Read Wancho Naga Tsaitong-Kaxtong 15 Bible Online

Tsaitong-Kaxtong 15 - Wancho Naga bible

Tsaitong-Kaxtong 15

¹“Anüt-lükya zanglao ashukkya foto, mix ma thashe kop angkya tüikya hünzome münlaxngole dantox angkya oli changpu.

²Ija a ile mok angkya wüi changpu. Israel khünak tuitae ata Israel khünak ang wüi thashe koxle thomkya münlaxngole dantox angkya oli changpu; chixe ija ngun lax ang chiazongüi; JOWANPA chix jaoe thashe münlaxpule ngaidaoa.

³Püntüi ma tüikya hünzom thashe a chatle lax ang tsuak; ikoxlechu hünzom khakha ma wüi tata ma tüile ngokya thashe saile chilaxüi.

⁴“Chixe hünzom ang koxle ngokya haxtok ma JOWANPA hünzom Zang-e hünzom to mohimanüi. Hünzom khünak tuita ngaxchu chitüi-chinangle chingoüi,

⁵ile hünzome anyix kue hünzom ang koxkyakya kaxtom pangnusa kax ma laxle khünkhile twonle ngoüihex jangthüiba a.

⁶Chixe tsaosax daokya lailaile JOWANPAe hünzom to mohimanüi. Hünzome obi-obi nok ang thashe ma ngun koxüi ikoxlechu hünzome owa nok angkya thashe münlaxüi; hünzom obi-obi nok to apün-awangle changüi ikoxle hünzom thakma owaechu apünle münchangüi.

⁷“JOWANPA hünzom Zang-e hünzom ang koxkya tingnubu tütapu ma hünzom Israel khünak owawa tütali ma tui-nole jangtüiba, ija khünak to fong angkya saxkün taxtüi.

⁸Itülüi, künsha-mongdakya füi chixe chemtukux laxse tsupuix laxkox.

⁹Hünzome thashe münlaxngole dantox angkya hanpak nguile hüikya ngünlaxle, chix ang tütali kox angkya to taxakhüix. Iningkya haxshix tutex hünzom khangka ma wang ang taxtom. Ija thashe kox ang nang mong chitsule jangchang, chixe nang to mongma kopüi. Ija mongma a JOWANPA hato nguiüi ilaxle nang a thaikya mix ang laxüi.

¹⁰Sax-akünkya chemchu chitüile chix ang mongtex ma nguile laxkox, ikoxle nang amokmok pangwüi to JOWANPAe mohimanüi.

¹¹Israel nok ma tüimix nuakmix tüile ngo angkya changle ibu to chingchajajale tüi angkya kue hünzom ang kaxtom fapu.

¹²“Mama mix, Israel khünak tomtom, sheko wüi changlax lüka wüi changlax, da tuita ningle ma alüile nang ang hangle jangchang, ija khünake zanglao azok nguile hüikya nang thothale chang füima nange ija khünak a dan angkya changpu. Anüt-lükya zanglao nguile hüikya füi tomle nange chix a dan angkya wüi changle.

¹³Chemtue nange ija khünak danle changüihex, chix a chak-hua ma pao ang taxtom.

¹⁴JOWANPAe nang ang mohimankya chun, saxziak ilaxle grep-ti, ibu kha angkya mongmüi to hwom ang koxle apaokox.

¹⁵Hünzom chuwüi Ijip nok to da ang ngodaokya JOWANPA hünzom Zang-e danpu, ikhoma anyix kue hünzom ang ija kaxtom fapu.

¹⁶“Ikoxle nang dae paose chitsule chutix changtüilax; chixe nang ilaxle hünzom homkha füi mongzom müilaxle ngosele chu textüilax.

¹⁷Ile jangchang thüiningle chix a hünzom fülom hato apüikox ilaxle ikhama chix a na hukle laxkox; ifüima tsünjangjang ma chix a hünzom da ang ngoüi. Hünzom dacha tuita tochu ile wüi changlax.

¹⁸Dahai tuita danle apao pongma nang mongto taxkak, chemthüikoxle zanglao azok hanpakma nange owawa khünak hingchak koxle da ang thomkoxba, chix ang koxle apaose kha angkya okao zaza bakle ija khünake nang thothale hüidaoa. Idaile, nange amokmok to JOWANPAe mohimankya naxtüifa, nange ile mokkox.

¹⁹“Nang maihu hia chunbu, pongwang ma puxkya olala, JOWANPA hünzom Zang hanpak ang süile danlax; maihu ibu mwotmok ang taxtwon ilaxle chun ibu ang omun taxzüt.

²⁰Zanglao foto nang üntoxle kako homkha pangnue ibu a JOWANPA to shwom angkya onui tuita ma chix pomtho ma sax angkya changle.

²¹Ikoxle ibu müi to chemchemle jangchang, ibu faishokle, omik aduakle, chichangba chisu-chimüikya tütali janman tüile jangchang thüiningle, hünzome ibu a JOWANPA hünzom Zang ang tö kox ang taxlax.

²²Iningkya müi hünzom hom ma sax ang tsuak. Hünzome chemle müikhi hia müijax müi saxle changpuix, ilailaile zanglom ma tsaokya hia chitsaokya khünak pangnusae ija müi sax ang tsuak.

²³Ikoxle ibu aji a süt ang taxlax, itülüi hünzome ti thokpupule haxkha to thokle ajenle awütdao.