Read Wancho Naga Tsaitong-Kaxtong 2 Bible Online

Tsaitong-Kaxtong 2 - Wancho Naga bible

Tsaitong-Kaxtong 2

¹Oshuk ma kem, JOWANPA kaxtom ma laxlaxle Tütsak Tinu Agaba achole sak-hax chitole, ilaxle Edom nok haxhua nok to okuilole ahamle ngo.

²“Ifüima JOWANPAe ku ang thüi:

³‘Hünzome ibu haxhua nok to faole ahamle hanpak okhonguile awütdaoa, idaile hünzom a shuakux chito dong angkya changle.’

⁴Hünzom ang ibibi adangle fa angkya hanpakma chixe ku füi akax, ‘Hünzom a Edom haxhua nok, kaitanto hünzom zongto haxnu-homsa ang changkya, Esau sixli hwom haxtok makhange le angkya hanpak nguile. Hwom a hünzom thua zaüi,

⁵Ikoxlechu hünzome hwom füi azan angkya owang münwangüi, chemthüikoxle kue hünzom ang hwom haxtok chakfa khao tuita tukux ngaxchu münfa. Seir haxnu a kue Esau tingtok hex-ole koxdaoa.

⁶Hünzome hwom ma sax angkya tütali ngun koxlaxle shakle laxüi, ilaxle hünzome ling angkya ti chuwüi hwom ma ngun koxlaxle shaküi.’

⁷“Chemthüikoxle JOWANPA nang Zang-e hünzom mwot pangnu lom ma hünzom to mohimanle hüidaoa; ipong chongkya faonu mong akaile ahamkya chixe awan ngole; ibu zanglao punyi mong ma JOWAN Zang hünzom füi womle tüikya, ipongma hünzom chemmachu tui-nole chichang.

⁸“Idaile Seir ma tüikya kem tüinao Esau su-sa hwom füi atsaile keme Elath hia Ezionzebar tingnubu akaile Tütsak Tinu to lekya lom danle tox, ilaxle shuakux-handün chitokhange Moab chitole.

⁹JOWANPAe ku füi akax, ‘Moab nok to tingtuile taxchang, ibu a Lot su-sa hwom changle. Hwom füi taxazan. Kue hwom ang Ar tingnu koxdaoa, ilaxle kue hünzom ang hwom haxtok ikuxsa koxüi münchang.’” (

¹⁰Tüle tomchong-hualole tüikya mixtsak-naomüi Emim likan Ar tingnu ma tüikya. Hwom chuwüi Anakim, mama mixtsak-naomüi likanbu, hwom füi tomwüile chongle tüikya.

¹¹Anakim nok lailaile hwom ang chuwüi Efraim le nyak; ikoxle ibu Moab nok ang a Emim le nyak.

¹²Israel nok JOWANPAe hwom ang koxkya haxtok angkya zanpabu jwonle apaokya lailaile Edom ma ngole tüikya Hor nokbu Esau su-sa hwome jwonle apao, hwom likan amüt, ilaxle hwom a ikhato ngole hüipu.)

¹³“Ifüima JOWANPAe kem füi akaxkya lailaile keme Zered haxsha ta.

¹⁴Ija a keme Kadesh Barnia danle toxkya füikya zanglao tsübün achyet nguile changpongma chang. JOWANPAe ile chang angkya hex-ole akaxkya jaojaole ipongma tüikya tsünthom kha angkya mixtsak naomüibu komle zile paodaoa.

¹⁵Hwom pangwüi olithule machang tanto JOWANPA a hwom füi anongle wüi ngo.

¹⁶“Hwom pangwüi zile tsuak füima,

¹⁷JOWANPAe kem füi akax,

¹⁸‘Anyix a Ar lomnu makhange hünzom Moab haxtok akaile le angkya changle.

¹⁹Ifüima hünzom, Lot su-sa hwom Amon nok hato namle hüiüi. Hwom to tingtuile taxchang chichangba achax-azanle taxchang, chemthüikoxle hwom ang koxdaokya haxtok kue hünzom ang funta koxüi münchang.’” (

²⁰Ija haxtok ang Efraim le ikhato ngole tüikya khünakbu mün ma chuwüi nyak; Amor noke hwom ang Zamzumim le nyak.

