Read Wancho Naga Tsaitong-Kaxtong 16 Bible Online

Tsaitong-Kaxtong 16 - Wancho Naga bible

Tsaitong-Kaxtong 16

¹“Abih lyetnu ma Kaitox Pangpwon nuikya füi JOWANPA hünzom Zang achuak-afuale changkox; Ijip nok tokya chixe hünzom khangkhosünle kopkya a zangnak ma changkya.

²JOWANPA hünzom Zang ang münchong fale achuak-achen angkya hanpakma jongtakha zangshwomnui to paolax ilaxle ikhato hünzome Kaitox Pangpwon hanpak ang chun chichangba maihu ibu langlax.

³Chemtue hünzome ija Kaitox Pangpwon saxle changüihex, twonkhax awon zingkya ankhao taxsax, chemthüikoxle nyix-anüt mong ma hünzome an a twonkhax chiawon homle zingkya tix sax angkya changle. Hünzome ipongpong nonokhaile Ijip nok dantox pongma ngaxchu ile wüi mokpu. Iningkya an saxlax, ija ang sikngün an le nyaküi: ikoxtix hünzome hünzom mazi tanto hünzom Ijip nok angkya laile paokya nyix tamchu ija sikngün ashukle ngole hüikya haxtok chialaküi.

⁴Nyix-anüt hanpak ang hünzom haxtok ma owamachu ma homkha ma twonkhax bang angkya oli münchang; ilaxle ija pangpwon asuikya ja langkya müi a ija jaja wüi komkaile saxtox angkya changle.

⁵“Kaitox Pangpwon müibu a zangshwom angkya onui jongtakha ma langlax: ilaxle JOWANPA hünzom Zang-e hünzom ang koxkya haxtok ojongtochu taxlang. Ija a zanghan dütkya füi tomle hünzom Ijip nok angkya laile paokya tue moklax.

⁷Müi a huakle atsanlaxle zangshwom angkya onui jongtakha ma saxlax, ilaxle ofüinop a hom to chatlax.

⁸Chemthüikoxle ifüi nyix makhange hanpak nyix azok mong ma hünzome twonkhax chiawonle zingkya an-tix sax angkya changle, ilaxle nyix anüt lükya to a hünzom a JOWANPA hünzom Zang to shwom ang asoxüi, ikoxle ija nyix a owaechu mwot chimoküi.

⁹“Hünzome saxziak tsaxtu ang sütkya makhange hatdang anüt akiaklax,

¹⁰ifüima saxcha-wünle nuilax. JOWANPA hünzom Zang-e hünzom ang mohiman chemtukux koxpuix, ija ma thütle chix hato küntsu-monglua töbu apüile chix achuak-achenkya tüilax.

¹¹JOWANPA pomtho ma hünzome masu-masabu, dabu, Liwi hwom, püntüibu, zomnu hia khaxsabu, opangsa hünzom tingnu ma ngole tüipuix, hwom pangnusa füi tomle mongmüi-pwonlakya tüikox. Ija a zangshwom angkya onui jongtakha ma moklax.

¹²Hünzome ibu kaxtombu kax ma laxle-ole thüilax; hünzom a Ijip nok to da ang ngole toxkya taxalak.

¹³“Hünzome hünzom tsaxnak tsuakkya hia grep-ti fyetkya tsuakkya füi tomle, hanpak nyix anüt laxle pomsa pangpwon nuikox.

¹⁴Hünzom tingnubu ma hünzom füi ngole tüikya, su-sa hwom, dabu, Liwi hwom, püntüibu, zomnu-khaxsabu, ibu pangwüi selaxle ija pangpwon saxle mongmüilax.

¹⁵Zangshwom angkya onui tuita ma nyix-anüt hanpak laxle ija pangpwon saxle nuikya füi JOWANPA hünzom Zang achuak-achenle changkox. Tüle pwonladongle mongmüikox, büthüikoxle JOWANPAe hünzom manzai hia hünzom puamün to mohimandaoa.

¹⁶“Zangshwom angkya onui tuita ma hünzom jat-li angkya khünaknu zanglao to othom azom pongma JOWANPA to shwom ang ngui angkya changpu: Kaitox Pangpwon ma, saxcha-wün ma, ilaxle pomsa pangpwon ma, khünak pangnusae ma hinghoho

¹⁷tsuakkya apongle JOWANPAe ma ang fakya mohiman ma thütle apüikox.

¹⁸“JOWANPA hünzom Zang-e hünzom ang koxkya tingnubu ma kaxfün mixbu tamchu mama okax-okho hwom kamlax. Hwom khünaknu to masüi-mixlüikya chitüikya kaxfün fale apünüi.

¹⁹Hwome kaxfün fapongma chisule tamchu süi-süi-chaple kaxfün chifaüi; ilaxle hwome zuizun chilaxüi, chemthüikoxle hingho chakzun makhange jetüi-hwonlangkya hia sukya khünakbu ang ngaxchu mik apwom ang tomle, ilaxle kaxfün othai fa angkya hato ahüile.

²⁰Othuithuima masüi-mixlüikya chitüile tüilax, ile changkox tix JOWANPA hünzom Zang-e hünzom ang fakya ngokya haxtok hünzome kopüi ilaxle ikhama hünzom jento ngo ang kopüi.

²¹“Chemtue hünzome JOWANPA hünzom Zang ang tö-tsap zaile changüihex, ija zui ma baozangchanu Asherah mua pün chapa taxdan.

²²Ilaxle ija to shwom-to le chang ang tütali long küile taxchang, iningkyabu thua JOWANPA anule.