ngokya ngün; ngünlaxle hwom pangnu wüi za.

³⁶Ija angün-ngün noke wüi khünaknu hama ija mixsün müikya mo wün.

³⁷Ifüima ija chaxwan tokya noke wüi Jisu ang süpaofale akax, chemthüikoxle hwom huanuma za. Ijadaile Jisu khua ma nga üntoxle ikha danle tox.

³⁸Owa angkya haxshixbu laile pao ang kox, ija mixsüne Jisu ang thüi: “Kuchu nang füito pao ang koxhüi.” Ikoxlechu Jisu-e chix füi ile akaxle apao;

³⁹“Hom to chatlax ilaxle Zange nang hanpakma mokdaokya apualax.” Ija mixsün, Jisu-e chix hanpakma chemle mokfapuix, ija apukle tinglong kaile le.

⁴⁰Otue Jisu tinu tachi to chat, khünakbue chix pongle kop, chemthüikoxle hwom pangnue wüi chix tanle nuikya changle.

⁴¹Ifüima Jairas le amünkya mixsün ngui; chix a ikha angkya sinagok ma akhokya tuita changkya. Chixe Jisu chitongma akhuxle shwomle hüilaxle hwom hom to süpaohax le Jisu se,

⁴²chemthüikoxle chix ang sasün tuita wüi, zangbün anyi nguiünkya shekosa tüikya, she kakle ziüi khakha.

⁴³Chix ikha to pao ang lom to aham le ngoponge pangnu chito khange khünaknue chix akhop. Hwom khama zangbün anyi aji jenle sikngün ngokya mixcha tuita tüikya; she e she ma atüitüi kak-hu-mix ang koxle ashix, othong chitüikya tswom ikoxlechu owaechu she kak amüi ang chitho.

⁴⁴Ija mixcha nuakfüichi tokhange mixba to apitle hüi üntoxle Jisu nyitua to lyet, ifüi tomle she aji jenle ngokya thwon.

⁴⁵Jisu-e atüi: “Ku to owae lyetpu?” Noke wüi münlyet thüi münlyet le lan; Pitar-e akax: “Nang akhople ngokya khünaknue shing-thwomkya changüi.”

⁴⁶Ikoxlechu Jisu-e thüi: “Owawae ku to lyetdaoa, chemthüikoxle ku angkya tsakzong laile paokya ma kue awanpu.”

⁴⁷Ijama ija mixchae she atakdaoale awan, ilaxle she abün-ngale hüilaxle Jisu chitong ma akhux. Ikhama, noknu thünthoma she e chix to büthüikoxle lyetkya hex, üntoxle ifüi shemle she kak büle müipuix, she e chix hama apua.

⁴⁸Jisu-e she ang thüi: “Kusa, nang mongonge nang amüidaoa, mongsom ma paolax.”

⁴⁹Jisu-e ija kaxzex ngoponge, ija alixachong hom tokya kaxho mix ngui. Chixe Jairas ang thüi: “Hünsa ziüna, Nwotmix ang chingui-ngobachu le thüilax.”

⁵⁰Ikoxlechu ija atatlaxle Jisu-e Jairas ang thüi: “Taxza, nang ma mongong tüilax, she chatle chatüi.”

⁵¹Otue chix ija hom to ngui, chixe chix boma Pitar, Juhan, Jakop ilaxle naosa honu hia hopa nyi boma owachu chikop.

⁵²Ikhama tüikyabu pangnu wüi naosa hanpakma mangsople ngokya. Jisu-e thüi: “Taxsop, naosa zikya münchang, she jip ngowüi!”

⁵³Hwom pangwüi chix chanyi, chemthüikoxle hwome she owüiole zitomtaünale awan.

⁵⁴Ikoxlechu Jisu-e she chak ma kop üntoxle nyakle thüi: “Naosa, zoün!”

⁵⁵She tsün chatle chat, ilaxle ima wüi she ajong, üntoxle Jisu-e hwom füi she ang tüli jali sax ang laxkoxle thüi.

⁵⁶She honu hopa hwom abüt, ikoxlechu Jisu-e hwom füi, chempangle changpuix ija owa hamachu taxwüno le akax.