Read Wancho Naga Tsaitong-Kaxtong 19 Bible Online

Tsaitong-Kaxtong 19 - Wancho Naga bible

Tsaitong-Kaxtong 19

¹“JOWANPA hünzom Zang-e hünzom ang koxle ngokya haxtok ma tüikya mixnokbu amütle changkya füima tamchu hünzome ibu tingnu hia hom-haxbu koplaxle tingtan-nokzingle ngokya füima,

²ija haxtok a othom azom ma ahanlax, pangwüi chwonpai ma alop tsuak angkya pünpao tingnu tuipong womle ahanlax. Khünak owawae mix mik amütle jangchang thüiningle chix a ikhato paole azang ang thoüi.

⁴Ikoxle khünak tuita chix zongto makya chemchu chitüi ikoxle chakchax-jansaxle owawa mik amütle jangchang, chix a ija tingnu to paole azang ang tsuaküi.

⁵Namthütba: mixsün anyi faokhato pündak ang ka, mixsün tuitae pündakle ngokya wafax donglaxle chix zuipa langle jangchang, chix a ija tingnu azom kha angkya tütapu to thüichu paole azang ang tsuak.

⁶Ikoxle tingnu a tuita wüi jangchang tamchu ikha alop ang huanuma atsaile jangchang, ilaxle mik maxkya khünak hotüi-honao hwom owawae ija mixsün kop üntoxle mongtsik adu ang chitho laxle ija chemngax chichangkya khünak langle awüt. Chixe hozuipa langkya a tuita thomzün changkya, chemthüikoxle hozuipa a chix zongto zanpa chichang ilaxle chix mik a chaktung ma amütkya chichang.

⁷Ija ningkya thama hanpakma tingnu azom süile thomlaxle kue hünzom füi akaxpu.

⁸“Chemtue JOWANPA hünzom Zang-e hünzom haxtok wankam achenle changüihex, ija a chixe hünzom putong hwom füi hünzom ang koxüihex-ole tsaosaxle changdaokya ningle,

⁹ifüima hünzome chatle chu tingnu azom süile kop angkya changle. (Anyix kue hünzom ang fapupu kaxtom kax ma lax tamchu ija ningle mokle hünzome JOWANPA hünzom Zang to mongkünkya tamchu chix hwon-nwot lailaile ngokya jangtüi thüiningle, chixe ija haxtok hünzom ang komkaile koxüi.)

¹⁰Owawa chem thaithaxle chichangkya khünak azik-amütkya chitüi angkya hanpakma tamchu JOWANPAe hünzom ang koxkya haxtok ma iningkyabu mik amüt laxle hünzom thaipa ang chichang angkya hanpakma hünzome ile moklax.

¹¹“Ikoxlechu owawae ma zongto zanpa tuita zingmüi ma langle awüt ilaxle chix khangkhom ang iningkya tingnu to paole jangchang,

¹²hwom tingsho angkya lompabue ija khünak apüi ang akatüi ilaxle chixe langkya haxnu-homsabue ija olüix khom angkya hanpakma chix a hwom chak to owüiole koxüi, ile hwome ija mixsün langle awütüi.

¹³Chix to chingcha aho angkya jao münchang. Ija mix mik amütdaokya khünak füi Israel khünakbu a atsaile ngo angkya changle. Ile changkox tix hünzom a kuimüi zangmale ngo ang thoüi.

¹⁴“Hünzome tomzi füikya longzi-manghua achexle taxchang, chemthüikoxle JOWANPA hünzom Zang-e ija haxtok hünzom ang koxtanto wüi ija longzi ile tanle toxdaoa.

¹⁵“Khünak tuita mik amüt angkya zangwün bama mixhuak tuita mikngün kaxngai münnguiüi; hixpu thüikoxchu mixhuak anyie mikngün kax ngaikya tüikoxtix wüi khünak tuita thaikya ang laxtsuaküi.

¹⁶Owawa khünak tuitae owawa khünak tuita ma othai kaxhux fe ang azongle jangchang,

¹⁷hokhi pangnyi wüi zangshwomnui to sele apüiüi ilaxle ipongma onui ma asukya nguapa hia kaxfün mixbue kaxfün fa ang tomüi.

¹⁸Kaxfün mixe ija zangwün otong tikle toüi; ilaxle ija khünak tuitae hozuipa Israel khünak tuita bama chichangkya kaxhux fekya jangchang,

¹⁹chixe kaxhux fekya khünake kopse sikngün chix ang koxüi. Ile hünzom a iningkya ochax füi atsaile ngo ang thoüi.

²⁰Ifüima chemle changpuix ija noknusae atat ang kopüi; hwom pangwüi zaüi, ilaxle owaechu iningkya ochax mwot tamchatle chimoküi.

²¹Iningkya zangwün bama chingcha aho angkya münchang; iningkya to tsangthom angkya a: khüzün lüix to khüzün, mik lüix to mik, wa lüix to wa, chak lüix to chak, cha lüix to cha le changüi.