²¹Hwomchu Anakim hwom füi tomwüile tomchong-hualole tüikya. Ibu khünak huanuma tüikya, ilaxle hwom a mixtsak-naomüi likan tuita changkya. Ikoxlechu JOWANPAe hwom max ang tom, ikhoma Amor noke ibu haxtok lax ilaxle ikhato ngole hüi.

²²JOWANPAe Edom nok, Esau likanbu changkya hex, opang Edom haxtok haxhua nok to ngole tüikya hex, hwom to chuwüi talailaile mok. Chixe Hor nok amüt, ikhoma Edom noke hwom haxtok lax ilaxle ikhato hwom ngo. Ekhato athaxchu hwom wüi ngole tüile.

²³Mediterenian fole tüikya haxtok ma Kret shuazo tokhange hüikya khünakbu ngole tüikya. Hwome ikhama bangkya nokpu Awimbu amüt ilaxle shuathong chikao Gaza tingnu alople haxtok a hwome abakle lax.)

²⁴Keme Moab akaile lekya füima, JOWANPAe kem ang thüi: Athaxpi, achexlax ilaxle Arnon shuanu talax. Kue Amor nok, Heshbon angkya wanghompa Sihon hia chix haxtok bakle hünzom chak to koxdaoa. Chix tingtaklax ilaxle chix haxtok koplax.

²⁵Anyix makhange kue pangkha tokya khünaknu hünzom thua za ang tomüi. Hünzom zing atatkya thoto wüi noknusa zalaxle anyonkya tüiüi.

²⁶“Ifüima kue Kedemoth faonu tokhange Heshbon nok wanghompa Sihon hato ibibi hingho chaktwon füi kaxho mixbu akatle tumüi lom:

²⁷‘Kwom hünzom haxtok akaile le ang tomhüi. Kwom a lomnunu le tangthole leüi. Nong-tsax to khe-wyale münchangpu.

²⁸Kwome saxkya süt hia lingkya ti hanpak angchu otha koxüi. Kwom a hünzom haxtok akaile lelan lese texwüi.

²⁹Ija a JOWANPAe kwom ang koxle tüikya Kanan haxtok alop ang Jordan shuanu tale le angkya onui alop lanle. Esau su-sa hwom, Edom nok, Moab nok, opang Ar tingnu ma tingtan-nokzing laxle tüipuix, hwome hwom haxtok akaile kwomle ang lom daple fapu.’

³⁰“Ikoxlechu wanghompa Sihon-e chix chaxwan makhange kwomle ang chitom. Athax keme kople tüikya chix haxtok kem ang kop ang tom angkya hanpakma, chix kem füi azanle naxchang tamchu keme chix to lütle naxchangle JOWANPAe chix mongtsak ang tom.

³¹“Ifüima JOWANPAe ku ang thüi: ‘Hulax, kue wanghom Sihon hia chix haxtok hünzom tunthoma maxshu ang changdaoa; ija haxtok laxlax ilaxle amle koplax.’

³²Jahaz tingnu zui ma wanghompa Sihon kem füi azan ang chix süpahibu pangwüi koplaxle laipu,

³³ikoxle JOWANPA kem Zang-e chix a kem chak to dan, ilaxle keme chix langpu; chix sasün hwom tamchu chix khünaknu pangwüi keme langpu.

³⁴Ifüi tomle keme tingnubu pangwüi koplaxle ibu amüt, ilaxle khünak pangwüi, mixnu-naosa, mixmüi chemchu chisüile, komkaile langle awütpu. Keme owachu ozün ma chitox.

³⁵Tsompom pangwüi keme laxpu ilaxle tingnu bakle amapu.

³⁶JOWANPA kem Zang-e kem ang Arnon haxcha kax ma tüikya Aroar angkya tingnu hwople kop ang tompu; iboma Gilid to leüi lom ma haxcha osungwa ma tüikya tingnu tuita chuwüi amüt ang tompu.

³⁷Ikoxlechu kem Amon nok haxtok alople chichangba Jabbok shuanu kax alople chichangba haxhua tokya tingnubu chichangba JOWANPAe chitomkya chaxwan ojongtochu kem chipao.