Read Wancho Naga Luk 9 Bible Online

Luk 9 - Wancho Naga bible

Luk 9

¹Jisu-e wangshem bün anyi nyak üntoxle haxshix jwon angkya hia kaklak amüi angkya tsakzong kox.

²Ilaxle Zang Wangting bama kaxho apuk ang hia kaklak amüi ang ibibi kaxtom füi hwom apao:

³“Hamlom bama hünzome chemchu taxkop; kaithoxchu taxkop, nyitsongchu taxkop, sütchu taxkop, ngunsyenchu taxkop, nyiza ngaxchu onüi taxkop.

⁴Ojong khato hünzom pongle koppuix, ija tingsho angkya mapaopaoba pongle kopkya kako ma athong laxle ikha makhange ahamkox;

⁵Ojong khato khünaknue hünzom pongle chikop üihex, ija tingsho dantoxdao, ilaxle hwom nak-khünlax ang hünzom cha angkya labu ngaxchu hongle toxdao.”

⁶Wangshembu pao üntoxle pangnu tingsho towüi aham, Zang Wangting bama Kaxho Müikya apuk ilaxle pangnu khato wüi kakmixbu amüi.

⁷Otue Galili apünkya Herod-e ile changkyabu zing atatlaxpuix, chix ang huanuma khosam, chemthüikoxle züizüibue Baptikya mix Juhan azangle zoüna le akax.

⁸Mamabue Elija laiüna le akax, üntoxle kaipongkya aje tüta thüichu laiüna le akaxkya mixchu lai.

⁹Herod-e thüi: “Juhan nang kue dingsomle langdao; ile changkyabu zing kue atat ang kopkya chix owa?” Ilaxle chixe Jisu ngünse le lomle ngo.

¹⁰Wangshembu chat üntoxle hwome mokkyabu pangnu Jisu hama wün. Chixe hwom chix füito laxlaxle Bethsaida ting to pao.

¹¹Otue khünaknue ija zing atatpuix, hwome chix man to. Chixe hwom mongmüi le pongle kop, hwom hama Zang Wangting bama akax; ilaxle amüi ang lomkyabu ang kak amüile kox.

¹²Zanghan düt ang thüile tüiponge wangshembu chix hato hüi üntoxle thüi: “Hoxhoxle tüikya tingkhuabu to paolaxle hwome sütling hia jipnui pomnui atak tsuak angkya zongma khünaknu fan ang laxkox, chemthüikoxle ikha a owa ngax chitüikya wandangja kya faokha changle.”

¹³Jisu-e hwom ang thüi: “Hünzome hwom ang saxling küli laxkox.” Hwome lan: “Kwom ma tüikya ashukle an khao aga hia nyax jang anyi wüi. Kwom pao üntoxle khünaknu hanpakma süt shaklax lekya kax hia?”

¹⁴(Ikhama khünak mixmüimüi hajat aga tukux tüikya) Jisu-e chix wangshembu ang thüi: “Khünaknu punyibün pong athomthom le ngo ang laxkox.”

¹⁵Wangshembue ile mokkya füima;

¹⁶Jisu-e an khao aga hia nyax jang anyi kop, ding to angakle hu, ibu hanpakma Zang ang münchong fa, ibu akhix, ilaxle khünaknu ang ahanle laxkoxle wangshembu chak to kox.

¹⁷Hwom pangnue wüi okhongui le sax, ilaxle ota-otua toxkya wangshembue sang bün anyi tswonle kop.

¹⁸Nyixta Jisu, chix tatae jople ngoponge wangshembu chix hato ngui. Chixe hwom ma atüi: “Khünaknue ku ang owa le thüipuix?”

¹⁹Hwome lan: “Züizüi e nang Baptikya mix Juhan changpule, züizüi e Elija changpule üntoxle mamabue a kaipongkya ajepa tüta thüichu chatkya changüi le thüile.”

²⁰Chixe hwom ma atüi: “Ikoxle hünzome büle tex? Hünzome ku ang owa le thüipu?” Pitar-e lan: “Nang a Zang tokhange nguikya Messaiah changle!”

