Read Wancho Naga Tsaitong-Kaxtong 28 Bible Online

Tsaitong-Kaxtong 28 - Wancho Naga bible

Tsaitong-Kaxtong 28

¹“Hünzome JOWANPA, hünzom Zang kax ma laxle tamchu anyix kue hünzom ang koxle ngokya chix kaxtombu mongong tüikya füito-le jangchang, chixe hünzom a chaxwan tok angkya mama jat-libu pangwüi füi süchongkya ang zingüi.

²Hünzome JOWANPA, hünzom Zang kax ma laxle jangchang ibibi mohiman a hünzom hanpak ang changüi:

³“JOWANPAe hünzom tingsho hia haxtok to mohimanüi.

⁴“JOWANPAe hünzom ang simüi-limüi angkya, saxmüi-tuamüi angkya, osu-maihu hia chunbu tsom-pom müi angkya mohiman pangwüi faüi.

⁵“JOWANPAe hünzom tsaxsa-hikha to mohimanüi ilaxle imakhange amyet-akhomle changkya tochu mohimanüi.

⁶“Hünzom mwot-kat pangwüi to JOWANPAe mohimanüi.

⁷“JOWANPA hünzom Zang-e, zanpabue hünzom to single changpongma, chixe wüi hwom to lüt ang tomüi. Hwome hünzom to lomkua tuita makhange singüi, ikoxle hwom pangnu chito khange afale zikle paoüi.

⁸“JOWANPA hünzom Zang-e hünzom mwot to mohimanüi ilaxle hünzom pung ma saxziake awangle changüi. Chixe hünzom to, chixe hünzom ang koxle ngokya haxtok to mohimanüi.

⁹“Hünzome JOWANPA, hünzom Zang kax ma laxle jangtüiba tamchu chix kaxtom pangwüi mokle jangchangba, chixe tsaodaokya ningle, chixe hünzom a chix khünaknu ang zingüi.

¹⁰Ifüima chaxwantok angkya khünaknue hünzom a, JOWANPAe chix khünaknu ang lax ang zünle kopdaokyabu changle le ngün ang kopüi ilaxle hwom a hünzom thua zaüi.

¹¹JOWANPAe hünzom ang koxüihex-ole hünzom putong hwom füi tsaosaxdaokya haxtok ma hünzom simüi-limüile ngo ang tomüi; tsom-pom wan müile chang ang tomüi ilaxle saxkop-linglole ngo ang tomüi.

¹²Hünzom hato nuaklom ang nguikya khünakbu ang hünzome koxle apao ikoxlechu hünzom otuechu mixnok to nuaklom ang pao angkya chitüile ngo angkya hanpakma, ding to chixe athünle thomkya tilua chongkya kha angkya chixe otu thütle zangwat ajoüi ilaxle hünzom mwot pangnu to mohimanüi.

¹³JOWANPA hünzom Zang-e hünzom a jat-libu tu ma lompabu ang achangüi ikoxle hwom füito azuile ngokyabu ang achangle ngo ang müntomüi. Anyix kue hünzom ang koxkya kaxtombu pangwüi kax ma laxle mongong tüikya füi jangngo thüiningle hünzom a othuithuima ahak-aluale tamchu tho-lünle tsuakle le ang tomüi.

¹⁴Anyix kue hünzom ang koxkya kaxtombu kax ma chilaxle taxtüi. Owawa baozangbu to shwom ang nong-tsax to taxpao.

¹⁵“Ikoxlechu hünzome anyix kue hünzom ang koxle ngokya, JOWANPA hünzom Zang wanlombu hia kaxtombu chemchu mongong tüikya füi thomkya chitüi tamchu JOWANPA kax ma laxkya chitüi, jangchang thüiningle ibibi ochax pangwüi hünzom hato nguiüi:

¹⁶“JOWANPAe hünzom tinglong hia haxtokbu to thuakzomle changüi.

¹⁷“JOWANPAe tsaxsa-hikha tamchu ibu makhange amyet-akhomle changkya pangwüi to thuakzomle changüi.

¹⁸“JOWANPAe thuakzom koxle hünzom ang sixlibu wan müi ang müntomüi, saxziak müi ang müntomüi, ilaxle tsom-pom, maihu hia chunbu hidaole wüi koxüi.

