Read Wancho Naga Tsaitong-Kaxtong 22 Bible Online

Tsaitong-Kaxtong 22 - Wancho Naga bible

Tsaitong-Kaxtong 22

¹“Nange owawa Israel khünak tomtom kux maihu chichangba chun, ozu dale zikle aham ngokya jangngün, ija to naxchang koxle taxhu; ija hopupa hato apüile laxkox.

²Ikoxle ija hopupa a tsailo towüi chichangba nange ija owa kux changpuix chitik; ile jangchang thüiningle ija müi nange nang hom to apüikox. Opupae lomle hüikya zuma ija koxle apaokox.

³Hünzom Israel khünak tomtom owawae amütkya mantsak, nyi-za, chichangba tütalichu atakle jangchang, nange ile wüi achatle laxkox.

⁴“Hünzom Israel khünak tomtom mantsak chichangba maihu thap to dütle jangchang, hulanle taxtox; ija müi a alailaxle ajongle toxkox.

⁵“Shekobue lükabu nyi-za lax angkya olom müntüi, ija ningle lükabuechu shekobu nyi-za lax angkya olom müntüi. JOWANPA hünzom Zang-e iningkya khünak thua anule.

⁶“Hünzome pünkho towüi changlax, hax ma wüi changlax, osazop tuita honue oti to womle ngopongma chichangba hosa tuxle ngotankha atakle jangchang, ija honu taxlax.

⁷Nange hosa lax ang tsuak ikoxle honu a danle apao angkya wüi changpu; ile changkox tix nang tsünlo-khothole tamchu ahak-aluale ngo ang kopüi.

⁸“Chemtue nang homzün zaile changüihex, homtok akhople shingmongle jit nom angkya taxalak. Ile chang füima imakhange owawa dütle zikya namtüiba nang ma tsaitox-kaxfe angkya chemchu münbang.

⁹“Hünzome grep haxtok ma mama saxli küi-thwomle taxchang; hünzome ile jangmokba, hünzom ang grep wüi changlax mama-mama saxli wüi changlax lax ang müntomüi.

¹⁰“Maihupong hia mantsak nyi han ma adang ang taxtom.

¹¹“Mu hia mama zi athütle takkya nyi taxlax.

¹²“Hünzome hünzom nyitua ali ma osutua fünkox.

¹³“Thütba lüka tuitae sheko tuita apüi ikoxle ofüima chixe she chilax angkya mongzangwünle tsuak.

¹⁴Ikhoma chixe she chimüikya zangwün othaithai alaile, chixe she laxpongma she a naocha ningle chibang khato le akax.

¹⁵“Ile namchang thüiningle, sheko honu hopae, nuinop wang ja laxkya aji füikya nomnyi apüilaxle shekosa a naocha wüi changkya changpule aho ang khwa to apüile, tingnu angkya lompabu chak to koxle ahoüi.

¹⁶Shekosa hopae hwom ang thüiüi, ‘Kue ku sacha ija mixsün ma aju-asomle koxpu, ikoxle athax chixe laxse müntsu lüta.

¹⁷Chixe apüi pongma she a naocha ma münbang, le chichang khato kaxhux fele changpu ta. Ikoxle ikhama ku sacha a naocha wüi changkya le aho ang manwan tüile; nuinopwang ja laxkya, aji füikya nomnyi ija to hulax!’

¹⁸Ifüima tingnu angkya lompabue ija mixsün koplaxle müiüi.

¹⁹Hwome chix ma tsang tuita ang khop ngunkhix hota lax üntoxle sheko a hopa chak to koxüi, chemthüikoxle ija mixsüne Israel khünakbu ang zak-akople changdaoa. Tamnüilechu she a chix kakonu ang wüi ngoüi idaile chix mazi tanto she a apao ang müntho.

²⁰“Ikoxlechu ija mixsün kax otsingtsing ang jangchang ilaxle shekosa a naocha wüi changkya changpule aho angkya chemchu chitüile jangchang,

²¹hwome she a hopa hwom fülom to apüiüi, ikhama tingnu angkya khünaknue she a longfüi thuple langüi. She-e hopa hwom to ngotanto wüi, tuiju-nasomle machangba owawa füi nganguile changkya tokhange kem khünak khama chakzong-kwontele changdaoa. Iningkya to ile hwonkoxtix hünzom a ija ochax füi atsaile ngo ang thoüi.

²²“Lüka tuita mix kakonu füi nganguile ngokya janglop, hokhi pangnyi wüi long füi thuple lang angkya changle. Ile hünzom a iningkya ochax füi atsaile ngo ang thoüi.

²³“Thütba mixsün owawa ma tuizing-nazexle changdaokya shekosa füi nganguile ngokya tingnu mong ma lople jangchang,

²⁴Hünzome hokhi pangnyi wüi tingnu panthaile pao ilaxle pantua to long füi thuple langüi. Shekosa a tingnu mong ma akhong koxle atat tangkya khama ngolaxle owawae she khose hüile chiakhongkya khoma she mik max ang tomüi. Lüka a, mix füi wün-zexle thomdaokya naocha tuita füi nganguile changkya khoma mik max ang tomüi. Ile changkox tix hünzom a ija ochax chak tokya atsaile ngo ang thoüi.

²⁵“Thütba mixsün tuitae mix füi wün-zexle thomdaokya naocha tuita füi tingtui panja to shingnünle chang. Ile changkya to lüka tata mik max ang tomüi;

²⁶shekosa to chemle thüi angkya müntüi, chemthüikoxle she-e ma mik max tangle ochax lyenkya müntüi. Ija a mixsün tuitae hozui mixsün to shing laxle langle awütkya füi zangwün tuita changpu.

²⁷Ija mixsüne mix ma wün-zexle thomdaokya naocha tuita to tingtui panja to shingnünle chang, ikoxle she azün hüi akhongle changkoxchu she azün angkya mix owachu chitüi.

²⁸“Thütba mixsün tuitae naocha tuita to shingnünle ngokya lop.

²⁹Ija mixsüne naocha hopa ang tuinu tsangthom ang khop ngunkhix 50 koxüi, ilaxle she a chix kakonu ang laxüi, chemthüikoxle chixe she a chix füi nganguile chang ang atsangdaoa. Chix mazi tanto chixe she a otuechu apao ang müntho.

³⁰“Khünak owaechu mapa sheko hwom füi ngangüi laxle chix ang zak chiakopüi.