²¹Ifüima Jisu-e ija kax owa hamachu chiwün angkya hwom füi kaxshing kople akax.

²²Chixe ilechu wüi thüi: “Khünak Hosa sik huanuma ngün angkya jao, üntoxle mixpa tüichongbue, nguapa akhokyabue ilaxle Wanlom nwotmixbue chix chilaxle awütüi. Chix langüi ikoxlechu nyix azom lekya to chatle azangle zoüi.”

²³Üntoxle chixe hwom pangnu ang thüi: “Owawae ku füito hüise jangtsuba, chixe ma alak angkya changle, nyixfole chixe ma pünsak kop laxle tix ku füito hüi angkya changle.

²⁴Chemthüikoxle matsün khosünse le texkyabue ija amütüi, ikoxle ku khoma owae matsün amüt laxüihex, chixe ija sünle kopüi.

²⁵Khünake chaxwannu pangnu kople tsuak ikoxlechu ma khüzün amütle thom chichangba mixe lüt ang koxle changkoxle, chix ang lap tüiangcha mi? Müntüi!

²⁶Khünak tuita ku hanpakma hia ku kax hanpakma jangazak thüiba, Khünak Hosa-echu Hopa fuazang ma kaxtaimixbu füi nguikya zuma chix hanpakma azaküi.

²⁷Kue thüipu, Zang Wangting mangün tanto chizi angkya atsingsho le ikhama züizüi tüile.”

²⁸Chixe ile akaxkya hatdang tuita füima, Jisu-e, Pitar, Juhan hia Jakop hwom kop laxle haxnu kho to zangjop ang dong.

²⁹Chixe zangjople ngoponge, chixsün-chixjo jei üntoxle nyiza jikjyeple nyanle tse.

³⁰Allele mixhuak anyi chix hato lai laxle zangwünle ngo. Okhi a Mosa hia Elija nyi changkya.

³¹Okhi Zangkangting fuazang ma lai, ilaxle aluile chingo homle chix Jerusalem ma zikya makhange Jowanpa mongtex mwottho büle otok to ngaile aho üihex, ibu bama Jisu füi zangwün.

³²Pitar hozui hwom a mikngüt müile jip ngo, ikoxle hwom zolaxle Jisu fuazangkya hia chix hama ajongle ngokya mixsün anyi ngün.

³³Ija mixsün nyie Jisu dantoxlaxle pao, iponge Pitar-e chix ang thüi: “Nwotmix, kem ikhama ngokya müihule! Kwome nyihom azom zingüi; tuita a nang hanpakma, tuita a Mosa hanpakma, ilaxle tuita a Elija hanpakma.” (Chixe chem akaxpuix ija chixe chiawan).

³⁴Chatlechu chixe akaxle ngoponge, zangfwom thwomta hüilaxle ochaxbae hwom to khung; ilaxle hwom khangkho ma zangfwom hüikya zuma wangshembu za.

³⁵Zangfwom angkya kaxzing laile akax: “Ija a Kue kamle kopkya Ku Sasün changle; chix kax ma laxlax!”

³⁶Otue ija kax ashukpuix, ikhama Jisu chix tata bang. Wangshembue idubu pangnu hanpakma dangle ngo, ilaxle iponge hwome ngünkya tütachu owa hamachu chiwün.

³⁷Ofüinyix Jisu hia chix wangshem hwom azom haxnukho tokya ju, üntoxle khünaknu othom chongkya tuita Jisu füi apong.

³⁸Othom kha angkya mixsün tuita akhong: “Nwotmix, chingchalaxle kusa lükasa, chix tata wüi tüikya to shonghufa.

³⁹Haxshix chasa tuitae kop laxle chix abütsünsün le akhong-khongle, ilaxle tsünle zi ang kox üntoxle wikha ma thuakbuak lai ang koxle. Ile chix tsangtsa thule asyep le machang-changba chix angkya jao laile münpao.

⁴⁰Kue nang wangshembu ang shongapaofa thüikoxle hwome münapaotho.”

