Read Wancho Naga Tsaitong-Kaxtong 11 Bible Online

Tsaitong-Kaxtong 11 - Wancho Naga bible

Tsaitong-Kaxtong 11

¹JOWANPA hünzom Zang to mongkünkox ilaxle othuithuima chix wanlombu kax ma laxle tüikox.

²Hünzome chix füi ngole hüilaxle chix bama chempang tsingle hüidaolaxpuix ibu hünzome anyix texle ataklax. Ibu apongle hüikya a hünzom su-sabue münchang ikoxle hünzom jaojaoe apongkya changpu. Hünzome JOWANPA chongkya, chix tsak-zong, chix janzüi,

³ilaxle chix ohünotün mwotbu pangwüi ngünle laxdaoa. Chixe Ijip nok wanghompa tamchu chix chaxwan pangnu to chemle mokdaopuix ibu hünzome ngünle laxdaoa.

⁴JOWANPAe chemle Ijip nok süpahibu hwom man hia man-kanlinbu füi afomle Tütsak Tinu ma ti to max ang tompuix, ija hünzome ngünle hüidaoa. Hwom a hünzom achuale hüingokya changkya.

⁵Hünzom ikhato nguiüi thoto wüi achale sak-hax to JOWANPAe chempang mokpuix ibu hünzome awan ngopu.

⁶Reuben homjen ang Eliab sasün hwom, Dathan hia Abiram hwom to chixe chemle mok ibu tamchatle ajangle anolax. Khünak noknusa tunthoma hax kangle aka ilaxle hwom haxnu-homsabu, hwom nyihom, hwom dabu tamchu hwom tsom-pom pangwüi ikhama wom.

⁷Changle, JOWANPAe mokkya chongkya mwot ibu ngünle hüikyabu a hünzom wüi changpu.

⁸Anyix kue hünzom ang koxkya wanlombu pangwüi kax ma laxle tüilax. Ifüima hünzom shuanu tale lelaxle hünzom ngui angkya kha haxtok hünzome kop ang thoüi.

⁹Ilaxle JOWANPAe hünzom putong hwom hia hwom su-sa hwom ang koxüihex-ole tsaokya haxtok ma hünzom tsünlo-khothole ngo ang thoüi.

¹⁰Athax hünzome kop angkya haxtok a ami hünzom ngole toxdaokya Ijip nok haxtok lailaikya münchang. Ekhato hünzome tsax küile changpongma, ikhato ti züile ahüi ang hünzom ang tüle nuzaopu;

¹¹ikoxle athax hünzome kop angkya haxtok a haxhua hia haxshabu tüikya haxtok changle, zangwat makhange ti apüile fakya haxtok a.

¹²JOWANPA hünzom Zang-e ija haxtok apu-achangle tamchu zanglao atale nyele ngole.

¹³Idaile anyix kue hünzom ang fakya kaxtombu kax ma laxle tüilax. JOWANPA hünzom Zang to hünzome ma kün-hi-mong makhange zongbakle mongkünlax tamchu chix thothale changlax.

¹⁴Hünzome ile jangmokba, hünzom haxtoke ti lompongkhae chixe ti ajoüi, tso-hi-wa nyi bama, wa-hi-tso nyi bama a, ikoxle tix hünzom hanpak ang saxziak, grep hia olip ziak, ibu tüle puamün ang kopüi,

¹⁵ilaxle hünzom tsom-pom hanpak ang fumchui chuwüi kopüi. Hünzome alomlom sütling atak-apongle hünzom ang woknuak-tilan müile ngoüi.

¹⁶Hünzome ma alüile, JOWANPA ha angkya, mama baozang to shwom-to le chang ang pao ang taxtom.

¹⁷Hünzome ile jangmok, JOWANPA ang hünzom füi mongtsikkya tüiüi. Chixe zangwat tsyenle tüiüi, ikoxle hünzom haxtok a manzai ang ojao chimüile tüle tsakle maüi. Ile, chixe hünzom ang fale ngokya haxtok tüle müikya haxtok chang koxlechu, lebama wüi hünzom ikhato samüi.

¹⁸Kaxtom ibu texle ataklax ilaxle hwom ang mong amüilax. Texle atak angkya hanpakma ibu a hünzom suakto ma tamchu khangpong ma khakle koplax.

¹⁹Ibu a hünzome su-sabu hama anwot-anole changkox. Hünzome hom ma ngopongma, hünzom lomba to tüipongma, hünzome nazak laxpongma tamchu hünzome mwot mokle ngopongma, ibu bama zangwünkya tüikya.

²⁰Hünzome ibu kapox-longkho hia zünkaibu to zale thomlax,

²¹Ifüima, JOWANPA hünzom Zang-e hünzom putong hwom ang koxüihex-ole tsaokya haxtok ma hünzom tsünlo-khothole ngo ang kopüi. Chaxwannu thakma zangding tüile ngokya kople hünzom ikhato ngo ang kopüi.

²²Kue hünzom ang koxkyakya wanlombu kax ma laxle tüilax: JOWANPA hünzom Zang to mongkünkox, tütalichu chix kaxtom ma laxle mokkox, ilaxle chix to mongong tüikya füi ngokox.

²³Ile jangchangba hünzom nguikya füi tomle chixe mixjat-mixlibu pangwüi jwonle apaoüi; ilaxle hünzome hünzom füi süluile tamchu tsak-zongle tüikya haxtokbu kople lax ang thoüi.

²⁴Hünzome hünzom ahamle hüidaokya haxtok pangwüi hünzom kux ang achangüi. Hünzom longzi a shuathongchi sak-hax alople, shuakuxchi ma Lebanon Haxnu alople, handünchi ma Eufrat shuanu makhange hannopchi Mediterenian tinu alople changüi.

²⁵Chixe tsaodaokya ningle, ija haxtok ma hünzom ojongpang to leüihex, JOWANPA hünzom Zang-e khünaknu hünzom thua zale chang ang tomüi ilaxle owaechu hünzom to abax ang münthoüi.

²⁶Anyix kue hünzom ang mohiman hia thuakzom monge atsutsu zünle kop ang danpu:

²⁷JOWANPA hünzom Zang kaxtom oja anyix kue hünzom ang koxle ngopuix, ija kax ma laxle jangchangba mohiman;

²⁸ikoxlechu hünzome amipongma tüma-shwom-tokya baozang to shwom ang hünzom anongle jangpao ilaxle JOWANPA kaxtom ibu kax ma laxle chitüi thüiningle, othuak-ozom.

²⁹Chemtue JOWANPAe hünzom, hünzome kop angkya haxtok to apüile changüihex, hünzom Girizim Haxnu makhange mohiman khuapule changüi ilaxle Ebal Haxnu. Makhange othuak-ozom khuapule changüi. (

³⁰Ija haxnu anyi a Jordan shuanu zongma hannop chikao ma, Jordan haxsha ma ngokya Kanan nok haxtok ma tüile. Ibu a Gilgal tingnu zui angkya Moreh ma tüikya otsao pünnu füi alüile chiatsai homtoxle hannopchi ma tüile.)

³¹JOWANPA hünzom Zang-e fale ngokya haxtok kop ang hünzom a Jordan shuanu taüi khakha. Chemtue hünzom ija kha aloplaxle ikhato ngoüihex,

³²anyix kue hünzom ang koxle ngokya wanlombu pangwüi kax ma laxle tüi angkya taxalak.