Read Wancho Naga Tsaitong-Kaxtong 10 Bible Online

Tsaitong-Kaxtong 10 - Wancho Naga bible

Tsaitong-Kaxtong 10

¹“Ifüima JOWANPAe ku ang thüi: ‘Owangpongkya lailaile longkhao anyi zinglax ilaxle ibu sho ang pünsuak tuita zinglax ilaxle ku hato haxnukho to donglax;

²ilaxle amipongma nange ashixdaokya longkhao ma chemle zalaxle tüikya hex ilailaile kue longkhao ibu machu zale koxüi, ilaxle nange ibu pünsuak mong ma shole thomlax.’

³“Ikhoma kue akasia pün makhange suak tuita zing ilaxle owangpongkya lailaile longkhao anyi zinglaxle ibu haxnu kho to dünle apong.

⁴Ima JOWANPAe ami owangpongkya longkhao ma zale tüikya kaxhuak pangwüi ibu longkhao ma zale kox; ija a haxnu ma hünzom pangwüi asoxle tüikya nyix chixe wün makhange zangwünle changpongma fakya kaxtom bün changkya. JOWANPAe ku ang longkhao ibu kox,

⁵ilaxle ku a tok ahole haxnukho tokya ju. Ifüima JOWANPAe kaxtom fakya lailaile, kue ibu kue zingkya pünsuak ma shole dan: ilaxle anyix kople ija ikhama wüi thom.” (

⁶Jakan nok kux tüküi angkya achexle Israel nok Moaserah to pao. Arun a ikhato zi ilaxle akhün, ilaxle chix lüi ma sasün Eliazar a nguapa ang kam.

⁷Imakhange hwom Gudgodah to ngui: ilaxle Jotbathah to le; ikha a ti füikya tüküi tüikya haxtok.

⁸Ipongma JOWANPAe Tsaotsüt Suak to hu angkya Liwi homjen zünle, zompu-zangpabu mwot mokle chix thotha angkya ilaxle chix mün ma kaxzakdünle shozex angkya kox. Ilaxle ibu a hwome mok angkya hwom mwotbu changle.

⁹Idaile mama homjenbu ningle Liwi homjene haxtok chikop; hwome kopkya a tuita zompu-zangpa ningle, JOWANPA kaxtsao ma, chix thothale chang angkya, ijatix.)

¹⁰Ami owangpongkya lailaile ku haxnukho to nyix-punyi wün-punyi nui. JOWANPAe tamchatle ku zangwün to natha ilaxle hünzom münamütpu le zangwün tsuak.

¹¹Ifüima chixe ku paolaxle hünzom lomzun angkya akax, ikoxle tix hünzom putong hwom ang koxüihex-ole tsaodaokya haxtok hünzome koptsuak angkya chang koxle.

¹²Athax a, O Israel khünaknu, JOWANPAe hünzom ma chem jupuix ija to apalax: JOWANPA to shwom-to le changlax ilaxle chix kaxtom ma pangwüi moklax. Hünzome ma kün-hi-mong bakle koxle chix to mongkünkox tamchu chix thothakox,

¹³ilaxle chix wanlom kax pangwüi ma laxle tüikox. Hünzom fün naxmüikoxle anyix kue hünzom ang koxpu.

¹⁴Atsuakya zangkhoting ngaxchu JOWANPA kux wüi changle; chaxwannu chu chix kux wüi changle, ilaxle ima atüitüi komkaile chix kux.

¹⁵Ikoxle hünzom putong hwom tokya JOWANPA mongkün tüle chongkya tüikya khoma mama owawa chichang homtoxle chixe hünzom zünle koppu, ilaxle hünzom athax kople chixe zünle kopdaokya chix khünaknu changle.

¹⁶Idaile, athax makhange JOWANPA kax ma laxle tüilax ilaxle kheba chithüile taxngo.

¹⁷JOWANPA hünzom Zang a baozangbu pangwüi thakma achongkya tamchu pangwüi thakma chatsak-muazongle tüikya Zang changle. Chix a tüle chongle tamchu athakle tüile, ikhoma chix chathua a za angkya wüi changpu. Chixe masüi-mixlüile münchang tamchu zuizun münlax.

¹⁸Chixe zomnu hia khaxsa hwom wünhai chitüile tomwüi hule; kem füi tomle ngole hüikya mixnokbu to chixe mongkünle ilaxle hwom ang sütling hia nyiwun ibu koxle.

¹⁹Idaile mixnok ibu hato mongkün ahokox, chemthüikoxle hünzom chuwüi tam a Ijip nok to püntüi ang ngole toxdaokya changle.

²⁰JOWANPA hünzom Zang kax ma laxle tüilax ilaxle chix tata to shwom-to le changlax. Chix to mongong tüile ngolax ilaxle hünzome chix mün ma zaza tsaolax.

²¹Chix achuak kox: Chix a hünzom Zang, ilaxle hünzome ma mik füijao, chixe hünzom hanpakma ohünotün hia khomtsikya mwotbu mokkya hünzome ngünle laxdaoa.

²²Chemtue hünzom putong hwom Ijip nok to paokya hex, ipongma hwom khünak huak 70 wüi changkya. Ikoxle athax a JOWANPA hünzom Zang-e hünzom a ding angkya lyettsi büta le atsatdaoa.