⁴¹Jisu-e lan: “Hünzom mongong chitüikya üntoxle thaikya khünakbu changle! Ku hünzom füi tomle otukux tomta naxngole? Hünzom füi athongle ku otukux ngoüi?” Ifüima chixe ija mixsün ang thüi: “Hünsa ikha to apüihüi.”

⁴²Naosa hüile ngoponge haxshixe chix haxkha to tswonle awütle tsünle azik. Jisu-e haxshix chasa ang kaxkox, naosa amüi, üntoxle hopa ang achatle kox.

⁴³Pangnu tsuak kya Zang tsakzong ngünlaxle khünaknu nok wüi abüt. Chixe mokkyabu hanpakma pangnu wüi abüt-abanle ngoponge, chixe chix wangshembu ang thüi:

⁴⁴“Ijabu zangwün hünzome na ma awünle koplax, chemthüikoxle Khünak Hosa khünaknu chak to owüiole kox angkya changle.”

⁴⁵Ikoxlechu wangshembue ija kax chem hanpakhex chiawan; hwome awan ang chikoxle ija zangwün pyenle thom, üntoxle ija bama chix ma atüi ang hwom za.

⁴⁶Hwom achongkya opupuhex le wangshembu khama zangwün tsa.

⁴⁷Jisu-e hwom mongjang awan, idaile chixe naosa tuita kop, ilaxle chixe ija nao chix zui ma ajong;

⁴⁸ilaxle hwom ang thüi: “Ku mün ma ija nao owae pongle kopüihex, ku pongle kopkya changpu; üntoxle owae ku pongle koppuix chixe ku tsanle apaokya mixchu pongle koppu; chemthüikoxle hünzom khama ahixkya opupu hex, pangnu füi achongkya chix changpu.”

⁴⁹Juhan-e akax: “Nwotmix, nang mün ma haxshix jwonle apaokya mixsün tuita kwome ngünle, ilaxle kwome chix ang zakün le akaxdaoa, chemthüikoxle chix a kem othom kha angkya münchang.”

⁵⁰Jisu-e Juhan üntoxlechu wangshem mamabu ang thüi: “Chix taxabaxkox, chemthüikoxle kem füi zan chichangba chixchu kem hanpak hex.”

⁵¹Chix zangkang to dün angkya hanpak nguile hüikya zuma, chix mongto ajang ilaxle Jerusalem to pao ang lai.

⁵²Chixe achale kaxho mixbu apao. Hwom Samaria angkya ting tuita to chix hanpakma pangnu achwon ang ngui.

⁵³Ikoxle ikha tokya khünaknue chix pongle chikop, chemthüikoxle chix a atsingsho le Jerusalem to pao angkya chang.

⁵⁴Wangshem Juhan hia Jakop nyie ija ngünkya zuma, hokhie thüi: “Jowanpa, hwom tha ama ang kwome ding tokya wün se ang nang mong tsucha hex?”

⁵⁵Jisu-e aküi laxle hokhi to sa.

⁵⁶Ifüima Jisu hia chix wangshembu mama nok to pao.

⁵⁷Hwom lom to ahamle ngoponge, mixsün tuitae Jisu ang thüi: “Nang apaopao khato ku nang füito azuiüi.”

⁵⁸Jisu-e chix ang thüi: “Hijanbu ang olua tüipu, üntoxle osabu ang ozop tüipu, ikoxle Khünak Hosa ang shuile nazak angkya kha onui jaojao chitüi.”

⁵⁹Chixe mama mix ang thüi: “Ku füito oman”. Ikoxle ija mixsüne thüi: “Nwotmix, ku hom to chatlaxle owangole apa mang zule toxhüiang.”

⁶⁰Jisu-e lan: “Zikyabu ma zuk-zuk to zu ang toxdao. Nang paokox ilaxle Zang Wangting bama apukkox.”

⁶¹Mama mixe thüi: “Nwotmix, ku nang füito azuiüi, ikoxle owangole ku hom to chatlaxle kakonu füi wünzua kax akax toxhüi ang.”

⁶²Jisu-e chix ang thüi: “Khünake hanbai ang sütfüima füichi to aküile hukya mix Zang Wangting hanpakma mwot münthap”.