¹⁹“Hünzom mwot pangwüi to JOWANPAe thuakzomle changüi.

²⁰“Hünzome ochax mwot moklaxle JOWANPA awütle jangchang, chixe hünzom hato okak-olak ahüiüi, jemax-hwonsam ang tomüi, ilaxle hünzom momle tamchu komkaile amütle machang tanto, hünzome mokkya mwottho pangwüi to sikngün apong ang tomüi.

²¹Hünzome kop angkya haxtok to hünzom okothomle machang tanto chixe hünzom hato okak-olak füima okak-olak hüi ang tomüi.

²²JOWANPAe hünzom to kakma-lakshix; fingle kakkya hia khamle kakkya, ibu okak-olak füi fitüi; chixe hünzom manzai olithule naxchang ang chaxwan ako ang tomüi tamchu zangwin okhame jep ang tomüi. Okak-olak ibu a hünzom füi mazi-mazile ngo ang tomüi.

²³Ojao zangwat ang chitomüi, ilaxle hünzom haxtok a jan lailaile tsaküi.

²⁴Zangwat lüi to JOWANPAe hünzom hato lakhut hia longkhixbu pikle zangchei ahüilaxle komkaile amüt ang tomüi.

²⁵“JOWANPAe zanbu ang hünzom to lüt ang tomüi. Hünzome hwom to lomkua tuita makhange singüi, ikoxle hwom thoto hünzom pangnu chito afale paoüi, ilaxle hünzom to ile changkyabu ngünlaxle chaxwannu khünaknu nok wüi abütüi.

²⁶Chemtue hünzom zile paoüihex, osabu hia faomüibu pangwüi nguilaxle hünzom mang saxüi ilaxle ibu to zuale apao angkya khünak tuita müntüiüi.

²⁷Ijip nok to hwonkya ningle JOWANPAe hünzom to tsom dongle sikngün apong ang tomüi. Chixe hünzom tsangtsa mak-chak füi kang-kang-danle chang ang tomüi. Hünzom tsangtsa awangle buk laiüi, ibu huanuma bule changüi üntoxle tamchimüitoxüi.

²⁸JOWANPAe hünzom ang khangkho asamüi; chixe fitle hünzom mik apwomle hia jepale chang ang tomüi.

²⁹Anyixningkya zangngai to hünzom a mikpwompabu ningle akhwom ang tomüi. Hünzome ma lomtang atak ang chithoüi. Mokkya mwot tütali machu hünzome kop-lokya chitüile changüi. Othuithuima hünzom to mixe wüi athakle ngoüi, ilaxle tuinabu tsuile paoüi. Hünzom to asun angkya khünak tuita chitüile changüi.

³⁰“Hünzome naocha tuita füi ating-anok angkya wün-zexle changüi: ikoxle she a owawa ma ju-somle paoüi. Hünzome homzaile alaiüi: ikoxle ikhama hünzom onox ma ngaxchu ngo ang chikopüi. Hünzome grep haxtok mole changüi: ikoxle ija ang grep ziak hünzome sax ang chikopüi.

³¹Nang miksho ma nang tsom-pom langle tsopüi, ikoxle nange ikha angkya müi ofün tuita sax ang chikopüi. Nange hungongale nang mantsak a syetle paoüi, ija nang hato tamchiachatüi. Hünzom chunbu a zan-nokbu ang koxdaoüi, ikoxle nang to asun angkya khünak owachu chitüiüi.

³²Hünzome hule ngopongma wüi hünsu-hünsa hwom a mixnok chak to da ang koxle apaoüi. Nyixfokya to hünzome hünsu-hünsa hwom chat angkya to sung-zaole hungoüi, ikoxle hwom otuechu chichat toxüi.

³³Hünzome sikngün ashukle zaile alaikya saxziak mixnoke tsuile paodaoüi. Othuithuima mix fang to ngokya hia atsangle aza-anakya sikngün boma chemchu chikopüi.

³⁴Hünzome apongkya zothupe hünzom ang khangkho jao asamle changüi.

³⁵JOWANPAe hünzom cha a tamchu chimüitox angkya tamchu tüle luakle kakkya makchake awangle chang ang tomüi. Hünzom khanghomhua makhange chitua-chakza to lünle awangle tsomdong ang tomüi.

³⁶“JOWANPAe hünzom tamchu hünzom wanghompa, mixnok chaxwan, hünzome tamchu hünpu hünpa hwome owaechu mangüntoxkya haxtok to paoüi. Ikhato hünzome long hia pün, ibu makhange zingkya baozangbu thothale ngoüi.

³⁷JOWANPAe hünzom chiakle asam angkya haxtokbu to, hünzom to chemle changpuix, ija bama khünakbu ang khosamüi; hwome hünzom cha nyiüi ilaxle wanjaile changüi.

³⁸“Hünzome tüle-tüle sax shitüi, ikoxle pua hidaole wüi münüi, chemthüikoxle hünzom saxziak a kuknue saxdaoüi.

³⁹Hünzome grep tong moüi ilaxle tüle apu-achangle huüi, ikoxle ikha angkya grep ziak hünzome chikhaiüi chichangba grepti-ju ling ang chikopüi, chemthüikoxle ibu ozu a chonge saxdaoüi.

⁴⁰Hünzom haxtok tüta khato hexle olip pün nyemhuüi, ikoxlechu hünzome olip münga chikoptsuaküi, chemthüikoxle olip ziak a dütle samünüi.

⁴¹Hünzom ang su-sabu tüihuüi, ikoxlechu hünzome ibu a amüt-asamdaoüi, chemthüikoxle hwom a zan-nokbue da ang kople paodaoüi.

⁴²Hünzom pünziak-laimo hia tsaxsa-hikha ziak pangwüi chong-lange saxle tsuakdaoüi.

⁴³“Hünzom haxtok ma ngokya mixnokbue hünzom to sülüt-sülütle lütle changüi, ikoxle hünzom a sümax-sümaxle maxle shuüi.

⁴⁴Hwom ma hünzom ang thashe ma kox ang ngun-syen tüile ngoüi, ikoxle hwom ang achatle kox ang hünzom ma chemchu chitüile changüi. Oshuk a hwom a hünzom thakma apün-awangkyabu ang changüi.

⁴⁵“Hünzome JOWANPA, hünzom Zang kax ma chilax tamchu chixe hünzom ang koxle changkya wanlombu hünzome chithomkya khoma ibu thama hünzom hato nguiüi ilaxle hünzom pangwüi olithule machang tanto ibu hünzom füi ngoüi.

⁴⁶Ibu a hünzom tamchu hünzom su-sabu zongto tuita kaxfün fakya münwan ang ngoüi.

⁴⁷JOWANPAe hünzom to pangnu lom ma mohimanle changdaoa, ikoxle hünzome mongmüi-pwonlale künkox-mongkoxle chix tho chitha.

⁴⁸Ikhoma, JOWANPAe hünzom hato ahüi angkya zan-nokbu thothale hünzom ngoüi. Hünzom a wokno-tilanle tamchu tsangtsa ma chemngax chitüile tui-nolanle ngoüi. Hünzom bakle olithule machang tanto JOWANPAe atsangle afang thomüi.

⁴⁹JOWANPAe hünzom füi azan ang haxtua-zangnam tokya jat-li tuita apüiüi, ija a hünzome hwom kax-ngao ojao chitsingkya jat-li tuita. Hwome hünzom to olae o to shingpupule shingüi.

⁵⁰Hünzom zongto hwom tüle shix-male tüiüi, ilaxle hwome owa mixnu-naosa tochu chingchale münchangüi.

⁵¹Hünzom tsom-pom hia sax-tua hwome komkaile saxüi, ilaxle hünzom a woknuake zi ang tomüi. Ibue hünzom ang sax-tua, grepti-ju, olip münga, osu-maihu chichangba chunbu chemchu müntoxüi. Hünzom a zile samüi.

⁵²JOWANPA hünzom Zang-e hünzom ang kox angkya haxtok ma atüitüi tingsho pangwüi to hwome single changüi ilaxle tüle chuakkya long katuk pan, ojabu to hünzome tüle mongongle tüikya hex, ibu bakle atsunüi.

⁵³“Chemtue hünzom hato zandong laxle tingting takle single nguiüihex, sax angkya süt bama hünzom ang müimamale tingtui dongle khosamüi, ilaxle JOWANPA hünzom Zang-e hünzom ang koxle tüikya masu-masabu to apüile huakle saxüi.

⁵⁴Khünak tüle somdangle tüikya mix saxpu luawang homkha angkya tuita, chix ngaxchu wüi ija zansing hüikya zuma tüle woknuak nuzaoe maxle changüi, ikhoma chixe züizüi masu-masa hwom müi ngaxchu saxüi, chemthüikoxle chix ang osüt-oling mama chemchu chitüi. Chixe ija, ma mongkün kakonu, matüi-manao hwom ilaxle atale toxkya masu-masa hwom ang ngaxchu chifale saxüi.

⁵⁵

⁵⁶Mong tüle tsaothale müikya, saxpu-luawang homkha angkya mixcha tuita, she tüle tüinangkya mixcha chang koxle ojongtochu ahamkya chitüi, ile ngokya mixchae ngaxchu ija mixsün lailaile wüi changüi. Chemtue hwom tingsho to zandongle changüihex, ija ma she ngaxchu süt sax angkya chitüile woknuak müte nuzaoüi ilaxle owaechu chiawanle she-e athax puxle alaikya naosa odom saxüi. She-e tüle mongkünkya ma kakopa hia su-sa hwom owa angchu ahanle chifale saxüi.

⁵⁷

⁵⁸“Hünzome mongong tüikya füi, ija laipex ma zale tüikya Zang hwon-nwot jaono kax ma laxle chitüi thüiba tamchu hünzome tüle khompua-zadünkya JOWANPA mün achuak-achenle chitüi thüiba,

⁵⁹chixe hünzom tamchu hünzom su-sabu hato otuechu chimüi toxkya kaklak hia tüle za-adünkya kakma-lakshixbu hüi ang tomüi.

⁶⁰Tamchatle chu hünzome Ijip nok to ngünle laxdaokya khomtsikya kaklakbu chixe hünzom hato ahüiüi, ilaxle hünzom kak otuechu müile chitoxle changüi.

⁶¹Chixe kaklak hia kaxma-lakshix pangnu li chempang ija Zang wanlombu hia chix hwon-nwotbu laipex ma zale chitüipuix, ibu chuwüi pangwüi chixe ahüiüi ilaxle hünzom max ang tomüi.

⁶²Hünzom khünak huak ding angkya lyettsi büta tsale tüihukoxchu, hünzom ozün ma hidaole wüi toxüi; chemthüikoxle hünzome JOWANPA hünzom Zang kax ma chilax.

⁶³Hünzom ahak-aluale changkya tamchu pu-tsale changkya to chix mongzom chemle müile changpuix ilailaile hünzom olithule tamchu maxle paokya to chix ang mongzom müikya tüiüi. Hünzome kop angkya haxtok angkya hünzom tsaothale faokha to awütüi.

⁶⁴“Haxtua-zangnam kaochi makhange kaochi kople, chaxwannu okhui apongle, JOWANPAe hünzom pangnu jat-libu khato chiakle asamüi.

⁶⁵Tüta khatochu hünzome mongsom münatak, mating mahaxle thüi angkya ojongkha chu chitüile changüi; JOWANPAe hünzom a sung-zaokya, mongmaxkya hia jepakya, ibue alumle chang ang tomüi.

⁶⁶Hünzom khüzün a jento thama ma ngoüi, Zangnak zangngai hünzom a aban-asankyae awangle tamchu zik thua zale abüt-abankyae awangle ngo ang tomüi.

⁶⁷Hünzome angünngün pangwüi thua zale changkyae hünzom mongkhax-tuktukle ngoüi. Nopfole zang kangnakünsele sungüi; jafole zang kangngaiünsele sungüi.

⁶⁸Hünzome ikhato tam münchatpuole tsaodao koxlechu JOWANPAe hünzom khua makhange Ijip nok to tamchatle ka ang tomüi. Ikhato hünzome zanpabu chak to ma alüile da ang hangse tsuüi, ikoxle owaechu hünzom shakse chitsuüi.”